او گوندن، منیم یولوم وارلیغا آچیلدی
دوکتور مرتضی مجدفر
بؤیوک اینسانلار حاققیندا یازماق و اونلارین بؤیوک‌لوکلریندن سؤز آچماق، دونیانین اَن چتین ایشلریندن‌دیر. من یاشادیغیم ایللرده، هنده‌وریمده اولان بیر چوخ اینسانین، بویا- باشا چاتماسینی، دیرچلمه‌سینی، کامیللشمه و علمه دولماسینی گؤروب، منیمسه‌میشم. بوُ بؤیوک‌لوک اعتباری، بعضی‌لرده ساواد، بیر سیرالاردا بیلیم، باشقالاریندا یوُخاری سویّه‌لی مدرک و بعضی‌لرینده ایسه ادب ایله اوزه چیخیر و بئله‌لیکله صاحیبینه بؤیوک‌لوک عنوانی باغیشلاییر. آنجاق من اؤزومو تانیییب، اون بئش یاشیمدان ائلیمیزین، دیلیمیزین، ادبیاتیمیزین و کولتوروموزون اوغروندا بیر قوُللوقچو و هوسکار ایشچی کیمی چالیشماغا باشلایان گوندن، اوُستادیمیز دوکتور «جواد هیئت»ی، بؤیوک گؤروب، بؤیوک تانیمیشام. دوکتور هئیتین بؤیوک‌لوک اوخشارلیغی، اونون بیلیمی، یوُخاری سویّه‌لی مدرکی، اوستون تجربه‌لری، دونیا گؤروشو و هامیدان اؤنملی اونون ادبیندن آسیلی ایدی. دوکتور هئیتین باخیمیندان، دیلیمیزه خدمت گؤسترن هر بیر کیمسه، احتراما لایق ایدی. اونون باخیشیندا، ائلیمیزین وارلیغینی قوروماق اوچون، نه یاخشی کی بیر نفر اللی آددیم گؤتورمک عوضینه، اللی نفر هره‌سی بیر آددیم گؤتورسونلر.
من دوکتور هئیتی بیرینجی دؤنه اولاراق، ۱۳۵۸- نجی ایلده گؤردوم و کئچمیش ۳۵ ایلده، دفعه‌لرله بوُ بؤیوک اینسانین گؤروشونه نائل اولدوم. اوُستادین خاطیره‌سینی عزیز‌له‌ین دوستلارلا بیرگه، بوُ کیچیک یازیدا کئچمیش ایللرده اوُستادلا آپاردیغیم گؤروشلردن بیر نئچه‌سینه اشاره ائده‌جه‌یم.
من اوُستادلا آپاردیغیم بیرینجی گؤروشده، کیچیک بیر مدرسه اوُشاغی ایدیم. سونرالار معلمچیلیک و پداکوژی ایشلرینه گیریب، عؤمرومو بوُ یولدا قویدوم و آلتمیشدان آرتیق معلمچیلیک اوُصوللارینی ایضاح ائدن کیتابلار یازدیم و ترجمه ائتدیم. هم ده ایللر بویو، اؤلکه‌میزین دؤرد بیر یانیندا، معلم‌لره معلم اولدوم. دئمک کئچمیش ۳۳ ایلده، منیم حیاتیم معلّم و معلّمچیلیک‌له قایناییب، جوشموشدور. بوُ سؤزلری اورتایا چکمکدن منظوروم واردیر. منجه بؤیوک اوُستادیمیز دوکتور هئیت، هر بیر زامان بیزلره معلم اولموشدور و هامیمیزین یاشاییشیندا، ائلیمیزین اؤیرتمنی کیمی ایز بوُراخمیشدیر. بوُ یازیدا، من دوکتور هئیتدن گؤردویوم، دؤرد اؤیرتمنلیک اؤزه‌للیینه اشاره ائده‌جه‌یم. اوُستادیمیزین بوُ معلمچیلیک درسلری، هر بیر زامان منه یول‌گؤستریجی اولموشدور.
