ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

o-henry
عرب گئجه لري
او. هنري – چئويرن: مجید امين مؤيد

amin muayyed

کارسن‌چالمئرزين آپارتمانيندا، فيليپ آخشام چاغي پوچت مکتوبلارين اونا گتيردي. عادي مکتوبلاردان علاوه ايکي پاکت‌ده وار ايدي کي، تمبرلري عینی ايدي. پاکت‎لرين بيريسينده بير قادين شکلي وار ايدي و او‎ بيريسي بير اوزون- اوزادي ‎مکتوب ايدي کي، چالمئرزي اوزون مدت اؤزوٍنه جذب ائتميشدي. مکتوب بير باشقا قادين طرفيندن ايدي کي، زهرلي نيش‎لري شيرين بال ايله بولاميش و کينايه‎لر اوخو ايله بزه‎ميشدي. بونلارين هاميسي ‎شکلی گؤندريلميش قادين حاققـيندا ايدي.

چالمئرز مکتوبو تيکه-تيکه دوغرادي و باهالي خالچانـين اوٍزه‎رينده يـئـيين دالا- قاباغا  يـئريمک‎له اونو کؤهنلتمه‎يه باشلادي. اونون حرکاتي بير مئشه حیوانـي‌نین قفس‎ده چابالاماسینا اوخشاییردی.

ياواش- ياواش عصبي حالـينا غالب گلدي. خالچا سلیمان خالچاسي دئـييل ايدي کي, اوٍچ مين مايل اوزونلوغو اولا؛ چالمئرز آنجاق اون آلتـي فوت بويوندا يول گئده بيلردي. فيليپ گؤروٍندوٍ. او، هئچ واخت اوتاغا گيرميردي. جين کيمي هر يـئرده حاضر ايدي.

–          جناب، بوردا شام يـئـييرسينيز يا ائشيکده؟ او‎ سوروشدو.

چالمئرز دئدي:

–          بوردا، ياريم ساعآتدان سونرا.

او ‎اوٍره‎يي توتغون حالدا ژانويه‎نين پارتلايـيشلارينا قولاق آسيردي، بوش و‎ خلوت خیاوان اونون نظرينده ترومبونا بنزه‎ييردي.

–          دايان!

او گؤزدن ايتن جينيندن سوروشدو:

–          من ائوه گلنده مئـيدانـين آخـيريندا چوخلو آدام گؤردوٍم رديف ايله دايانميش ايديلر. بيريسي ده بير شئـيين اوٍستوٍنه چـيخميش ايدي و‎ دانـيشـيردي. اونلار نه اوٍچوٍن رديف ايله دايانميش ايديلر، نه اوٍچوٍن اورادا؟

اونلار «ائو- ائشيکسيز»لرديلر. فيليپ دئدي. صانديغـين اوٍستوٍنه چـيخان کيمسه چالـيشـيردي کي، اونلارا گئجه اوٍچوٍن منزيل الده ائتسین. جاماعآت اونلارين دؤوره‎سينه يـيغـيشـيب، قولاق آسيب و پول وئريرلر و ‎سونرا او امکان قده‎ر اوتاق اجاره‎يه وئرنلره پول گؤنده‌رير. اونا گؤره ده جاماعآت صفده دايانـيرلار، ‎نؤوبت ايله ياتاقخانايا گؤندريله‎ بيلسينلر.

چالمئرز سؤيله‎دي:

–          شام وئره‎نه کيمي اونلارين بيريسیني بورايا گتير, منیمله شام يـئسين.

فيليپ قوللوق ائتدييي زاماندان بري بيرينجي دفه اولاراق تته- پته‎يه دوٍشدوٍ:

–          ها…نسي….

–          بير نفر، کيمسه اولورسا اولسون، آنجاق اوٍست- اوٍسته ملايم آدام اولسون، و‎ بير آز تميزليک ده اونون ضررينه اولماز؛ همن.

کارسن‌چالمئرز اوٍچوٍن خليفه رولو اويناماق عادي بير ايش دئـييلدي. لاكن بو گئجه او حيسّ ائديردي كي, معمولي درمانلار اونون سئوداسينا و ‎پوزغونلوغونا كفايت ائـتمه‎يه‎جک. بير شئـي, عرب جينسيندن اولان بير شئي اونا گركدير كي, حال- هاواسينـي يوٍنگوٍللتسین‎.

