چئویرن: ایشیق
ترجمه: ایشیق
ایشیق

turkoglu
«تورک اوغلو» ابدی‌لیک سوسدو. شرفلی خاطیره‌سینه عشق اولسون!(بیانیه‌لر، خبرلر و شکیل‌لر)

چوخ تاسسوفله بو گون -تیر آیی‌نین بئشینجی گونو- عؤمرونو آزادلیق و اجتماعی عدالت عشقیله باشا ووران، یارادیجیلیغینی صلح، امین آمانلیق، انسان آزادلیغی و زحمتکشلرین ایده‌آللاری کیمی بشری موضوعلارلا بزه‌ین آذربایجانین قوجامان شاعری «تورک اوغلو»، حیاتینی ایتیرمیشدیر.
«تورک اوغلو» تخلصی‌ایله ادبی اجتماعیاتیمیزدا تانینان «برجعلی قریشی» اللینجی ایللرده ادبیاتیمیزا اوز گتیرمیش، ایلک شعرلری ائله بو ایللرده دوقتور «سلام‌اله جاوید»ین تشبثی‌ایله یاری گیزلی فعالیت ائده‌ن «دوستلار گؤروشو» درنه‌یینده یاییلمیشدیر.‌
«تورک اوغلو»نون یارادیجیلیغینین پارلاق دؤورو آلتمیش و یئتمیشینجی ایللر اولموشدور و ایندییه قده‌ر «تپه‌یین داغی»، «آنا گؤزوم قان آغلاییر» و «چؤرک دردی» عنوانلاری آلتیندا اوچ شعر مجموعه‌سی ایشیق اوزو گؤرموشدور. باخمایاراق کی اونون یارادیجیلغینین بؤیوک بیر قیسمی هله‌ده یاییلمامیش قالیبدیر.
اؤز صداقتی و صمیمیلیگی ایله ادبی جمعیتیمیزده بؤیوک حؤرمت قازانان اوستاد «تورک اوغلو»، ۱۳۱۷-نجی ایل «چاراویماق» ماحالی‌نین «شورقره» کندینده یوخسول بیر عائیله‌ده دونیایا گؤز آچمیش و معیشت آغیرلیغیندان یالنیز ابتدایی تحصیل آلا بیلمیشدیر. یئنی یئتمه یاشیندان تهرانا کؤچموش و بوتون گنجلیگینی و اورتا یاشلیغینی «آیناساز» ایشچیسی کیمی ایشله‌میشدیر.
اوستاد «تورک اوغلو»نون ایتگیسی ادبیاتیمیزدا اوز وئره‌ن آغیر ایتگی‌دیر. بیز «ایشیق»- آذربایجان ادبیات و اینجه صنعت سایتی امکداشلاری بو آغیر ایتگینی آذربایجان خالقینا، ادبی جمعیتیمیزه، اوستادین حؤرمتلی عائیله‌سینه و دوست- تانیشلارینا باشینیز ساغ اولسون دئییریک و مبارز شاعریمیز «تورک اوغلو»نون شرفلی خاطیره‌سینی عزیزله‌ییریک.

«ایشیق»- آذربایجان ادبیات و اینجه صنعت سایتی
۵/تیر/۱۳۹۵

***

«تورک اوغلو»نون تورپاغا تاپشیرما مراسیمی:
تهران- بهشت زهرا- بیرینجی بؤلوم (قبریستانین قدیم حصه‌سی) 
یکشنبه – ۶ تیر- ساعات ۱۱٫۳۰

***
azeri

آجی خبر!

آذربایجانین تانینمیش شاعری، زحمتکش انسان، چتین گونلرده ائوی آذربایجان شاعرلری و صنعت آداملارینین سیغناجاق یئری اولان، ده‌یرلی دوستوموز، برجعلی قریشی (تورک اوغلو) دونیایا گؤز یومدو. بو ایتگی ساریدان، شاعرین حؤرمتلی عائله‎سینه، آذربایجان خالقینا و ادبیاتیمیزی سئونلره باشینیز ساغ اولسون دئییریک.