اون آلتی یاشیندا بیر اوُشاق
نئچه آی اولاردی «وارلیق» یولا دوشموشدو. وارلیغین دفتری تهرانداکی ولیعصرخیاوانیندا اولان، ایندی کی شهید هاشمی‌فر یا قاباقکی بیدی کوچه‌سینده ایدی. ائله هَمَن دفتر، دوکتور هئیتین مطبّی یا اؤزو دئمیشکن محکمه‌سی ایدی. بیزیم ائودن بوُ دفتره مستقیم اولاراق، بیر ماشین‌لا یادا کی بیر آز واخت قویماق‌لا، پیادا گئتمک اولاردی. اورادان «یولداش» مجله‌سی‌نین دفترینه ده بئش- آلتی دقیقه یول گئتمک‌له چاتماق اولاردی. یولداشین باش کاتیبی، منیم ایلک تورکجه معلمیمم و او گونلر گنج یاشلاریندا اولان «حسین دوزگون»ایدی. من بیر ایله یاخین ایدی حسین دوزگونون یانیندا ایشله‌ییر و اوندان درس آلیردیم. آزما-چوخ کاغاذ قارالاییب، جیزما قارا تورکجه بیر زادلار یازماغی اؤیرنمه‌یه چالیشمیشدیم. منیم یولوم هرگون آخشاملار، ائویمیزدن یولداشا گئتمک ایدی. وارلیغی الده ائدیب اوخوماغیما باخمایاراق، هله اؤزومه اورهک وئریب، وارلیغا گئدیب، دوکتور هئیت‌له گؤروشوب، یازدیغیم بیر مطلبی اونا وئرمه‌یه جرئت تاپمامیشدیم. آنجاق یولداش تعطیله اوغرادیقدان سونرا، ۱۳۵۸- نجی ایلین بیر پاییز آخشامیندا، اوُشاق حاققیندا توپلادیغیم بیر نئچه آتالار سؤزونو، یازدیغیم بیر بالاجا باشلانیش‌لا برابر، آتامین «آند» آدلی بیر شعری ایله بیرلیکده، مدرسه کیفیمه قویوب، وارلیغا ساری یوللاندیم. او زامان اون آلتی یاشیندا بیر اوُشاق ایدیم و متوسطه‌نین ایکینجی صینیفینده درس اوخویوردوم. وارلیغین دفتری بیر کؤهنه بینانین بیرینجی قاتیندا واقع اولموشدور. دفترین حال- هاواسی مطب و حکیم قوخوسو داشییردی. گؤزله‌ییش اوتاغیندا اولانلار، هم مریض‌لر، هم ده دوکتورو گؤرمک اوچون گلن یازیچی، شاعیر و ادیب‌لر ایدی. اوتاغین ایشیغی آز و پاییز آخشامی اولدوغو اوچون، اورهک توُتوجو ایدی. من ایسه سون درجه‌ده استرس‌لی ایدیم: بؤیوک اوُستاد، اوُن آلتی یاشلی بیر اوُشاغی قبول ائده‌جک‌می؟
بو دور، بیر آن قاپی آچیلدی. بیر اوُجا بویلو، گؤی گؤز، ساریشین و چوخ مرتب گئییمی اولان، عینک‌لی بیر کیشی، قوناعی ایله ائشییه چیخدی. البته بیر نئچه دؤنه وارلیغا گئتدیکدن سونرا، بیلدیم کی دوکتور هئیت، اوتاغینا گئدن هر بیر قوناق و مریضی، ایشلری قوُرتاردیقدان سونرا، قاپی قاباغینا قَدَر قارشیلاییب، اونلا اَل وئریب، ساغ اوللاشار.
نؤوبه منه چاتمیشدی. دوکتورون او ایللرده دفترینده اولان و اونو «حاجی» آدلاندیر‌دیغیمیز کیشی، منی سسله‌ییب، دوکتوره تانیتدیردی. اوُستاد اَلینی منه طرف اوُزالدیب، اوتاغین ایچریسینه دعوت ائتدی. اوتاقدا بیر ایکی باشقاسی دا اوتورموشدور. دئمک اونلار پیرهاشمی، سرداری‌نیا و مجیدزاده(ساوالان) ایمیشلر. آنجاق ائله اؤزومو ایتیرمیشدیم کی هله ده اوتوز نئچه ایلدن سونرا، اونلارین منله دانیشدیقلاریندان هئچ بیر زاد یادیمدا قالماییبدیر.
