مرادعلي قريشي (م.قافلانتي) 80 یاشیندا (1312–1392)
ائلدار موغانلی
من گئده‌رم، آديم قالار
دوستلار مني خاطيرلاسين.
دويون اولار، بايرام اولار
دوستلار مني خاطيرلاسين.
ساهر ادبي- مدني درنه‌يي‌نين ديرلي عضوو و آغ‌ساققاليميز اوستاد قافلانتي‌نين آراميزدان کؤچمه‌سيندن 8 ایل کئچسه‌ده، هله‌ده بو آغير ايتگي‌يه اينانا بيلميريک. او بيزيمله ياشايير، بيزيمله بشري ايده‌آللاري دولاشير، اينسانليق عشقي‌له چارپان صنعتکار اوره‌يي، اوره‌ييميزله قوشا دؤيونور و آذربايجان آدلي علوي بير وارليغين تمثيلچيسي کيمي هله‌ده يورويور. بيز اوستادين مزاري اوستونده اونون شرفلي خاطيره‌سيني عزيزله‌یه‌جه‌یيک، اونون وطنپرورلي‌ييني، خالق سئورلي‌ييني و بشري ايده‌آللاريني قوروماغا بیر داها سؤز وئره‌جه‌یيک. يئنه‌ده بو آنما مراسيمينده، اونونلا عهد- پيمان باغلاياجاغیق کي، “حقيقتي آنانلارين، يئر اوزونده ائل درديني قانانلارين، الي قابار و آلني آچيق اينسانلارين عشقيني آلقيشلاياق؛ ايللر بويو وطنه، ائله نغمه قوشاق و سؤزلريميزي بم کي يوخ، زيل دئيه‌ک………….”
“قافلانتي”نين حياتينا اؤته‌ري بير باخيش
اوستاد مرادعلي قريشي(قافلانتي) آذربايجانين سئويملي، زحمتکش شاعيري‌دير. عؤمور بويو چکدييي زحمتلر، عذابلار و چتينليک، بير آن‌دا اولسون اونو آياقدان سالا بيلمه‌دي. او صاف اوره‌کلي، آچيق سوفره‌لي قوناق سئوه‌ر بير کيشي، عائله‌سي اوچون قايغي‌کش بير آتا و اؤز اينانديغي دوستلارينا صداقتلي بير آرخايدي. قافلانتي عؤمور بويو ظولمه، سيتمه، زحمت آداملارين تحقير ائديب، اونلارين حاققين زاي ائده‌نلره درين و مقدس بير نيفرت بسله‌دي. او اؤز خالقي‌ايله بيرليکده بوتون اينسانلارا خوشبختليک، بوللوق، امين- آمانليق، گؤزه‌ل و سعادتلي بير حيات ديله‌ين موباريز بير شاعير‌ايدي. او بوتون بارلي- بهرلي عؤمرونو بو يولدا چاليشميشدي. قافلانتي اؤز ياراتديغي اودلو- آلوولو اثرلري‌ايله آذربايجان شعرينده اؤزونه مخصوص بير ايز آچدي. آذربايجان ادبيياتي ياشاديقجا، قافلانتي‌نين‌دا ايزي و سسي بو ادبيياتلا بيرليکده ياشاياجاقدير.
- قافلانتي 1312نجي ايلين يازيندا (خرداد آیی‌نین بیرینده)، ميانانين چاراويماق ماحالي‌نين حيدرآباد کندينده آنادان اولوبدور. رضاخانين آذربايجاندا ايره‌لي سوردويو شووينيستي و چيرکين سياستلرينه گؤره، قافلانتي‌نين اوشاقليق چاغ‌لاري، آذربايجان خالقي‌نين ان چتين گون‌لرينه توش گلير.
- يئددي ياشيندا کندلرينده‌کي ميرزا ممدين مکتبينه گؤنده‌ريلير. 1321ده مکتبي بوراخيب، عائيله‌سي‌نين معيشتيني تامين ائتمک اوچون آتاسي‌ايله بيرليکده ايشله‌مه‌يه مجبور قالير.
