گنج صنعتکار «صمد حسنپور» وفات ائتدی
چوخ تاسفله آذربایجان عاشیق صنعتینین خادیملریندن اولان گنج بالابانچی «صمد حسنپور» گؤزلهنیلمهدن حیاتدان آیریلمیشدیر.
یاییلان خبرلر اساسیندا گنج صنعتکار «صمد حسنپور» مهر آیینین اولینده ۳۰ یاشیندا ایکن اورهک اینفارکتی سببیندن حیاتینی ایتیرمیشدیر.
«صمد حسنپور» 1369نجی ایل قاراداغ ماحالینین «چاخماق بولاق» کندینده دونیایا گؤز آچمیش و ائله بو کندین قبریستانیندا دا اؤز صنعت یولداشلاری و آذربایجان عاشیق صنعتینین خادیملرینین مشایعتی ایله تورپاغا تاپشیریلمیشدیر.
گنج صنعتکار 1396نجی ایل تبریزده کئچیریلن «آذربایجان عاشیقلار موسیقی فستیوالی»ندا ایکینجی بالابانچی یئری قازانمیشدیر.
«ایشیق» – آذربایجان ادبیات و اینجه صنعت سایتی امکداشلاری آدیندان گنج صنعتکاریمیز «صمد حسنپور»ون واختسیز ایتگیسینی صنعتکارین حؤرمتلی عائله و قوهوم-اقرباسینا، ائلهجه ده آذربایجان عاشیقلار بیرلیگی عضولرینه و آذربایجان عاشیق صنعتی جمعیتینه تسلیت دئییر، خاطرهسینی عزیزلهییریک.
«ایشیق» – آذربایجان ادبیات و اینجه صنعت سایتی
4/7/1399
یک پاسخ
بو قارا خبردن اوزولدویومو بیلدیریب آللاه رحمت ائلهسین، یئری جننتده اولسون دئییرم.