دوکتور هئیت چوخ احتراملا منله داوراندی. بیر- ایکی دقیقه کئچمه‌دن، اون آلتی یاشیمدا اولماغیم یادیمدان چیخدی. ایلکجه آتامین شعرین اوخودو، بَیَندی و چاپ اولماسینا سؤز وئردی. سونرا منیم توپلادیغیم آتالار سؤزونه باخدی. ابتکاری اولاراق آتالار سؤزلرینی «اوُشاق» کیمی بیر سؤزجوک باشلیغیندا توپلادیغیم اوچون، منی آلقیشلادی و هر بیر زاددان آرتیق، آتالار سؤزلری‌نین باشلانیشیندا یازدیغیم آلتی- یئددی سطیرلیک نثردن تعریف ائتدی و منه دئدی « یاخشی تورکجه نثر یازیرسان… بارک‌الله! تورکجه نثر یازانیمیز آزدیر. حتماً اؤزونو بو قولدا سینا!» آنجاق یازیمین چاپ اولوب- اولماماسینا هئچ بیر سؤز وئرمه‌دی. البته آتامین آند آدلی شعری، هم ده منیم اوُشاق حاققیندا کی آتالار سؤزلریم، وارلیغین ۱۳۵۸- نجی ایلین بهمن آییندا کی نمره‌سینده چاپ اولدو. هم ده منیم هَمَن یازیم، سونرالار «دکتر سلام‌الله جاوید»ین بوُراخدیغی «آذری فولکلور صفحه‌لری» مجله‌سی‌نین ۱۳۵۹- نجی ایلین خرداد آیینداکی چیخان نمره‌سینده نشر اولدو.
او گوندن، منیم یولوم وارلیغا آچیلدی. لاپ آزی هفته ده بیر دؤنه، وارلیغا گئدیب، ایشیم اولوب-اولمادان، اورادا اولاردیم. یاواش- یاواش بیر چوخ شاعیرلر، یازیچیلار و ادیب‌لری گؤرمه‌یه ده امکان تاپیردیم. حسین دوزگونون تعلیماتی اثرینده، هم ده دکتر هئیتین تاپشیریغی اوزه‌ره، نثر یازماغا آرتیق چالیشدیم. بیر-ایکی حئکایه‌نی وارلیغا وئردیم. آنجاق وارلیقدا حئکایه‌یه لازمی قَدَر یئر تعیین اولونمادیغینا گؤره، هم ده دئیه‌سن منیم نثرلریمین ائله‌جه ده دَیَرلی اولمادیقلاری اوچون، هئچ بیر زامان مندن وارلیقدا بیر نثر یازی چاپ اولمادی. آنجاق سونرالار، من یاشا دولدوقدان سونرا، دکتر هئیت منی نثر یازیلاریم اوچون آلقیشلادی. او منه اون آلتی یاشیندا بیر اؤیرتمن کیمی اؤیود وئردییی کیمی، سونرالار دا اؤیودلرینی مندن اسیرگه‌مه‌دی.
اون ایکی ایل سونرا
اون، اون ایکی ایل بیرینجی دؤنه دوکتور هئیتی گؤردویوم گونلردن کئچمیشدیر. بوُ ایللرده نئچه دؤنه بیر داها اوستادی گؤروب، اونونلا دانیشیب، اؤیودلریندن فایدالانمیشدیم. داهی اییرمی‌سکگیز یاشیندا بیر جاوان‌ایدیم. او گونلر ائولنمیش، ایکی یاشلی قیزیم نیگار، حیاتیمیزی شنلندیرمیشدی. هم ده معلم‌چیلیکدن، تعلیم‌و‌تربیه ایشلرینی ایره‌لی آپارماق اوچون، تهرانین ۱۶- نجی فرهنگ اداره‌سینه دعوت و اورادا مدیریت ایشلرینه داخل اولموشدوم.