ياريم ساعات عرضينده فيليپ بير «چـراغ جادو» قولو كيمي وظيفه‎لريني يئرينه يئتيردي. آشاغـيداكي رستورانـين ايشچي‎لري لذّتلي خوره‌گي يوخارييا گتيرميشديلر. شام ميزي ايكي نفر اوٍچوٍن دؤشنميش و ‎قـيرميزي شام‎لارين ايشـيغـي ايله شن‎ليكله بزنميشدي. و ايندي فيليپ ائله بيل كي, كئشيشه يول گؤسترن يا بير حرامي‎ گوزتچيسي‎دير. قوناغـي اسه- اسه اوتاغا داخيل ائتدي. اونو ياتاق يـئري آختارانلارين صفيندن سئچميش ايدي. عادتن بو ساياق آداملار سينـيق گمي‌ديرلر، بوردا مقايسه جاييزسه، بير سينـيق گمي كي, اود واسيطه‎سيله باغـيرير, بلكه ده بير تـئز سؤنن يانغـي كي, دريادا غرق اولموش گميني ايشـيقلانديریر.

الي-اوٍزوٍ تزه يويولموشدو, سانكي فيليپ قوربانلـيق مراسيمي برپا ائديب. قوناق آياق اوٍسته دايانميش ايدي و‎ شام ايشـيغـيندا او ائوين زنگين اثاثيه‎سينه بير عـيب كيمي گؤروٍنوٍردو. اوٍزوٍنوٍن رنگي خسته‎لر كيمي آغارميشدي, ساققالی و ايرلند مهاجرلري‎نين بوركوٍ تقريبن گؤزلرينه قده‌ر کؤلگه سالميش ايدي. فيليپين داراغـي اونون آچـيق قهوه‎يي ساچلارين نيظاما سالا بيلمه‎ميش و‎ اوزون ساچلار كؤهنه بوركوٍن دؤوره‎سينه قـيوريلـيب، ياپيشميش ايدي. گؤزلريندن اوٍميدسيزليک, اعتناسيزلـيق و حيله‎بازليق ياغـيردي, نئجه كي, او بير بوجاغا سيغـينـيب, سينسيين ايتلره اوخشايـيردي. چوٍروٍموٍش و داغـيلميش كوتو يوخارييا قده‎ر دوٍيمه‎لي ايدي, لاكن اونون اوٍستوٍنده بير سانتا قده‎ر آيريجا ياخا گؤزه دييردي.

چالمئرز صندل‎دن قالخـيب شام ميزينه ساري گئدنده قوناق راحاتليق حيس‎ائديردي.

–          لوٍطف ائديب شاما منيمله آياق اولسانـيز, خوشحال اولارام. – قوناقچي دئدي.

قوناق قورو و  ايتي ‎لحن ايله سؤيله‎دي:

–          من پالمئرم, اگر منيم كيمي سيز ده, سيزينله هم‌سوٍفره اولان آدامي تانيماق ايسترسينيز.

چالمئرز تله‎سه‎- تله‎سه داوام ائتدي:

–          ايسته‎ييرديم دئـييم كي, منيم آديم چالمئرزدير. اوٍزبه‎اوٍز ايله‎شيرسيزمي؟

پالمئر ديزيني فيليپه ساري ‎ايدي كي, صندلي اونون آلتـينا سوٍروٍتسوٍن. سانكي كئچميشلرده بئله بير ميزلرين باشـيندا ايله‎شميش ايدي. فيليپ «کولي» بالـيق‎لاري و زيتون‎لاري اونا ساري چكدي.

