اوستاد هاشیم ترلانین آنیم مراسیمی کئچیریلدی
بیر هفته اؤنجه ابدیته قوووشان خالقیمیزین ملی و مبارز شاعری اوستاد هاشیم ترلانین آنیم مراسیمی آذربایجان ادبی، مدنی و اجتماعی شخصیتلرینین چوخ ساییلی و گئنیش اشتراکی‌ایله بیرلیکده کئچیریلدی.
جوما گونو آبان آیی‌نین اوتوزو، تهران شهرینین امامزاده حسن محله‌سینده یئرلشن روزبهانی مچیدی بیر نئچه یوز آذربایجان ادبی، مدنی و اجتماعی شخصیت و فعاللارینین، عینی حالدا هاشم ترلانین عائیله عضولری و دوست تانیشلارینین اشتراکی‌ایله، یئتمیش ایلدن آرتیق آذربایجان ادبیاتینی چوخ شرفلی و صمیمیتله تمثیل ائده‌ن و لاییقینجه خالقین ملی و مبارز شاعری آدینی گئنیش کوتله و ادبی مدنی جمعیتیمیز آراسیندا قازانان اوستاد هاشیم ترلانین(هاشیم عمی‌نین) خاطیره‌سینی عزیزله‌دیلر.
مراسیمده هاشیم ترلانین ادبی و مدنی شخصیتی حقینده شعرلر اوخونوب و دانیشیقلار گئتمیشدیر. مراسیم تانینمیش آذربایجان یازیچی و ژورنالیستی دوکتور مرتضی مجدفرین اجراسی‌ایله باشلانمیش و اوستاد هاشیم ترلانین حیات و یارادیجیلیغی باره‌ده یازیلمیش مختلف مقاله‌لر و مونوگرافیالارین یازارلارینا او جومله‌دن: گنجعلی صباحی، دوکتور علی‌اکبر ترابی، احمد آلاو، یحیی شیدا، عزیز محسنی، دوکتور فیروز رفاهی، حسن ایلدیریم، علیرضا میانالی، آغداشلی، غلامرضا بوداغی، ائلدار موغانلی، صابر نبی‌اوغلو، قیلمان ایلکین، جاواد جاوادلی، آغاجاواد علیزاده، رافیق ایمرانی و … باشقالارینا، اشاره اولونموشدور. عینی حالدا، آپاریجی‌نین وورغولادیغینا گؤره اوستاد هاشیم ترلان گونئی آذربایجان ادبیاتیندا یگانه ادبی شخصیت‌دیر کی ادبی- مدنی جمعیتیمیز طرفیندن ۶۵ یاشیندان باشلایاراق هر بئش ایلدن بیر اونا یوبلئیی تدبیرلری کئچیریلمیشدیر.
مراسیمین داوامیندا آذربایجان میللی حؤکومتی دؤورونون شاعرلر مجلیسیندن قید حیاتدا اولان یگانه آذربایجان شاعری و اوستاد هاشیم ترلانین عؤمور بویو یاخین یولداشی، صابر ادبی انجومنی‌نین صدری اوستاد مظفر درفشی چیخیش ائتمیش، سونرا آذربایجان ادبی- مدنی درنکلرینین اوستاد هاشیم ترلانین ایتگیسی‌ایله باغلی یایدیغی بیاننامه‌سینی شاعر حسن ایلدیریم اشتراکچیلارا اوخوموشدور.
بو مراسیمده آذربایجان شاعر و یازیچیلاریندان صابر ادبی انجومنی‌نین اداره هیاتی عضوی حسین شهرک، یاشماق ادبی- بدیعی گروپونون نوماینده‌سی سعید موغانلی، صابر ادبی انجومنی‌نین عضوی رحیم کاویان، تبریز شاعر و یازیچیلاری‌نین بیر گروپو طرفیندن مجلیسده اشتراک ائده‌ن ذولفقار کمالی و تانینمیش آذربایجان صنعتکاری و اجتماعی شخصیتی بهروز چای‌اوغلودا چیخیش ائتمیش و اؤز اوره‌ک سؤزلرینی اوستاد هاشیم ترلانین شخصیتی و یارادیجیلیغی باره‌ده اشتراکچیلارا چاتدیرمیشدیر.