او ایللر آنام کیمی منه مهربان اولان، قئیین‌آنامین قولو آغرییا باشلامیشدی. اونون ساغ قولو، بیله‌ییندن آغیر سانجی‌لار توتولوب، یاشاییشینی بئزیکدیرمیشدی. اونون گئجه-گوندوزو یوخ‌ایدی. آپاردیغیمیز حکیم‌لر دئییردیلر بیله‌یینده اینجه دامارلار توُتولوب، قانین گلیب-گئتمه‌سینه مانع تؤره‌دیرلر. چاره‌سی ایسه، بیله‌یی جراحلیق ائدیب، اینجه دامارلارین یولونو آچماقدیر.
او گونلر اوُستادیمیز دوکتور هئیت، هله ده جراحلیق ائدیردی. قئیین‌آنامی دوکتورون یانینا آپاردیق. ایلک گؤروشده، اوُستاد، قئیین‌آنامی منله اونون یانینا گئتمیش بیر یاشلی یازیچی یا شاعیر ساندی. آنجاق منیم ایضاحیمدان سونرا، دوکتور قئیین‌آنامین اللرینی معاینه ائتدی و «بوُ عارضه، روزگارین چوخ مهربان و عاشیق اولان آنالارا وئردییی هدیه دیر»؛ سؤزلری ایله، بیله‌یین نه سبب‌دن توُتولماسیندان دانیشدی. دوکتورون دئدیینه گؤره، چوخ سلقه- سهمان ائدن، ائو ایشلرینه حددن آرتیق جان آتان و سئوگی ایله عائله‌سی‌نین حیاتینی شاد، شن و آرام ایسته‌ین آنالار، قوللاریندان آرتیق ایش چکیرلر و بوُ عارضه بوُنا گؤره یارانیر. سونرا بیر سیرا سورغولار وئریب، تهرانداکی جاوید خسته‌خاناسینا مکتوب یازیب، قئیین‌آنامین هفته‌نین سون گونلرینده، عمل گونون تعیین ائتدی.
هفته‌نین سونو، حیات یولداشیملا بیرلیکده، قئیین‌آنامی خسته‌خانایا آپاردیق. مقدماتی سیناقلاردان سونرا، مریضین اوتاغی، هم ده عمل زامانی تعیین اولوندو. ناهارا یاخین، دوکتور هئیت گلیب، قئیین‌آنامین بیله‌یینی عمل ائدیب، اینجه دامارلارین یولونو آچیب، بیزلره انتظار سالونوندا اورهک- دیره‌ک وئره‌رک، گئتدی.
صاباحیسی گون دوکتور، یئنه ناهارا یاخین گلیب، قئیین آنامی گؤروب، اونو مرخص ائتدی. هم ده اون گون سونرایا مطبده اونون پانسمانینی اؤزو آچیب، عملین نئجه ایره‌لی گئتمه‌ییندن خبردار اولدوغو اوچون وقت تعیین ائتدی.
دوکتور گئدندن سونرا، قئیین‌آنام حیات یولداشیمین یاردیمی ایله حاضیرلاشاراق، من ایسه ترخیص ایشلرینی یئر به یئر ائتدییم اوچون، خسته‌خانادا بوُ اوتاقدان، او اوتاغا گئتمه‌یه باشلادیم و سون اوتاق اولاراق، مالی بؤلومونه یوللانیلدیم. منه بیر قبض وئردیلر. رقمی چوخ آز و اینانیلماز ایدی. اورانین مسؤلوندان رقمین نئجه بئله آز اولدوغونو سوروشدوم. یئریندن دوُروب، ایره‌لی گلیب، کاغاذی مندن آلیب، یوُخاریدان آشاغییا قَدَر اونا باخارکن، دئدی: «تکجه ایکی گئجه تخت پوُلو حئسابلانیب. دوکتور هئیت عمل پوُلو، هم ده داوا- وسایل پوللاری‌نین اوستونه خط چکیب، بوُنلاری آلمایین دئییبدیر…» دئمک بیر چتین عملین هزینه‌سی، بیر بالاجا سویوق‌دیمه ناخوشلوغوندان دا آز اولموشدور.