- 1324-25 ينجي ايللرده آذربايجاندا قورولان ميللي حوکومت، قافلانتي‌نين‌دا عائيله‌سيني نهضتين آماج‌لاريني دوغرولتماغا طرف چکير. او 12 ياشينداايکن يئني‌يئتمه‌ليک رؤيالاريني بو بير ايلين بويالي خاطيره‌لري‌له ناخيشلايير.
- 1325ينجي ايلين آذريندن سونرا، قافلانتي‌نين‌دا فدايي عميسي توتولور، نهضتين دوشمانلاري طرفيندن وحشيجه‌سينه کندين کوچه‌لرينده اؤلدورولور. قافلانتي‌نين عائله‌سي تالانير و کنددن چيخاريلير.
- کؤچدوک‌لري کندده بير نئچه ايل ياشاديقدان سونرا، 1329ينجي ايلده، تهران شهرينه کؤچور و بو شهرده، اونون طالعي وطندن ديدرگين دوشموش مين‌لر آذربايجانلي‌لارين طالع‌لرينه قوووشور.
- ورامين ماحالي‌نين ياخينليغيندا ايش تاپير و بير يول دوزلتمه فعله‌سي کيمي بير نئچه آي ايشله‌يير. ايش قورتارديقدان سونرا 1331ينجي ايله‌دک بئکار قالير.
- 1331ينجي ايلده کيچيک بير رئزين فابريکاسيندا ايش تاپير. گوندوزلر ايشله‌يير، گئجه‌لرايسه درس اوخويور. قافلانتي بو ايللرده عائيله‌سيني‌ده کنددن تهرانا گتيرير و قيرخينجي ايل‌لرين آخيرينا‌دک رئزين دوزلتمه فعله‌سي صيفتي‌له بو فابريکادا ايشله‌يير. او بو ايللرده يالنيز دؤرد کيلاس درس اوخويا بيلير.
- قيرخينجي ايللر قافلانتي‌نين ادبيياتا، خصوصيله عاشيق شعرينه و صنعتينه ماراق گؤسترمه ايل‌لري‌دير. او بوش واختلاريني عاشيقلار قهوه‌خاناسيندا کئچيرير و آذربايجان شيفاهي خالق ادبيياتي قولو اولان عاشيق صنعتي‌ني دريندن منيمسه‌يير و بونونلا برابر اؤزوده شعر يازماغا باشلايير. قافلانتي کئچيرتدييي اضطراب‌لاري، هيجان‌لاري، سئوينج‌لريني، کدريني و معنويياتيندا پوزولمايان ايريلي- خيردالي ايجتيماعي حاديثه‌لرين ايزلريني، شعيرلرينده عکس ائتديرمه‌يه چاليشير. اينسانليق عشقي‌له چارپان صنعتکار اوره‌يي، اونو کلاسيک شعريميزين معاصير سسله‌نن عنعنه‌لرينه باغلايير و اولو نيظامي، نسيمي، فيضولي، واقف، ….. ساهر ايرثينده‌کي اينسان لياقتينه حصر اولونموش صنعت يولونو يييه‌لنمه‌يه دوغرو يؤنلدير و “اشرف مخلوقات” ساييلان اينسان ترننومچوسو اولماغا جسارت تاپاراق، اونونلا فخر ائدير.
- قافلانتي، اللينجي ايل‌لرين اول‌لرينده، تهراندا ياشايان بير نئچه آذربايجان شاعيرلري‌له تانيش اولور و اونلارلا علاقه يارادير.
- 1355ينجي ايلده، آذربايجان يازاري رحمتليک “نصرت‌الله فتحي”نين واسيطه‌سيله تهراندا فعاليت گؤسترن “دوستلار گؤروشو” ادبي درنه‌يي‌نه تانيتديريلير. دکتر سلام‌الله جاويدين تشبثي‌ايله قورولان بو درنک، بير چوخ آذربايجان شاعيرلري‌نين او ايللرده ادبي اينکيشافيندا اؤنملي رول اوينايير.