پالمئر گوٍمبوٍلده‎دي:

–          ياخشـي! يـئمگه باشلاياق, بئله دئـييل؟ چوخ ياخشـي, منيم خوشبخت بغداد اميريم. من سنين شهرزادين. سن بيرينجي خليفه‎سن, اؤز عطري و ‎رنگي ايله لاپ اصيل شرقلي رنگ كي, يازيقلـيق زامانـيندان منه راست گليبدير. عجب خوشبخت‎ليك! من صفده قـيرخ اوٍچوٍنجوٍ نفر ايديم كي, سنين گيزلي «خوش گلدين مأمورونوز» يـئتيشدي كي, مني قوناق چاغـيرا. من بو گئجه اوٍچوٍن يورغان – دؤشک تاپماقدا؛ گله‎جك سئچگي‎لرده جمهور رييسي اولا بيله‎جه‎ييم قده‌ر شانسيم وار ايدي. اي هارون‎الرشيد منيم باشـيمين قضو- قده‎رين نه جوٍره آلـيرسينيز, هر فصلين بير بوشقاب خوره‌يه, ياخود بوٍتوٍن فصيل‎لرين سيگار و‎ قهوه ايله معامله ائتسک نئجه‎دي؟

–          ائله بيل كي بو وضعيتين سن اوٍچوٍن هئچ يـئنيليگي يوخدور.- چالمئرز گوٍلوٍمسه‎يرك دئدي.

قوناق جاواب وئردي:

–          يوخ! «نيويورك» اوجوز و آتـيلمـيش هارون‎لارلا دولودور. نئجه كي, بغداد حشرات ايله دولودور. ايييرمي دفه «نيويورك»‎دا ناغـيل‎لاريما گؤره باشـيمي چوخلو خوره‎كله نيشان آلـيب، گئديبلر. «نيويورك»‎دا بيريني تاپ كي, موٍفته- مجّاني سنه بير زاد وئرسين. اونلارين چوخو آدامي قارا پولا ساتارلار و‎ بير آز عده‎سي خليفه نقشي اوينايـيب, باشـينـين اوٍستوٍنده دايانـيب شرح-ي حالـيوي اؤزوٍندن چـيخاريب تذكره‎لر, ضميمه‎لر و‎ کيمسه‎يه معلوم اولمايان جزئیات ايله يازيرلار. جناب من بيلميرم كي, خوره‎کلر منه ساري‎ بغداد يولو ايله گلنده نه ائده‌م. بير شام يـئمك اوٍچوٍن حاضر اولورام باشـيمي‎ اوٍچ دفه آسفالتا چالام و ‎اؤز ناغـيلـيمي سؤيله‎يم…

–          من سنين باشـينا گلن قضو- قده‎ر و حادثه‎لري سورمورام- چالمئرز دئدي. دوٍزگوٍن و ‎آچـيقجاسينا دئـييرم كي, بيردن بيره كؤنلوٍمدن كئچدي كي, گؤنده‌رم بير ياد آدام گتيرسين منیمله شام يـئمه‎يه. يقين ائت كي, من هئچ بير آرتـيق سورغو- سواللا سني ناراحات ائتمه‎يه‎جه‎يم.

–          اوه- ائوسيز قوناق اوجا سسله دئدي, و چوخ هوسله سوپ ايچمه‎يه مشغول اولدو و ‎داوام وئردي:

–          منیم اوٍچوٍن اؤنملی دئـييل, من بير قـيزميزي جيلدلي مرتّب شرق مجلّه‎سي‎يم كي, خليفه ائشيكده قدم ووردوقجا واراقلاريمدان كسيب گؤتوٍروٍر. دوغروسو, بيز ياتاق يـئري تاپماق صفلرينده بئله بير مطلب‎لر حاققـيندا واحد قیمت‌لره يـئتيشميريك. گؤروٍرسن كي, هميشه بيريسي دايانـيب و‎ ايسته‎يير بيلسين كي, هانسي‎ عامل دوٍنيادا بيزي بو حالا سالـيبدي. بير دنه ساندويچ و بير ليوان آبجو اوٍچوٍن دئـيه‎رم كي, ايچگي مني بو گوٍنه سالميش. قوورولموش ات و‎ يـئركؤكوٍ و ‎بير فينجان قهوه اولورسا دئـيه‎رم كي, قلبي داش ماليك و‎ يا آلتـي آي خسته‎خانادا ياتماق… و‎ ايشيمي اليمدن وئرمك. و آمما بود اتي و ‎ياتاق يـئري اوٍچوٍن وال‌استريت فاجيعه باعث اولار كي, مالـيمي ‎الدن وئريب و ‎آستا- آستا يوخاريدان آشاغـي‎يا گلم. ايندي بيرينجي دفه‎دير كي, بو ساياق توپوق وورورام. بو ايشه ناغـيل حاضرلاماميشديم. جناب چالمئرز! سيزه دئـييم كي, ايسته‎ييرم سيزه حقيقتي سؤيله‎يم, اگر حاضرسيز ائشيده‎سينيز. اينانماغـي سيز اوٍچوٍن يالان ناغـيللاردان داها چتين اولا بيلر.