اون گون دؤزدوک. اونونجو گون، قئیین‌آتام ایله قئیین‌آنام، هم ده من، دوکتور هئیتین گؤروشونه گئتدیک. قئیین‌آنامین بیله‌یینین آغریسی، قادا- بالا سندن گئدن کیمی، اوُچوب گئتمیشدی. آذربایجانلی‌لارین دبلری اوزه‌ره، دوکتورون مطبی‌نین کوچه‌سی‌نین آغزیندا اولان « بامداد » قنادی‌سیندان، بیر قوُطو شیرنی ده توتدوردوک.
هر بیر زامان کی کیمی، بیزه نؤوبه چاتان واخت، دوکتور هئیت قاباقکی قوناغینی مشایعت ائدرکن، بیزی ایچری‌یه دعوت و شیرنی آپارماغیمیز اوچون تشکر ائتدی. سونرا قئیین‌آنامین بیله‌یینین پانسمانینی آچیب، عمل یئرینی الیله سیغارلادی و دئدی: « قوُرتاردی گئتدی. یئنی قولونوز، یئنی بیله‌یینیز موُبارکدی. لطفاً آز ایش چکین بوُ اللریزدن …»
اوُستادین سؤزو باشا چاتا- چاتمایا، قئیین‌آتام دئدی: «آقای دوکتور! اوُتاندیرمیشدینیز بیزی. نه سبب‌دن عمل، هم ده داوا- درمان پوُلونو آلمامیشدینیز؟ بئله بیلسئیدیک سیزه زحمت یاراتمازدیق…»
دوکتور هئیت بیر اؤیرتمن کیمی، قئیین‌آتا و قئیین‌آناما باخارکن، دئدی: «من بیر ایش گؤرمه‌میشم کی. بو آقای مجدفرین آذربایجان دیل و ادبیاتینا ائتدییی خدمتلرین قارشیسیندا، کیچیک بیر هدیه‌دیر…»
گؤزلریم یاشلا دولموشدو. بیرینجی گؤروشومدن اون ایکی ایل کئچسه ده، هله ده من جیزما قارا یازان بیر ادبیات هوسکاری‌ایدیم. گؤره‌سن آذربایجان دیل و ادبیاتینا ائتدیییم خدمتلر نه‌لر ایمیشلر؟! یقین کی یئنه ده دوکتور هئیت، جراحلیق پالتارینی دییشدیرمیش، اؤیرتمنلیک کسوتینده منه درس وئرمکده ایدی: «آنا دیلینه و ادبیاتینا یاردیم گؤسترمک و خدمت ائتمه‌یی یادیندان چیخارتما. بوُ وظیفه، سنین آنان و آنانا اوخشار قئیین‌آنانلا یاپیشیقلی‌دیر.»
بیز سیزین اوُشاقلارینیزیق
او گون آتام منی گؤرن کیمی همیشه کی کیمی، اؤز یازدیغی یئنی شعرلری‌نین ایلک نسخه‌سینی منه وئردی. بوُ ایش اونون عادتی ایدی. او هر بیر زامان یازدیغی بوتون شعرلریندن، منه بیر نسخه وئرردی. من ایسه اونلاری هانسی نشریه‌یه وئرمه‌یه، آتامدان اجازه‌م وار ایدی. او گونونکو شعر بئله ایدی:
یئرسیز یاشاماقدان یورولوب، لاپ جانا گلدیم
تئز- تئز یوُخوما گلمه، چاغیرما، آنا گلدیم!
جانا گتیریب جانیمی قیچلارین عذابی
فریاد سسیم قالخدی، خوروز تک بانا گلدیم
شعر عالمینه درس و کلاس و ساواد ایستر
تک شاعیر ایدیم کی بئساواد، بیر دانا گلدیم
« فرزانه و زهتابی و هیئت»له برابر
شاعیرلریله، من ده ساییلدیم، سانا گلدیم
نامرد ایله بیر لحظه منیم توُتمادی خوُلقوم
هر انجمنه مرد گئدیب، مردانا گلدیم
قانیم قوُرویوب شدت دردیله داماردا
قانلی ائوینه آخیری بورجا – قانا گلدیم
هر نه دئدیلر سورتملی‌دن، آیری داوادان
درمانه ساری، هر قاپییا، درمانا گلدیم
بی – خان تانیمازدیم کی ایم باش قاپیسیندا
گوج گلدی مرض، هم به‌یه، هم ده خانا گلدیم.