- بو ايللرده آذربايجانين ميللي شاعيري مرحوم بولود قره‌چورلو (سهند) قافلانتي‌نين استعدادلي بير ائل شاعيري اولدوغونو دويور. سهند، قافلانتي شخصيتينده و شعرينده باريز شکيلده گؤزه چارپان جسورلوق، موباريزليک، دؤنمزليک کيمي غرور حيس‌لري‌نين قايناغيني اونون زحمتله يوغرولان شرفلي ياشاييشيندا گؤرور و بير اوستاد شاعير کيمي قافلانتي پوئزياسي‌نين اينکيشافيندا اؤز مثبت تاثيريني بوراخير.
- 1357ينجي ايلين چؤوغونلو، بورانلي قيشيندا ايران خالق‌لاري‌نين اوزونه اينقيلاب گؤنشي‌نين شؤوقو دوشور. قافلانتي‌نين بير سيرا شعرلري اؤز سسي‌له کاسئت شکلينده ياييلير. همن ايلده شاعيرين بير سيرا شعرلريني ايحتيوا ائده‌ن “سئچيلميش اثرلر” آدلي شعر کيتابي، تبريز شهرينده “ائلدار” نشريياتي طرفيندن چاپ اولونور.
- يارانان ال- وئريشلي شرايط‌ده، قافلانتي شعرلريني خالقين و زحمتکش کوتله‌نين منويياتيني عکس ائتديرن ادبييات نومونه‌سينه چئويرير. تهراندا يارانان ادبي محفيل‌لرين و انجومن‌لرين فعال ايشتراکچيسي کيمي چيخيش ائدير. اثرلريني دؤرو مطبوعاتدا، شعير مجليس‌لرينده و يارانان هر بير موساعيد شراييطده يايير. همن ايللرده تهراندا ياييلان “يولداش” مجلله‌سي‌نين تحريرييه هئياتي‌له جيددي و سيخ امکداشليق ائدير.
- 1358ينجي ايلده قافلانتي‌نين بير سيرا ديگر شعرلري “مجموعه” آدلي کيتابدا ايشيق اوزو گؤرور. قافلانتي‌لا برابر، بو کيتابا تانينميش شاعيرلريميز حبيب ساهر، حسين دوزگون و عمران صلاحي‌نين‌ده شعرلري داخيل ائديلميشدير.
- 1360ينجي ايلده تهراندا يارانان “آذربايجان يازيچي‌لار و شاعيرلر جمعيتي” نين فعال و چاليشقان بير عضوو کيمي فعاليت گؤسته‌رير.
- 60ينجي ايل‌لردن سونرادا، قافلانتي‌نين شعرلري ايستر آذربايجاندا، ايسترسه‌ده تهراندا چيخان آذربايجان ديلينده ژورنال و قزئت‌لرده چاپ اولور و بو گونه کيمي داوام ائدير. او جومله‌دن يولداش، اينقيلاب يولوندا، آزادليق، يئني يول، فروغ آزادي، عصر آزادي، کؤرپو، دده‌قورقود، آذري، بهار زنجان، خدافرين، آراز، اؤيرنجي نشرييه‌لري و ……
- ايران داخيليندن علاوه، قافلانتي‌نين اثرلري آذربايجان جومهوريسي مطبوعاتيندا گئنيش سوييه‌ده چاپ اولوب. باکي‌دا چاپ اولان “جنوبي آذربايجان آنتيلوگيياسي” و “آراز گولور” جنوب شعري مجموعه‌سي و تورکيه‌ده ياييلان “گؤنئي آذربايجاني‌نين ادبي آنتيلوگيياسي” کيمي شعر مجموعه‌لرينده‌ده قافلانتي شعري‌نين اؤز مؤوقعي و اؤز يئري واردير.