  آذری مجله‌سی

***

yashmaq

مین بئله چتینلیک اولسا یولومدا
دایانسا اهریمن ساغدا- سولومدا
کئچه‌جم داغلاردان، تیکانلی چؤلدن
اورکده اومید وار، قوه قولومدا
“تورک‌اوغلو”

آذربایجان ادبیات و مدنیتی‌نین قوجامان قایغی‌کئشی‌، اینجه دویغولار شاعری، اوستاد تورک‌اوغلو (برجعلی قریشی) بو گون تهراندا، اؤز شخصی ائوینده حیاتینی ده‌ییشیدی.
باجاریقلی شاعر و خالقیمیزین اجتماعی-مدنی خادیمی رحمتلیک “تورک اوغلو”ندان بیر نئچه مجموعه شعر و پوئمالار بو گونه کیمی نشر اولوب و بیزه بیر ده‌یرلی یادیگار کیمی ارث قالمیشدیر.
تانری او اوجامان و قوجامان شاعره باغیش و حؤرمتلی عایله‌سینه دؤزوم عنایت بویورسون.

یاشماق کیتاب ائوی

***

sabir
دونیا سندن کیملر کئچدی!

ائلیمیزین آراسیندا و ادبیات دونیاسیندا «تورک اوغلو» آدی ایله تانینان، «برجعلی قریشی» حیاتینی ده‌ییشدی. او، تورک دیللی ائللریمیزین قایغی چکن شاعری، ایللر بویو آغیر زحمت ایله یاشاییشلا داورانان و ائلینین، خصوصیله زحمت چکن اینسانلارین حیاتینی اؤز شعرلرینده عکس ائتدیرن چالیشقان بیر شاعر ایدی.
تورک اوغلو، انقلابین ایلک گونلرینده، ۱۳۵۷- نجی ایلین بهمن آییندان شعرلرینی یایماقلا، اؤزونو خلقیمیزه تانیندیردی. سونرا، گونو- گوندن سایلاری آرتماقدا اولان مطبوعاتدا چیخیش ائتدی و سونرالار «تپه‌یین داغی» منظومه‌سینی چاپا وئردی و چتین‌لیک‌لری آرخادا  قویاراق، اوفوق‌لری یارا- یارا، باشقا اثرلرینی ده ایشیق اوزونه چیخارتدیردی.
تورک‌اوغلونون ائوی، ایللر بویو آذربایجانلی یازیچی- شاعرلرین اومید ائوی اولموش و بیر چوخلاری، اونون دوز-‌چؤره‌یی ایله شعرلرینی دوزلاندیرمیشلار.
او دفعه‌لرله «صابر ادبی انجومنی»نده چیخیش ائتمیش و اؤز شعرلری ایله حاضیر اولانلارین آلقیشینی قازانمیشدیر. اونون صابر ادبی انجومنیده سون چیخیشی، هله آرتیق خسته‌لییه دوچار اولمامیشدان قاباق، ایکی ایل اؤنجه تهراندا فردوس مدنیت ائوینده اولموشدور.
صابر ادبی انجومنی، تورک اوغلونون ایتگیسینی، بوتون تورک دیللی ائللریمیزه، خصوصیله آذربایجان ائلینه تسلیت دئیه‌رک، بوتون شاعر- یازیچی و صنعتکارلاریمیزدان، هم ده عموم خلقدن ایسته‌ییر اونون یادی ایله قورولان ییغینجاقلاردا اشتراک ائتسینلر. صابر انجومنی، قاباقدا اولان ییغینجاقلارینین بیرینده، تورک ‌اوغلونون شعر و حیاتی حاققیندا  تدبیرلری اولاجاقدیر.
تورک‌ اوغلونون اؤلومونو، عائیله‌سینه، شاعرلره، یازیچیلارا و آذربایجان خلقینه باش ساغلیغی وئریریک.