شعری اوخویوب، سونا چاتارکن، آتام دئدی: «بیلدینمی نه دئییرم؟! دونن گئجه کی ییغینجاغا دا اشاره ائتمیشم».
او گونلر ۱۳۷۶-نجی ایلین آبان آیی‌نین اوتوزوندا، تهراندا چیچکلر قورولوشونون توسطی ایله « مین ایل ادبیات، ۷۱۰ ایل یاشاییش» یا «آذربایجان شعر و ادبیاتی، ۷۱۰ ایل تجربه و اوُشاقلار » آدلی بیر مراسیمده، آتام غلامرضا مجدفردن، اوُستادلار فرزانه، زهتابی و دوکتور هئیت‌له برابر تجلیل اولوندو. او طنطنه‌لی ییغینجاقدا آلقیشلانان ادیب و یازیچی‌لارین اوست- اوسته ۷۱۰یاشلاری وار ایدی. آتامین دؤردونجو بیت‌ده « فرزانه و زهتابی و هئیت‌له برابر/ شاعیرلریله من ده ساییلدیم، سانا گلدیم.» دئدییی سؤزلر بوُ ییغینجاغا اشاره دیر.
او گئجه ییغینجاقدان ائوه دؤندوکده، آتام هر بیر زاماندان شن و طراوتلی‌ایدی. سونرالار دا، ۱۳۸۰- نجی ایلین شهریور آیی‌نین اوتوزوندا حیاتینی دییشرکن، او ییغینجاقدان خوش بیر خاطره کیمی یاد ائدردی؛ هم ده او ییغینجاغین سونوندا سالونون بیر گوشه‌سینده، دوکتور هئیت، فرزانه و زهتابی ایله اوتوروب، دانیشماقلاریندان. اونلارین اؤزلری دئمیشکن، کئچمیش گونلرین خاطیره‌لرینی دیریلدن اوتورومدا، من ده وار ایدیم و قوجالاریمیزین حؤرمتینی ساخلایاراق، آیاق اوسته دوُرموشدوم. دوکتور هئیت، او دؤرد نفرلیک اوتورومدا دا بیز آیاق اوسته دوُرانلارا بیر اؤیرتمن کیمی اؤیود وئریردی: «اینسان قوجالاشدیقجا، اوُشاق خصلتلرینه قاییدیر، اوُشاق کیمی تئز کؤوره‌لیر، اوُشاق کیمی تئز کوسور. آتا-آنالاریزی قوجا یاشلارینا دولان گونلردن، آرتیق یاد ائدین. اونلار بوُ یاشلاردا، هم سیزین آتا-آنانیز، هم ده اوُشاقلارینیز دیرلار. نئجه کی ایندی من، فرزانه، زهتابی و مجدفر سیزین اوُشاقلارینیزیق. اوُشاغین اَلیندن توُتماق لازیم‌دیر.»
دوکتور هئیتین سؤزلری، ایللردیر قوُلاغیمدا سسله‌نیر. بوُ اؤیودون اساسیندا آتامین عؤمرونون سون گونونه قَدَر، اونا قوُللوقچولوق ائتمه‌یی اؤزومه وظیفه ساندیم. ایندی ایسه آناملا بئله داورانماقدایام. اوُمید ائدیرم اؤیرتمنیمیزین وصیتینی یئرینه یئتیرمکده اوزو آغ اولام.