- بو ايللرده قافلانتي‌نين ائوي، بير اوميد ائوي کيمي بوتون آذربايجان شاعيرلري‌نين، يازيچي‌لاري‌نين، اديب‌لري‌نين و ادبييات هوسکارلاري‌نين اوزونه آچيق اولور. آذربايجان ادبيياتي‌نين موختليف ساحه‌لرينده و موختليف يئرلرده چاليشان بير سيرا ادبي محفيل‌لرين، شاعير و يازيچي‌لارين آراسيندا علاقه ياراتديغي و يئري گلنده اونلاري بير- بيرلرينه قوووشدوردوغو اوچون، قافلانتي‌نين ائويني ادبي بير کؤرپو کيمي قيمتلنديرمک اولار. بو ائوده خالق شاعيرلري بالاش آذراوغلونون ، صمد وورغونون حيات يولداشي و قيزي‌نين، يازيچي دوکتور غلامرضا جمشيدي‌نين، گؤرکملي آذربايجان يازيچيسي پروفسور عزيزه جعفرزاده‌نين و بير چوخ ادبي و مدني شخصيت‌لرين شرفينه گونئي آذربايجان شاعيرلري‌نين ايشتيراکي‌ايله شعير گئجه‌لري تشکيل ائديليبدير. بئله‌ليکله، قافلانتي‌نين ائويني آلتميشينجي ايللرده، ادبيياتيميزي قورويوب ياشاتماقدا اولان ادبي بير اوجاق آدلانديرساق، يانيلماميشيق.
- 1366ينجي ايل تهراندا تشکيل تاپان “جنوبي آذربايجان شاعرلري‌نين بير گروپو” آدلي ادبي درنه‌يين قوروجولاريندان و فعال ايشتيراکچي‌لاريندان اولور. بو درنک سونرالار “حبيب ساهر آدينا ادبي انجومن” آدي‌لا اؤز فعاليتينه داوام ائدير.
- 1369ينجي ايلده قافلانتي‌نين يئني بير کيتابي شاعير حسن ايلديريم‌ين رئداکتورلوقويلا تهراندا “نشر مينا” طرفيندن ياييلير. بو کيتاب “عؤمور آيناسي” آدلانيردي.
- 1370ينجي ايل تهراندا بير سيرا دوستلاري‌لا برابر “حبيب ساهر آدينا ادبي انجومن” آدلي درنه‌يي قورور. بو درنک سونرالار ” ساهر ادبي انجومني” آدي‌لا اؤز فعاليتينه داوام ائدير.
- قافلانتي اوزون ايللر آرزوسوندا اولدوغو باکي شهرينه اؤز حيات يولداشي‌لا برابر 1370-ينجي ايلده سفر ائدير. اورادا “آذربايجان يازيچي‌لار ايتيفاقي”نين قوناغي اولور. “عاشيق پري مجليسي” بو شهرده شاعرين شرفينه شعر- موسيقي آخشامي تشکيل ائدير و آذربايجان راديوسو اونون حيات و ياراديجيليغي باره‌ده وئرليش‌لر حاضيرلايير. بو زامان شاعيرين بير سيرا شعرلرينه ماهني‌لار بسله‌نير و قوشما ، گرايلي‌لاريني آذربايجان عاشيق‌لاري سئوه- سئوه اوخويورلار.
- قافلانتي‌نين ادبي فعاليتي 1374ينجي ايلدن “ساهر ادبي انجومني” درنه‌يينده داوام تاپير. بو درنک سونرالار ” ساهر ادبي- مدني درنه‌يي” آدي‌لا اؤز فعاليتينه داوام ائدير.