آذربایجان ادبی- مدنی درنکلرینین اوستاد هاشیم ترلانین ایتگیسی‌ایله باغلی بو مراسیمده اوخونان بیاننامه‌سینی عزیز اوخوجولاریمیزا تقدیم ائدیریک.
دونیا سندن کیملر کئچدی!
آذربایجان ادبی- مدنی درنکلرینین اوستاد “هاشیم ترلان”ین ایتگیسی‌ایله باغلی بیاننامه‌سی
باشین ساغ اولسون آذربایجان!
آذربایجانین گؤرکملی شاعری، ادبی- مدنی اوجاقلارمیزین قوجامان و پارلاق سیماسی، “شاعرلر مجلسی”نین نیشانه‌سی، معاصر شعریمیزین آغ ساققالی اوستاد هاشیم ترلان ابدی اولاراق دونیایا گؤز یومدو.
اوستاد هاشیم ترلان، آذربایجانین بؤیوک شاعری صمد ورغونون خئیر دوعاسی ایله شعر دونیاسینا قدم قویدو و ۸۰ ایله یاخین آنادیللی شعرمیزین سئویملی سیماسی کیمی قلم چالدی؛ خالقمیزین ائنیشلی-یوخوشلو تاریخینده، آغلی-قارالی گونلری یاشادی؛ آنجاق توتدوغو شرفلی یولوندان گئری دؤنمه‌دی. شاهلیق اصول-اداره‌سی‌نین قانلی– قادالی گونلرینده بئله وطن سسلی، آزادلیق هوسلی شعرلری ایله، آذربایجانین، ایرانین آزادلیق و عدالت نغمه‌لرینی اؤتدو. شعرمیزین، ادبیاتمیزین، مدنیتمیزین یوکسلیشی و چیچکلنمه‌سی اوغروندا عؤمرونو وئردی؛ دوستاقلاردا بئله اومیدینی، اینامینی ایتیرمه‌دی.
اوستاد ترلان، تکجه ادبی یارادیجیلیقلا دئییل، عینی حالدا ادبی- مدنی اوجاقلارمیزین قورولماسیندا، ادبی محفل‌لرین یارانماسیندادا یاخیندان اشتراک ائتمیشدیر. “شاعرلر مجلسی”، “دوستلار گؤروشو” و انقلابدان سونرا “آذربایجان انجومنی”، “آذربایجان یازیچیلار و شاعرلر جمعیتی” و بوگون ادبیات ساحه‌سینده فعالیت گؤسترن “صابر” و “ساهر” ادبی درنکلرینین ایلک قوروجولاریندان و چالیشقان عضولریندن اولموشدور. او بونلارلا کفایتلنمه‌میش، مطبوعات ساحه‌سینده‌ده یورولمادان چالیشمیشدیر. هله ایلک شعرلری “وطن‌یولوندا”، “آذربایجان”، “یئنی‌شرق” و باشقا مطبوعات صحیفه‌لرینده چاپ اولارکن، اونلارین بیر چوخوایله یاخیندان امکداشلیق ائتمیشدیر؛ “بشیر‌آینده”، “بشریت” روزنامه‌لرینین اداره‌سینده فعالیت گؤسترمیشدیر. انقلابدان سونرا بیر چوخ مجله و روزنامه‌لرله یاخین امکداشلیق ائتمیش؛ “یولداش”، “گونش” و “آذری” مجلهلرینین یازیچیلار هئیتی‌نین عضوو اولموشدور.
اوستاد ترلان مدنیتمیزین، ادبیاتمیزین، بیر سؤزله ملی وارلیغمیزین یوکسلیشی اوغروندا قورولان قورولتایلاردا، ییغینجاقلاردا، ملی شنلیکلرمیزده، آغیرلاما، آنما مراسیملرینده آچیق اوره‌کله بیر آغ ساققال کیمی چیخیش ائتمیشدیر.