                     صابر ادبی انجومنی

***

«تورک اوغلو»نون تورپاغا تاپشیرما مراسیمیندن شکیل‌لر:

اوستاد تورک‌اوغلونون جنازه‌سی یکشنبه گونو ساعات ۱۲ده تهرانین بهشت زهرا قبریستانینین بیرینجی بؤلومونده یاخین دوستلاری و عائیله عضولرینین اشتراکیلا تورپاغا تاپشیریلدی. سئویملی شاعریمیزین مزاری باشیندا شاعرین اؤز سسیله شعرلری سسلندی. سونرا آذربایجان ادبی مدنی درنک‌لر طرفیندن نماینده کیمی مراسیمده اشتراک ائده‌ن: حسن ایلدیریم (آذری مجله‌سی)، بابک تورک(صابر ادبی انجومنی)، عدالت دومان(خدافرین درنه‌یی)، آیدین تبریزلی(آراز درنه‌یی) و شاعرین دوستلاریندان جناب اورنگی اونودولماز شاعریمیز حاقیندا اؤز اوره‌ک سؤزلرینی سؤیله‌دیلر و نماینده‌لیک ائتدیکلری درنک‌لرین باش ساغلیغینی شاعرین عائله‌سینه و مراسیم اشتراکچیلارینا چاتدیردیلار. بو مراسیمدن بیر نئچه شکیلی اوخوجولاریمیزا تقدیم ائدیریک. شکیللری چکن جناب حسین ریاضی‌دیر.

«تورک اوغلو»نون خاطیره مراسیمی:
تهران- بلوار آیت‌ا… کاشانی- بعد از تقاطع جنت‌آباد- مسجد نظام مافی
سه‌شنبه- ۸ تیر- ساعت ۱۷ الی ۱۸/۳۰

چاپ

3 پاسخ

  1. سلام عزیز دوستلار. سیزدن مخصوصا استاد حسن ایلدیریمدان ایستئیرم کی تورک اوغلی کیمین قیمتلی و بویوک شاعیریمیزیدن و بو رحمتلیک استاددان چوخ شعر نشر ائدین. بو بیر ملی مسئله دیر کی بو شاعیرلرین آدی و اثرلری یاییلا. ممنونام

  2. جانیم قارداشیم اقا شاهوردی من سوزدان ممنونام بو همزادپندارلیخ ایچینن عزیز قارداشیم تورک اوغلی هر یرده ده ابدی یوخوی گیده فکری روح وذره ذره جسمی اذربایجاندا اوچور
    تور
    ک اوغلی اذربایجاندی . و اذربایجان تورک اوغلی یاشار

  3. کئشگه اوستاد تورک اوغلونو اوز آنا یوردونون تورپاغیندا باسدیرایدیق آخی او ابدی اولاراق قوربتده قالدی …. و بو اولای آزربایجانیمیزا بیر نیسگیل دئییلمی سیزجه ؟

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

«تورک اوغلو» ابدی‌لیک سوسدو. شرفلی خاطیره‌سینه عشق اولسون!(بیانیه‌لر، خبرلر و شکیل‌لر)

ایشیق
www.ishiq.net

آذربایجان ادبیات و اینجه‌صنعت سایتی

«تورک اوغلو» ابدی‌لیک سوسدو. شرفلی خاطیره‌سینه عشق اولسون!(بیانیه‌لر، خبرلر و شکیل‌لر)

ایشیق
www.ishiq.net

آذربایجان ادبیات و اینجه‌صنعت سایتی

«تورک اوغلو» ابدی‌لیک سوسدو. شرفلی خاطیره‌سینه عشق اولسون!(بیانیه‌لر، خبرلر و شکیل‌لر)

ایشیق
www.ishiq.net

آذربایجان ادبیات و اینجه‌صنعت سایتی