- 1374-ينجي ايل‌لردن سونرادا قافلانتي معيشت طرزي‌نين آغيرلاشماغينا باخماياراق، قاباقکي هوسله يازيب، يارادير و عضوو اولدوغو ادبي درنه‌يين تدبيرلرينده اؤز تکليف و فعاليت‌لري‌له بير آغ‌ساققال کيمي ايشتيراک ائدير. او درنه‌يين طرفيندن موختليف ايللرده تشکيل ائديلن مراسيم و يوبلئي‌لره چوخ جيددي قاتيليردي. بوندان آسيلي اولاراق شاعر و يازيچيلاريميزدان هاشم ترلانين 65، 70، 75 و 80 ياشي ، اوستاد يحيي شيدانين 65 ياشي، حبيب فرشباف‌ين 50 و 60 ياشي، حبيب ساهرين 100 ياشي، آلاوون 70 ياشي، عليايي‌نين 70 ياشي، گنجعلي صباحي‌نين 100 ياشي و بالاش آذراوغلونون 70 ياشي موناسيبتي‌له تشکيل اولونان مراسيم‌لرده جيددي ايشتراک ائتميش و اؤز گؤسته‌ريش‌لري‌له بو مراسيملرين داهادا بارلي اولماقلارينا دستک وئرميشدير.
- سون ايللر قافلانتي اؤز خاطيره‌لريني يازماقلا مشغول اولوردو. بيرده‌کي اثرلريندن عبارت شعر مجموعه‌لريني چاپا حاضيرلاييردي. تاسسوفله اؤلوم آمان وئرمه‌دي. ايندي قافلانتي‌نين بئش دفتردن عبارت اثرلري و اونون خاطيره يازي‌لاري ساهر ادبي- مدني درنه‌يي‌نين ايختياريندادير. بو اوميدله کي تئزلیکله ايشيق اوزو گؤرسونلر.
- 1384-ينجي ايلين دي آيي‌نين اول‌لرينده قافلانتي بئيين اينفاکتي نتيجه‌سينده اؤز ساغلامليغي‌ني الدن وئرير و خسته‌خانادا ياتاق دوشور. حاققيندا گؤرولن يارديم‌لار نتيجه وئرمير.
- نهايت 1384-ينجي ايلين دي آيي‌نين 15ينده، آذربايجان خالقي‌نين شاعر اوغلو مرادعلي قريشي(قافلانتي) آراميزدان کؤچور. قافلانتي‌نين جنازه‌سي دوستلاري، عائيله‌سي، آذربايجان مدنيت هوسکارلاري و خصوصيله گنج‌لرين مشايعتي‌ايله تهرانين جنوب حيصه‌سينده يئرلشن يافت‌آباد مزارليغيندا تورپاغا تاپشيريلير.
ابدي خاطيره‌سينه عشق اولسون
***************
“قافلانتي” دان بیر نئچه شکیل
“قافلانتي” دان بیر نئچه شعر
عؤمور آيناسي
وطنيمين وورغونويام، ياييليبدير هر يانا،
سسيم دوشوب باشدان باشا داغا، داشا، آرانا،
آند ايچيرم چيخاجاقدير ائليم آزاد دوورانا،
آچاجاقدير وطنيمده چيچک دئديم، گول دئديم،
سينه گرديم، سؤزلريمي بم دئمه‌ديم، زيل دئديم.
*
ياد ائل‌لي‌لر جان آتديلار وارليغيمي دانماغا،
شانلي آنا تورپاغيمدا مني اؤزگه سانماغا،
قانماديلار، يارانميشام ائل اوغروندا يانماغا،
باغلاميشام جسارتلي ائل‌لريمه بئل، دئديم،
سينه گرديم، سؤزلريمي بم دئمه‌ديم، زيل دئديم.
*
ائل‌لريمه ظلم ائتديلر اوتانمادان آشکارا،
سينم اوسته چالين- چارپاز وورسالاردا مين يارا،
آگيلمه‌ديم حياتيمدا بير آنليق‌دا يادلارا،
اينانميشام اولاجاقدير ائلين گوجو سئل دئديم،
سينه گرديم، سؤزلريمي بم دئمه‌ديم، زيل دئديم.