اوستاد ترلانین شعرلری سانکی دؤورونون آیناسی‌دیر. اؤلکه‌میزده، دونیادا باش وئره‌ن حادثه‌لر اونون اثرلرینده اؤز عکسینی تاپمیشدیر. دونیا خالقلارینین آزادلیق و عدالت اوغروندا مبارزه‌سی وطنمیزین اجتماعی حیاتی، مقدراتی اونون یارادیجیلیغینین باش موضوعلارینداندیر.
دونیا سویقونچولارینین تحریکی ایله وطنمیزه هجوم ائده‌ن صدام رژیمی و بونون آردیندا تؤره‌نن فاجعه‌لری، قهرمانلیقلاری او شعرلرینده ترنم ائتدی. خوزستان چؤللری، خورمالیقلاری، ایگیدلرمیزین دؤیوشو، ایرانین قورونماسی اوستاد ترلانین شعرلرینین آلوولو دیلی ایله افاده ائدیلمیشدیر.
اوستاد ترلانین اوزون یارادیجیلیق ایللرینده خالقمیزا میراث قویوب گئتمیش شعرلری، پوئمالاری، خاطره‌لری، ادبیاتمیزین دیرلی اثرلریندندیر. او جمله‌دن: “آلوولو شعرلر”، “دورنالار قاییداندا”، وطندن وطنه”، “یولچو یولوندا گره‌ک”، “ذیروه‌ده گونش” و … ، “گوموشو پئنجک” (آجیلی، شیرینلی خاطره‌لر) و ….
اوستاد ترلان ادبی اجتماعیاتمیز طرفیندن لایقینجه عزیزلنمیشدیر؛ اونون ۶۵ ایل‌لیگی تبریزده،۷۰، ۷۵، ۸۰ و ۸۵ ایل‌لیگی تهراندا و باکی‌دا طنطنه‌لی صورتده قید اولونموشدور. نه یازیق کی ۹۰ ایل‌لیگی مختلف سبب‌لره گوره باش توتمادی.
دیرلی شاعرمیزین ایتگیسی خالقمیز و ادبیاتمیز اوچون آغیر اولسادا، آنجاق اینانیریق کی اوندان یادگار قالان اثرلر اوزون ایللر یاشایاجاقدیر. بیز گؤرکملی شاعرین قلمداشلاری و دوستلاری، اوستادین اؤلومو ساری‌دان، وطنمیزین ادبیاتچیلارینا، آذربایجان خالقینا، اونون حؤرمتلی عائله‌سینه، ادبی-مدنی درنک‌لره باشینیز ساغ اولسون!، خاطیره‌نه عشق اولسون اوستاد ترلان! دئییریک.
- صابر ادبی انجومنی
- ساهر ادبی مدنی درنه‌یی
- ایشیق ادبیات و اینجه‌صنعت سایتی
- یاشماق ادبی-بدیعی گروپو
- ائل بیلیمی موسسه‌سی
- گونئی مدنیت اوجاغی
- نباتی ادبی انجومنی
- شیدا ادبی انجومنی
- قاراداغ ادبی انجومنی
- ارسباران انجومنی
- ماکولو‌لار انجومنی
- مارال ادبی انجومنی
- آذربایجان انجومنی کرج
- دده قوربانی انجومنی
- فرزانه نشریاتی
- خدا آفرین، سارای، وارلیق، آذری مجلهلرینین یازیچیلاری هئیتی.
- آذربایجانین بیر سیرا ادبی- اجتماعی شخصیتلری
۳۰ آبان ۱۳۹۳
یک پاسخ
چوخ تاسف له آتا و آنامین مریض لیینه گورا گله بیلمدیم.آلله سیزی ساخلاسین کی سیزین سایتزنان خبرلری بیلیرم
شادلیخ لار دا گورگ