عزیزله‌یین
۱۳۸۳- نجو ایلین خرداد آیی‌نین بیرینجی گونو، بیر جمعه گونو و آخشام باشی دیر. تهرانین ارسباران مدنیت ائوی آذربایجانلیلار‌لا دولوبدور. هئچ بیر بوش صندل یوخ‌دور. آذربایجانین دؤرد بیر یانیندان بوُرایا ییغیشان شاعیرلر، یازیچیلار، ادیب‌لر، موسیقی‌چی‌لر، هامیسی هوسله اوتوروب، شعر و موسیقی دینله‌ییرلر:
مغرور دایان، آلنین آچیق، اوزون آغ
تک آللاها اَییل اَرکیم، آی اَرکیم
اوندان باشقا سن بیر کسه اَییلمه
قارشینا گؤر اَییلیر کیم، آی اَرکیم
شعرلر آذربایجانین گؤرکملی شاعیری «کریم مشروطه‌چی، سؤنمز»ین و ییغینجاق ایسه ائله همین شاعیرین ۷۵ ایللیینی عزیزلمه مراسیمی‌دیر. بوتون چیخیش ائدنلر اینجه، گؤزل و درین مضمونلو اثرلری ایله، ایللر بویو پارلاییب، آذربایجانلی‌لارین اوره‌کلرینه ایشیق ساچان چاغداش قدرتلی شاعیریمیز سؤنمزین حاققیندا دانیشیرلار. موسیقی‌چی‌لر ایسه، سؤنمزین شعرلری اوسته حاضیرلانان تصنیف و ترانه‌لری سسلندیریرلر و سازلی- سؤزلو بیر آذربایجان آخشامی‌دیر.
قوناقلارین سایی گئت-گئده آرتماقدادیر. بئواخت گلنلر آیاق اوسته دوُرمالیدیرلار، آنجاق قوجامان شاعیر، یازیچی و ادیب‌لریمیز گلدیکده، اونلارا حؤرمت ائده‌رک، یئر حاضیرلانمالیدیر. ائله بونا گؤره جاوانلار بیر بیر اوتوردوقلاری یئرلریندن دوُروب، گلنلره یئر وئریرلر. بالا- بالا بیز اورتا یاشلی‌لار دا یئریمیزی باغیشلامالییق. منله، حسن ایلدیریم دا اوتوردوغوموز یئردن قالخیب، سالونونون سون ردیفینده، قاپی قیراغیندا آیاق اوسته دوُروروق. دؤرد ساعاتلیق ییغینجاقدان، دئمک اوچ حیصه‌سینی آرخامیزدا قویموشوق. قاپی قیراغیندا دوُردوغوموز حالدا، دوکتور هئیت، همیشه کی کیمی مرتب و خوش گئییملی اولاراق، مجلسی ترک ائتمک ایسته‌ییر. سؤنمزین اوغلو، فرنود دا قاپی قیراغیندا دیر. هئیت دئییر: «داها اوتورا بیلمیرم. گئتمه‌لی‌یم…» سونرا ایلدیریملا منیم اَلیمدن توُتور، هر ایکیمیزی سالونون ائشییینه چیخاردیر و منه ساری دئییر: «آللاه آتانا رحمت ائله‌سین … صباحی، ساهر، دوکتور نطقی‌یه ده. گؤردونوزمو نه گؤزل ییغینجاق ایدی؟ آنجاق حئییف مجدفره، ساهره، نطقی‌یه، بئله ییغینجاقلار توتا بیلمه‌دیک و اونلاری تکجه مچیدلرده عزیزله‌دیک. من ده بوُ گون، صاباح گئتمه‌لی‌یم. مندن سیزه بیر معلم کیمی وصیت اولسون ؛ بویوک‌لریمیزی دیری ایکن، عزیزله‌یین!» سونرا ایسه، هر ایکیمیزین اَلینی بوُراخارکن، هنده‌ورینده اولانلار و اونون گؤروشوندن سئوینجه گلنلرله خوش- بئش ائده- ائده، بیزدن اوُزاقلاشا- اوُزاقلاشا، بیر داها دئییر: «دیریلری عزیزله‌یین، اؤلولرله برابر!»
او گوندن ایندییه قَدَر، ادبی- هنری درنک‌لر طرفیندن، حیاتدا اولان یا حیاتینی دییشن هر بیر یازیچی، شاعیر، تدقیقاتچی، موسیقی‌چی و کولتور خادیملریمیزی عزیزلمه و اونلارین نئچه اون ایللیک یاشلارینا دولدوقلاری شنلیک مراسیملرینی توُتاندا، ائلیمیزین بؤیوک اؤیرتمنی‌نین سؤزلری، هامیمیزین قوُلاغیمیزدا جینگیلده‌ییر!