*
غربت ائلده دائيم توتدوم اؤز ائليمين سوراغين،
سؤندورمه‌ديم اوره‌ييمده وطنيمين چيراغين،
قلم چاليب، بوزوشدوردوم دارگؤزلونون دوداغين،
سارسيلمارام عمليمدن بيلمه‌ييبسن بيل، دئديم،
سينه گرديم، سؤزلريمي بم دئمه‌ديم، زيل دئديم.
*
آدلي- سانلي ائليم واردير، دئديم- سانما من تکم،
نسيمي‌يم، کوراوغلويام، خان ائيوازام، بابکم،
هئچ اولماييب، اولماياجاق مسلکيمدن ال چکم،
بير منه باخ، ياخشي تاني، گؤزلريني سيل- دئديم
سينه گرديم، سؤزلريمي بم دئمه‌ديم، زيل دئديم.
*
من اؤزومو ياد ائللره قاتماميشام، قاتمارام،
وارليغيمي قارا پولا ساتماميشام، ساتمارام،
وطنيمي گؤزلريمدن آتماميشام، آتمارام،
بير گون‌ده يوخ، بير آي‌دا يوخ، نئچه- نئچه ايل دئديم،
سينه گرديم، سؤزلريمي بم دئمه‌ديم، زيل دئديم.
*
آلقيشلاديم حقيقتي آنانلارين عشقيني،
يئر اوزونده ائل درديني قانانلارين عشقيني،
الي قابار، آلني آچيق اينسانلارين عشقيني،
نغمه قوشدوم، ايللر بويو وطن دئديم، ديل دئديم،
سينه گرديم، سؤزلريمي بم دئمه‌ديم، زيل دئديم.
*
يازديقلاريم حياتيمين آيناسي‌دير آي ائللر!
عؤمور بويو حق اوستونده سالديم هاراي آي ائللر!
اولماياجاق مظلوملارين حقي داها زاي، ائللر!
سانجيلاجاق ظاليملرين گؤزلرينه ميل، دئديم،
سينه گرديم، سؤزلريمي بم دئمه‌ديم، زيل دئديم.
*
دوشمانلارا عالم- آشکار آجي زهر دئسمده،
سؤزلريمده عؤمور بويو بوندان بتر دئسمده،
يورولماييب، گئجه- گوندوز، آخشام- سحر دئسمده،
“قافلانتي”يام ائل‌لريمه شيرين- شيرين ديل دئديم،
سينه گرديم، سؤزلريمي بم دئمه‌ديم، زيل دئديم.
ساغليقلا گئت
وطن اوغلو ساغليقلا گئت
جانيم شاعر، گؤزوم شاعر!
سن هله‌ليک ووصالا يئت
من هيجرانا دؤزوم شاعر!
*
کئچ آرازدان، آرخايين اول،
دوغمالارلا قول- بويون اول،
اوره‌يينده سئوينجله دول،
من گؤز ياشي سوزوم شاعر!
*
بخت يار اولدو ايندي سنه،
گئتدين وطندن وطنه،
فرصت اولار بير گون منه
اوندا گولر اوزوم شاعر!
*
يوردوموزدان اولفت آپار،
ائللريمدن صؤحبت آپار،
سن باکي‌يا حؤرمت آپار،
سئوينسين تبريزيم شاعر!
*
يوبانما گئت آرزي گيله،
گؤز ياشيني سيله- سيله،
آغلاما گئت گوله- گوله،
قوي آغلاييم اؤزوم شاعر!
*
شاعرلرله گؤروشنده،
قوجاقلاشيب اؤپوشنده،
“قافلانتي”دان سؤز دوشنده
سؤيله واردير سؤزوم شاعر!
يارگله، يار گله
اؤلمه‌ميشم‌گليرسسيم
ائله يار گله، يار گله.
قوچ- قوزونو قوربان کسيم
بئله، يار گله- يار گله.
*
گتيره خوش خبر بيزه،
سس دوشه داغلارا، دوزه،
گول- چيچکدن اينجي دوزه-
تئله، يار گله- يار گله.
