«توفان» ابدی‌لیک سوسدو
لئیلانی بوراخ، جانینی قوربان ائله خلقه!
خلقین دیله‌گین سئومه‌ین اینسان اولا بیلمز
چوخ تاسفله، تبریزین مهربان و زحمتکش اوغلو، اؤز دولغون صمیمیتی‌له تبریز ادبی- اجتماعی محیطی‌نین حؤرمتینی قازانان شاعر «محمدحسین ملحی (توفان)» بهمن آیی‌نین ۱۲ینجی گونو تبریز شهرینده ابدی‌لیک سوسموش و بوگون وادی‌رحمت مزارلیغی‌نین “هنرمندلر” حصه‌سینده تورپاغا تاپشیریلمیشدیر.
اجتماعی مضمونلو شعرلر موللیفی کیمی تانینان، خصوصیله آلتمیشینجی ایللر تبریز ادبی محیطینده بؤیوک حؤرمته مالیک «محمدحسین ملحی (توفان)» بیر نئچه ایلدن بری اوزون سورن خسته‌لیکله ال‌به‌یاخا اولموشدور.
«توفان» ۱۳۰۹ گونش ایلی تبریزین عمو‌زین‌الدین محله‌سینده دونیایا گؤز آچمیش و بوتون عؤمرونو بو شهرده یاشامیشدیر.
شاعرین اثرلری‌نین بیر چوخو انقلابدان سونرا آذربایجان دیلینده یاییلان دؤرو مطبوعات، خصوصیله تبریزده اوستادشیدانین رهبرلیگیله یاییلان “فروغ آزادی” گونده‌لیگی‌نین “آذری‌صحیفه‌سی”نده چاپ ائدیلمیشدیر.
«ایشیق» – آذربایجان ادبیات و اینجه‌صنعت سایتی امکداشلاری آدیندان سئویملی شاعریمیزین ایتگیسینی آذربایجان ادبی اجتماعیاتینا، شاعرین حؤرمتلی عائیله‌سینه و دوست- تانیشلارینا باش ساغلیغی وئریر و خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۱۳ بهمن ۱۳۹۴
عشق عالمینه باخسان اگر اوردا یازیبلار:
جانین قورویان وارد مئیدان اولا بیلمز
عاشیق اونودار مالی، جانی سئوگی یولوندا
هر کیمسه‌ده عشق اولسا هراسان اولا بیلمز
عشق عالمی چوخ قورخولو عالمدی حقیقت
کیم قویسا قدم سانما اوره‌ک قان اولا بیلمز
مین‌لرجه بولاق بیربیرینه متّصل اولسا
دریاچه‌یه بنزه‌ر، ولی عمان اولا بیلمز
دوز عاشق اولانلاردان اگر امتحان آلساق
هئچ کیم آنا تک عشقده شایان اولا بیلمز
لئیلانی بوراخ جانینی قوربان ائله خلقه
خلقین دیله‌گین سئومه‌ین اینسان اولا بیلمز
مجنون دئمه‌یین عشقده تک اولدو جهاندا
هر عاشیق اولان عشقده «توفان» اولا بیلمز
محمدحسین ملحی (توفان)
***
شاعرین تورپاغا تاپشیرما مراسیمیندن شکیل‌لر
2 پاسخ
اولو تانری دان او بؤیوک اوستادا باغیش و سایین عاییله سینه دؤزوم دیله ییب آذربایجان میللتینه باش ساغلیغی وئریرم
آللاه رحمت ائلسین
ده یرلی شاعیریمیز اوستاد محمدحسین ملحی نین وفاتینی سیزلره وحورمتلی ملحی عائله لرینه تسلیت عرض ائدیرم . روحو شاد اولسون . درین حورمتله : مجید رضازاد عموزین الدینی ۱۴ بهمن ۱۳۹۴