آذربایجان روزنامه‌سی و اونون باش مدیری
مجید امین مؤید
ایضاح: اوتوزینجی اون ایل‌لیک‌ین اول‌لرینده چوغ آغیر و گیزلی بیر شرایطده “آذربایجان” روزنامه‌سینین یئنی نشر دؤرو باشلاییر. چوخ تاسفله بو ایشین گئدیشاتی و نئجه اولماسی حقده، اونون نشرینده اشتراک ائدنلرین بیر تعدادینین قید حیاتدا اولماغینا رغما، هله ده گئنیش معلومات الده یوخدور. ۱۴۲ نومره‌ده نشر اولونان بو روزنامه‌دن یالنیز بیر نومره الده‌دیر. چوخ تاسفله بیر جمعین زحمتی سایه‌سینده گؤرولن بو دیرلی ایشه انقلابدان سونرادا آچیقلیق گتیریلمه‌ییبدیر. “آذربایجان” روزنامه‌سینین ایکینجی تحریریه هیاتینین ترکیبینده اولان اوستاد مجید امین مؤید بیر نئچه ایل اول اوستاد بهزادینین آغیرلاما مراسیمینده بو باره‌ده کیچیک بیر ایضاح وئرمیشدیر کی آشاغیدا اوخوجولارا تقدیم ائدیریک. بو امیدله کی قید اولونان موضوعدا معلوماتلاری اولان شخصلر مطبوعات تاریخیمیزین بو حصه‌سینه ایشیق سالسینلار.
×××
بوتون ایران خالق‌لاری امپریالیزم خصوصی ایله انگلیس امپریالیزمی و نفت شرکتی علیهینه ووروشان زامان‌لار آزادلیق سئور مطبوعات ایران‌دا بو موباریزه‌نین قاباقجیل نور ساچان چیراقلاری اولموشدور. آذربایجان قزئتی‌ده تقریبن ۱۳۳۰دان ۱۳۳۴ده‌دک، بو صف‌ده باش اوجالیق‌لا یئرلشیب و تاریخی رول اویناییب‌دیر.
آذربایجان روزنامه‌سی باشقا قزئت‌لرله بیرلیک‌ده خلقیمیزه هر هفته‌نین ان مهم مسئله‌لری حقینده گؤستریش وئریب، زحمتکش‌لرین حقوقوندان دفاع ائله‌ییب، کندلی‌لردن خانلار و ارباب‌لار قارشیسیندا دفاع ائده‌رک، ضد امیریالیستی جبهه‌ده باریشماز موباریزه آپاریردی.
بیلیرسیز کی، او ایل‌لر بیر طرف‌دن انگلیس و ها بئله آمریکا سلطه‌چی‌لری علیهینه کسگین موباریزه دؤورو ایدی و خالق‌لاریمیز ایراده‌سی‌ایله نفت میللی اولموش و توطئه‌لر ایران‌لی‌لاری تهدید ائدیردی و هر حال‌دا نفتین میللی‌لشمه‌سی ایران خالق‌لاری‌نین بؤیوک آرزوسو اولاراق، بیزیم بو قزئت‌ده بو اومید و آرزولارلا ایره‌لی‌له‌ییردی و خالقین شادلیق‌لارین عکس ائدیردی.
۲۸ مرداد آمریکا- انگلیس کودتاسیندان سونرادا دوشمن‌لرین هجوم دؤورو و شاهین آرتیق قولدورلوق زامانی اولوب. اون‌مین‌لر شریف اینسانلار دوستاقلارا و تبعیدلره معروض قالیب و یوزلر بؤیوک اینسانلار اعدام اولوندولار و یئنه‌ده روزنامه‌میز بو دؤورده خالق ایله همدرد ایدی و چالیشیردی کی، اونلارا اوره‌‌ک وئریب و قارانلیق زمانه‌نین کئچری اولماسین یادا سالسین.
آذربایجان قزئتی هفته‌لیک نشریه ایدی و بوسبوتون آنا دیلینده یازیلاراق، خالق ایچریسینده یاییلیردی.
روزنامه‌نین باش مدیری «بهزاد بهزادی» اولموشدور و باش مقاله‌لرین چوخو اونون قلمی ایله یازیلیب‌دیر. بو مقاله‌لر اساس و گون مسئله‌لره جاواب وئریردی.
اوستاد بهزادینین نقشی ساده‌جه مدیرلیک دئییل‌دی. او سیاسی باخیم‌دان اوستون و قدرتلی بیر شخصیت و بیر دیل اوستادی کیمی روزنامه‌نی اداره ائدیردی. بهزادی ادبیات سئور و ذووق‌لو بیر ضیالی اولدوقدا، اوستاد شهریارین «حیدربابایه سلام» اثرینه ایلک دفه درین معنالی و آراشدیریجی تحلیل و نقد یازمیش و روزنامه‌نین نئچه نومره‌سینده چاپ اولونوب و روشنفکر جاوانلاری بو بؤیوک اثرله آشنا ائتمیش‌دیر. او تحلیل یازیلاندا «حیدر بابا‌یه سلام» چاپ اولماقدا ایدی و دئمک لازیم دئییل کی، او قارانلیق گون‌لرده بو اثر و تحلیل آنا دیلیمیزی قوروماقدا بیزه چوخلو کؤمک اولموشدور و اثرین سرعت‌له خلق ایچریسینده یئر آچماسینا یاردیم ائتمیش‌دی.
روزنامه‌نین یازیچیلار هئیتی وار ایدی و یادلاردا قالان محمدعلی قوسی (فرزانه) و «علیقلی کاتبی» (آغ قوش) اوّل‌لرده و احمد شایا «آلاو»، «محمدحسین مبیّن» و من (مجید امین مؤید) ایکینجی مرحله‌ده بو هئیت‌ده عضو ایدیک. باشقا دوستلاردان دا وار ایدیلار کی چوخ تاسفله من آدلارینی یاددان چیخارمیشام.
بو هفته‌لیک آنا دیلینده یازیلیب یاییلان قزئت ۱۳۳۴- نجی ایلده پهلوی رژیمی شهربانی‌سی و اطلاعات مأمورلاری وسیله‌سی ایله تعطیله اوغرادی و چاپخانا‌سی دا توقیف اولاراق، اونون مسئول مدیری حبسه آلیندی. آمما گونش همیشه‌لیک بولود آلتیندا قالمادی.