بير ساعات سونرا عرب قوناق راضيلـيق آهي ‎ايله دالا چكيلدي, عینی زاماندا فيليپ قهوه و سيگار گتيريب ميزي تميزله‎دي.

–          ژرارد پالمئر آدي قولاغـينـيزا دييب؟ – قوناق غريبه تبسوٍمله سوروشدو.

–          بو آد ياديما گلير- چالمئرز دئدي. فيكر ائديرم كي, نئچه ايل بوندان قاباق شهرتلي بير رسّام ايدي.

–          بئش ايل- قوناق تأييد ائتدي. سونرا بير تيكه قورقوشون كيمي آتـيلديم, اونودولدوم, من ژرارد پالمئرم! آخـيرينجي تابلومو ايكي مين دولارا آلديلار. اوندان سونرا شكليني مجّاني چكه‎بيله‌جه‌ییم بير مودئل, تاپا بيلمه‎ميشديم.

–          نه اوٍچوٍن, نه اولموشدور؟- چالمئرز سوآل وئرمه‎يين قاباغـينـي آلا بيلمه‎دي.

پالمئر داريخميش حالدا جاواب وئردي:

–          گوٍلمه‎لي‎دير, من ياخشـي باشا دوٍشمه‎ديم. بير زامان جاماعآتلا اولارديم و ‎اوٍزگوٍنچوٍ ‎كيمي اوٍزه‎رديم. ساغدان- سولدان سيفاريش آلارديم. روزنامه‎لر مني بير قاباقجيل رسّام آدلانديرارديلار. سونرا او گوٍلمه‎لي و ‎غريبه اتّفاقلار اوٍز وئردي. تابلونو باشا چاتديران کيمي خالق اونو گؤرمه‎يه گليرديلر و باخـيرديلار و حئـيرتله بير- بيرلرينه گؤز تيكيرديلر. چوخ زامان كئچمه‎ميشدي كي, موٍشكوٍلوٍ تاپديم. خارقه اولاراق من مودئل و ‎اورژينالـين گيزلي خصلت‎لريني اوٍزه چـيخارديب، گؤستريرديم. بيلميرم بو ايشي نئجه ائـيله‎يه بيليرديم- من گؤردوٍيوٍموٍ رسم ائديرديم. لاكين بيليرم كي, او مني ايته‎له‎ييردي. مودئل‎لريم وحشتله عصبي‎لشيب تابلولاريمي قبول ائتمه‎ييرديلر. بير گؤزل و معروف اجتماعي خانـيمين تصويرين چكديم. قورتاراندان سونرا اري مخصوص حالتله شكيله تاماشا ائتدي و‎ بير هفته‎دن سونرا اونو بوشاماق اوٍچوٍن قانوني اقداما ال ووردو. ياديما گلير كي, بير معتبر بانك صاحيبي منه مودئل اولدو. اونون تصويريني اعمالاتخانادا تاماشايا قويان زامان, تانـيشلاريندان بيريسي تابلونو گؤرمه‎يه گلدي. او دئدي:

–          دوغرودان بو اونا بنزه‎يير؟

دئديم كي, كاميل بنزه‎ييش‎له چكيليبدير. من اونون گؤزلرينده بو حالته هئچ دقت ائتمه‎ميشديم- دئدي:

–          فيكيرلشيرم كي, وضعيت خارابدير و حسابي باغلامالـييام.