*
سسله‌يه وطنداشلارين،
وفالي يار- يولداشلارين.
مظلوملارين گوز ياشلارين-
سيله، يار گله- يار گله.
*
شنليک دوتا بوتون ائللر،
نغمه دئيه شيرين ديللر.
باغلايا بير گوموش کمر-
بئله، يار گله- يارگله.
*
ياشيللانا بوز تارلالار،
دورنا گله قاتار- قاتار.
سوزمه‌يه دوشه سونالار-
گؤله، يار گله- يار گله.
*
بيرين دئديم قالدي يوزو،
اوره ييمين ايچگين سؤزو.
“قافلانتي”نين غملي اوزو-
گوله، يار گله- يار گله.
یاز گتیر منه
سئوگیلیم سؤیله‌دیم عشقیمه اینان
ایچگین گؤزلرینی یاز گتیر منه.
کؤنلوم توتولوبدور غمدن بو زامان
گلنده صدفلی ساز گتیر منه.
*
منه ایلهام گتیر سؤز مکانیندان
محبت کانیندان، اولفت کانیندان
عشقین، حقیقتین یول ارکانیندان
چوخ‌دا گتیرمه‌سن، آز گتیر منه.
*
فلاکت غباری قونور اوزومه
دونور کیپریکلریم، باتیر گؤزومه
قار باسیب هر یانی چیخیر دیزیمه
باهار گتیر منه، یاز گتیر منه.
وطن
وطنیم شمع‌دیر یانیر
منده پروانه- پروانه.
وطنی سئومه‌ین، سانیر
منی دیوانه- دیوانه.
*
یاشاماق اولماز وطنسیز
اولا بیلمز باش بدنسیز
تحقیر ائده‌ر وطن سنسیز
منی بیگانه- بیگانه.
*
باغلیدیر اومید وطنه
ساتیلماز گلیب گئده‌نه
سؤیله‌ییرم دؤنه دؤنه
دئییل افسانه- افسانه.
*
وطندیر وارلیغین یاشی
درماندیر تورپاغی داشی
وطنسیز گؤزلرین یاشی
دؤنر عمانه- عمانه.
*
ائللر آییلیب دورماسا
دوشمان ضربه وورماسا
یئنی بیر قورقو قورماسا
قالار ویرانه- ویرانه.
4 پاسخ
سالام قارداش
سیز استاد قافلانتی نی هاردان تانییرسیز لوتفن جاواب وئرین
چوْنکو منده اوستادی یاخیندان تانییردیم ، من شووَر لی ام و استاد بیزیم ائوده یاشاییب
لوتفن جاواب وئرین ??
سلاملار اولسون : دئه مه لیم قافلانتی چاراویماق محالنین شیویار (شئوه ر) کندینده یاشاشیار کن ملی دموقرات حکومکتی آزربایجاندا اوز وئریر بو حادثه نی و ظلملری کی خانلار ملته ائدللر مرحوم قافلانتی سونرا اونی ۱۳۵۱ نظمه چکیر و انقلاب ظفریندن سونرا ۱۳۵۷ اسفند آییندا تبریزیده چاپ یئتیریر . الان منده اونون ایکی دیرلی اثری هنوز قلیر . بیریسی سئچیلمیش اثرلر آدیندا ۱۳۲۵-۲۴ ایلینده آزربایجاندا اولان اتفاقینه چاراویماق دا اولان خانلارین ظلمون نظمه چکیر . روحی شاد و یولی قالارقی اولسون
بو شعر لر قافلانتی نین اثری دیر :
قورخما بالا من آییغام یاتمارام
عالم بیلیر سیزی گوزدن آتمارام
اولادیمی یاد ائللره ساتمارام
جومرد ایگید بسله ییرم قوینومدا
مقدس بیر وظیفه دیر بوینومدا
ساغ اولون بو گوزل و دیرلی ایشیزه گوره.
روحو شاد السون