–          او‎ موفلیس دوشدو, بانك حسابي اليندن گئتدي, بانك صاحيبي ايله برابر چوخ چكمه‎دي كي, ايشسيز قالديم. جاماعات سئوميرلر كي, اونلارين گيزلي آلچاقلـيق‎لاري تصويرده گؤروٍنسوٍن. اونلار گوٍلوٍمسه‎ييب و چؤهره‎لرين دييشديره بيله‎ر‎ک سني آلدادا بيلرلر, لاكين شكيلده يوخ. من باشقا شكيل چكه بيلمه‎ديم و ‎مجبور قاليب ايشيمدن ال چكديم. بير مدت روزنامه ايشچيسي كيمي و بير زامان دا ليتوگرافيست كيمي ايشله‎ديم. آمما عینی دردسرلر تيکرار اولدو. من بير شكيلدن نقّاش‎لـيق ائتديكده بير خيصلتلر گؤستريرديم كي, شكيلده يوخ ايدي. آمما منجه اصلينده وار ايميش. موٍشتريلر آجيقلانـيب قالماقال ائديرديلر, خصوصيله قادينلار. و من داها داوام ائده‌ن بير ايش تاپا بيلمه‎ديم و‎ چوخ چكمه‎دي كي, مجّاني ‎ياتاق يـئري صفلرينه قوشولدوم و شيفاهي ناغـيل‎لار دئمه‎يه باشلاديم. اونلاري چؤره‌ك بازارلاريندا قوراشديريرديم. ايندي سن اي خليفه, اگر منيم دوٍزگوٍن سؤزلريم سيزي يورورسا, اجازه وئرين وال‎استريت بدبخت‎ليگينه قايـيديم. لاكين بو ايشه گؤز ياشـي‎ گركدير كي, او ياخشـي ‎و لذيذ شامدان سونرا ايسته‎ميرم تله‎سيك اونو شرح وئره‌م.

–          يوخ! يوخ! – چالمئرز صداقتله دئدي. سندن چوخ خوشوم گلير. سنين بوٍتوٍن ‎تابلولارين بير پارا خوشا گلمه‎ين علامتلر گؤسترير و‎ يا بير پارا شكيل‎لرين واردير كي, سنين مخصوص نيشانـين‎لا عيبلي اولمورلار؟

–          بير پارا؟- پالمئرز دئدي, اوشاقلارين هاميسي عموميتله و قادينلارين بير چوخو و كفايت قده‎ر ده كيشي‎لردن. هامي كي, پيس دئـييل, اونلار كي, ياخشـي‎ديلار شكيل‎لري ياخشـي اولور. دئديييم كيمي, ايضاح ائده بيلميرم لاكن واقـعيتي سؤيله‎ييرم.

خارجي پوچت وسيله‎سيله گلن شكيل چالمئرزين يازي ‎ماساسي‎نـين اوٍستوٍنده ايدي. اون دقيقه‎دن سونرا او ‎پالمئرزي موٍظّف ائتدي كي شكيلدن بير پاستـئل طرح چكسين. بير ساعات سونرا صنعتكار قالخدي و يورغون بير حالدا تصويري اونا وئريب و اسنه‎يه- اسنه‎يه دئدي:

–          قورتاردي, باغـيشلايـين كي, چوخ واختـيزي آلديم ارباب. من ايشيمي علاقه ايله قورتارديم, لاكن يورغونام. دوٍنن گئجه ياتماغا يـئريم يوخ ايدي. گوٍمان ائديرم كي, ايندي «گئجه‎نيز خئـيره قالسين» واختـي‎دير.

چالمئرز قاپييا كيمي اونونلا گئديب و بير قده‎ر اسكيناس اووجونا قويدو. پالمئرز دئدي:

–          قبول ائديرم, يوخاريدان آشاغـييا گلمه‎يين‎ بونلاري دا وار. تشكّوٍر ائديرم, خصوصيله چوخ ياخشـي ‎شامينـيز اوٍچوٍن. بو گئجه توٍك يورقان- دؤشك‎ده ياتـيب بغداد گئجه‎لرينين يوخوسون گوره‎جه‎يم. کاشکي سحره چاتاندا بو يوخو و رؤيا اولماسين. گئجه‎نيز خئـيره قالسين عاليجناب خليفه!

چالمئرز يـئنه‌ده خالچانـين اوٍزه‎رينده قرارسيزجا قدم ووروردو. ايكي- اوٍچ دفه چالـيشدي كي, تابلويا ساري‎ ياخـينلاشسين, آمما باجارمادي. او خـينايي, قـيرميزي, قـيزيل و ماوي رنگلري گؤروٍردوٍ، لاكن طرح ايله اونون  آراسيندا قورخودان بير ديوار اوجالميشدي. ايلشدي و‎ چالـيشدي كي اؤزوٍنوٍ آرام ائتسين. بيردن قالخدي و ‎فيليپه زنگ ائله‎دي و‎ دئدي:

–          بو بينادا بير گنج صنعتکار وار راينمن آدلـي, اونون آپارتماني‎ هانسي‎دير؟

–          قارشيدا کي بينانـين بيرينجي مرتبه‎سينده‎ دير آغا, – فيليپ دئدي.

–          گئت اوندان خاهيش ائت كي, بير نئچه دقيقه لوٍطف ائـيله‎ييب بورايا گلسين.



–          جناب راينمن, بير كيچيك پاستـئل طرح او ميزين اوٍستوٍنده وار. خاهيش ائديرم, اونون بديعي گوزه‎لليگي باره‎ده فيکرينيزي بيزيم  اوچوٍن سؤيله‎يين. خوشحال اولاريق.

جاوان صنعتكار ميزه قارشـي ايره‎لي گئده‎رك طرحي گؤتوٍردوٍ. چالمئرز ياريجا گئري چكيليب بير صندلين دالـيسينا داياندي.

–          نئجه‎دير؟ – سوروشدو ياواشجا.

صنعتکار سؤيله‎دي:

–          بير رسّاملـيق اثري كيمي نظره آلساق من اونو تحسين ائتمكده عاجيزله‎ييرم, چوٍنكي بير اوستاد اثري‎دير: ظريف, جسارتلي, دوٍزگوٍن. آمما مني بير بالاجا تعجّوٍبه سالـير. من بو سون نئچه ايل عرضينده پاستـئل طرحي گؤرمه‎ميشديم.

–          صورت, انسان, اصالت, بونلارا گؤره نه دئـيه بيلرسن؟

راينمن دئدي:

–          صورت, تانري‎نـين ملك‎لرينين بيري‎سينين صورتي‎دير. سوروشا بيلرم كي هانسي‎دير…؟

چالمئرز اوجا سسله دئدي:

–          حيات يولداشـيم.

ودالاشـيب گيجلميش رسّامين دؤوره‎سينه فـيرلانـيب و اونون كوٍره‎يينه ال ووراراق ادامه وئردي:

–          او آوروپا سفرينده‌دير اوغول: او طرحي گؤتوٍر و عؤمروٍنوٍن ان گؤزه‌ل ايشيني رسم ائت, خرجي منيم بوينوما.

توضیح:

اُ. هنری (به انگلیسی: O. Henry)‏ نام مستعار نویسندهٔ آمریکایی ویلیام سیدنی پورتر ‎(به انگلیسی: William Sydney Porter)‏‏ (۱۱ سپتامبر ۱۸۶۲ – ۵ ژوئن ۱۹۱۰) است. داستان‌های کوتاه اُ.هنری به دلیل لطافت طبع، بازی با لغات، شخصیت‌پردازی شورانگیز و پایان هوشمندانه و غافلگیرانه معروف هستند. این نویسنده در طول عمر خود بیش از ۴۰۰ داستان کوتاه نوشت. امروزه جایزه‌ای نیز به نام او وجود دارد. نخستین مجموعه داستان‌های کوتاه او. هنری مجموعه «چهار میلیون» با نام اصلی «The Four Million» در ۱۸۹۹ منتشر شد. وی در ادبیات آمریکا نوعی از داستان کوتاه را به وجود آورد که در آنها گره‌ها و دسیسه‌ها در پایان داستان به طرزی غافلگیرانه و غیرمنتظر گشوده می‌شود. داستان‌های این نویسندهٔ آمریکایی معمولاً حول چهار محور زندگی شهری بویژه نیویورک، عشق و روابط عاشقانه، زندگی در غرب در مایهٔ وسترن و طنز می‌چرخد.

منبع توضیح: ویکی پدیا- دانشنامه آزاد

یک پاسخ

  1. سلاملار چوخ گوزل و ده یرلی چئوریشدیر فایدالاندیم
    استاد موئد دن تشکررلریمی بیلدیریرم
    ساغ اولون

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *