ايل‌لر ايدي «فاركار»لارين اوشاقلاري يوخ ايدي. اونا گوره ده «تئدي» آنادان اولاندا قوللوقچولارين سئوينج‌لري ايله قارشيلانديلار. اونلارا تبريك دئمك موناسيبتي ايله ات، يومورتا و گول دسته‌لري ايله ارباب سارايـينا گله‌رك، كؤرپه‌نين گؤي گؤزلري و قيزيلا بنزه‌ر نازيك تئل‌لريني شادليقلا بيه‌نيب و تعريف‌له‌ييرديلر. قوللوقچولار خانيم «فاركار»ا تبريك دئييرديلر. سانكي بؤيوك بير نعمته ال تاپميشدي. دوغروسو، خانيم «فاركار» ايسه بو ساياق حيسّ ائديردي و يئرلي زنگي‌لرين تبريك، سئوينج‌لرينه قارشي تشكّورله دولو و حرارتله گولوردو.
سونرالار «تئدي»نين باشي‌نين توكونو بيرينجي دفه اولاراق قايچيلاياندا «جيدون» آشپاز، ساري، يومشاق توك‌لري يئردن ييغاراق، اونلاري اووجونون ايچينده ساخلاياراق، اوشاغين اوزونه گولومسونوب، اونو «ساري تئللي جوجوق» آدلانديردي و بو عبارت اوشاغين محلي آفريقالي آدي ساييلدي. اوّل گونلردن بري «تئدي» و «جيدون» بير- بيري ايله دوست اولدولار.
«جيدون» ايش‌لريندن فاراغات تاپان زامانلار، کؤلگه‌لي هوندور بير آغاج آلتيندا، «تئدي»ني قووزايـيب چييين‌لري اوسته قالديراراق اونونلا اويناياردي. آغاج بوداغي و يارپاقلاردان و گوي گؤيرنتي‌لردن خارقه اويونجاقلار اونون اوچون دوزلدردي يا گول‌لري حيوانلار شكلينه اوخشاداردي.
«تئدي» يئريمك اؤيره‌نن زامان «جيدون» اونون قارشيسيندا اييله‌رك ايكي قات اولوب، اونو تشويق ائديب آلقيشلاياردي. اوشاق ييخيلاركن «جيدون» اونو توتاردي و اونو او قده‌ر هاوايا آتيب توتاردي كي، هر ايكي‌سي‌نين نفسي گولوشمه‌دن داياناردي. آشپاز اوشاغا محبّت‌لر گوستردييينه گؤره خانيم «فاركار» اونا علاقه‌مند اولموشدو.
«فاركار»لارين اوولادي آنجاق بو اوشاق ايدي. بير گون «جيدون» دئدي: خانيم، عزيز خانيم، گؤيلرين تانريسي بو كيچيك بالاني بيزه باغيشلاييب، بو ساري تئل جوجوق بيزيم سارايين ان يئيراق ووجودو‌دور. «بيزيم» كلمه‌سي خانيم «فاركار»ي ماراقلانديردي و آشپازا قارشي آرتـيق محبّت‌له دولو علاقه‌مند حيسّ ائتدي. آيين آخيريندا اونون موزدونو آرتـيردي. «جيدون» ايل‌لر ايدي كي، خانيم «فاركار»ين ائوينده ايشله‌ييردي. نادير يئرلي، آفريقالي‌لاردان ايدي كي، حيات يولداشي و اوشاقلاري دا ارباب مولكونده ياشاياراق، اؤز وطنينه كي، نئچه يوز مايل فاصيله‌لي ايدي قايـيتماق ايسته‌ييردي. بعضن گؤرونوردو كي، «تئدي» ايله ياشلا برابر بير زنگي اوشاق كول‌لارين و يارپاقلارين ايچيندن باش اوزاديب آغ دريلي گوي گؤز اوشاغا حئيرت و حؤرمتله تاماشا ائديردي. ايكي اوشاق بير- بيرينه حئيرتله و ديققت‌له باخيرديلار.
بير دفه «تئدي» آراشديريب اؤيرنمه حاليندا اليني اوزاتدي كي، اوشاغين قارا ياناق و قارا تئل‌لرينه ال چكسين.
«جيدون» بو صحنه‌يه تاماشا ائديردي، حئيرتله باشيني دبرديب دئدي:
– آه خانيم، بونلار ايكي‌سي‌ده اوشاق‌ديرلار، بيريسي بؤيويه‌جك ارباب اولسون و او بيريسي نوكر و قول… خانيم «فاركار» قملي حالدا گولومسوندو: «جيدون» من ده بو فيكيرده ايديم، دئدي و سونرا آه چكدي.
«جيدون» مذهبي هئيت‌لرده تربييه اولموشدو و اونا گوره ده: بو تانري‌نين ايراده‌سي‌دير دئدي. «فاركار»لار ايسه دينچي ايديلر و تانري حاققيندا موشترك حيسّ، ارباب‌لار و قوللوقچونو بير- بيرلرينه ياخين‌لاشديريردي.
«تئدي» آلتي ياشينا چاتديقدا اونا بير يوگورك وئرديلر، اوشاق سورعت لذتيني و مست‌لييي‌ني دويدو. هر گون سحردن آخشاما‌دك ارباب ائوين دؤوره‌سيني گزه‌رك، گول- چيچك باخچالاريندان كئچردي، قيشقیريق سالميش جوجه‌لري و هيرس‌لنميش ايت‌لري آراشديريب، ياريم داييره ووروب، اؤزونو آشپازخانايا يئتيريب، اورادا تفريحيني باشا چاتديراراق قيشقيراردي: «جيدون» منه باخ!
و «جيدون» گوله‌رك: ساري تئللي هوشلو بالا، دئييردي.
«جيدون»ون كيچيك اوغلو كي، داها چوبان كيمي ايشله‌ييردي، ارباب‌ليغا خوصوصيله گلردي كي، يوگوره‌يي گوروب تاماشا ائتسين. او چوخ ياخين‌لاشمادان قورخاردي، لاكين «تئدي» اونون آرخاسيندا اؤزونو گؤسترمك ايسته‌يه‌رك، قارا اوشاغين دؤوره‌سينده داييره آچاراق فيرلاناردي و قيشقراردي: قارا ! يول وئر چكيل كنارا! و بو حركته او قده‌ر داوام ائتديرردي كي، اوشاق قورخاراق كول‌لار ايچريسينه پناه آپاراردي.
– نه اوچون اونو قورخودورسان- «جيدون» توند سوراردي، و سؤزونده دانلاماق نيشانه‌لري اولاردي.
«تئدي» اوتانمازجاسينا: او قارادير! دئيه‌ردي و سونرا گولردي. آمما «جيدون» سؤزسوز صداسيز اونون كناريندان كئچيب گئدنده، «تئدي» قاش- قاباق ساللاييب، ناراحات اولوردو و در حال سارايا باش ووراراق بير دانا پورتاغال گؤتوروب و اونو گتيره‌رك «جيدون»ـا وئرردي : گه، بو سنين‌دير! دئيه‌ردي.
عئيني حالدا كي، حاضير اولمازدي اؤزونه قبول‌لانديريب ائتدييي ايش‌دن تأسوف‌له ياد ائده، لاكين «جيدون»ون محبّتي‌ني الدن وئرمك ده اونا مومكون دئييلدي.
«جيدون» ايستر- ايسته‌مز پورتاغالي آلاراق، آه چكيب: ساري تئل بالا ! بو تئزليك‌ده مدرسه‌يه گئده‌جكسن، ياواش- ياواش بوي آتاجاقسان- تعجوب‌له دئيه‌ردي. سونرا آستا- آستا باشيني دولانديراراق سؤزونو بئله قورتاراردي: ديري‌ليييميزين يولو بئله اولموش! بئله گليردي كي، «جيدون» اينجيتمه‌يه گوره يوخ, بلكه او ساياق كي، اينسان حتمي بير ماجرايا دؤزر، اوزو ايله «تئدي» آراسيندا فاصيله گؤزله‌ييردي. اوشاق اؤزونو اونون قول‌لارينا آتاردي و اوزونه بارخاراق گولردي، چيينين‌دن آسلاناراق ساعات‌لار اويناياردي. ايندي ايسه «جيدون» قويموردو بدني‌نين دريسي اوشاغين آغ بدنينه سورتولسون. او مئهريبان ايدي، آمما بير جور قورو رفتار، سسين‌ده گيزلي ايدي كي، «تئدي»ني پوزاراق قاش- قاباقلي ائديردي و اوندان اوزاق‌لاشيردي. ها بئله «تئدي» اوشاق‌ليق دونياسيندان اوزاق‌لاشديقجا، اوزو اوچون بير آدام ساييلردي، «جيدون»لا حؤرمت، ادب‌له ياناشاراق و اوزونو توتاراق، هر واخت مطبخه باش ووردوردو كي، بير سؤز سوروشسون، دستورلارينا باش ايمك گؤزله‌ييردي.
آمما بير گون كي، «تئدي» بورولا – بورولا، آغريدان ناله ائتمك‌له، يوموروقلاريني گؤزلرينه سورته‌رك اؤزونو آشپزخانايا يئتيردي، «جيدون» سوپ كاساسيني اليندن آتاراق اوشاغا ساري قاچدي. اونون بارماقلاريني كنارا ووراراق قيشقيردي: ايلان! معلوم اولان «تئدي» يوگوروك اوستونده ايميش، سونرا ايسته‌ييب دينجه‌لسين، آياقلاريني گؤم- گؤي باخچانين كنارينا قويوب‌دور و بير ايلان كي، قويروغو ايله آغاجدان آسلانميش ايميش، اوشاغين گؤزلرينه زهر سپميشدي. خانيم «فاراكار» هول و ولالي خبري ائشيدركن قاچا- قاچا اؤزونو يئتيردي. او اوكورتمه ووروب آغلاييردي، «تئدي»ني باغرينا باساراق دئييردي: بالام كور اولاجاق! «جيدون»! او كور اولاجاق! هله‌ليك «تئدي»نين گؤزلري، ياريم ساعات قاباغا كيمي گؤرمه‌يينه باخماياراق، اوشاق يومروغو قده‌ر شيشميشدي. اونون آغ اوزو قيزارميش، شيشميش و فورمادان چيخميشدي.
– خانيم بير دقيقه دؤز درمان گتيريم، «جيدون» دئدي و مئشه‌يه ساري قاچدي.
خانيم «فاركار» اوشاغي قالديراراق ائوين ايچينه آپاردي و اورادا گؤزلريني پئرمنگنات‌لا يودو. دئمك اولار كي، او «جيدون»ون سؤزونه فيكير وئرمه‌دي. لاكين گؤردو ده كي، اؤزونون درماني اوشاق‌دا اثر ائتمه‌دي. يادينا دوشدو يئرلي‌لري ايلان چالميش و گؤرمك‌دن محروم اولموشدولار. يئرلي گؤي گؤيرنتي‌لر خاصييتي حاققيندا دئدي- دئديلر يادينا دوشه‌رك، آشپازين قاييتماغينا گؤزلري يولدا قالدي. پنجره كناريندا دايانميش، قورخموش و آغلار اوشاغي باغرينا باساراق، اوميدسيز لاكين ديققت‌له مئشه‌يه گؤز تيكميشدي. نئچه دقيقه كئچمه‌‌دن گؤردو «جيدون» بئلي اييلميش بير دسته كؤك و گؤيرنتي الينده گلمك‌ده‌دير.
– خانيم قورخمايين «جيدون» دئدي. ساري تئل بالاني‌نين گؤزلريني بو گؤيرنتي ياخشي ائده‌جكدير. گؤيرنتي‌نين يارپاقلايني قوپاردي، اوندا آنجاق آغ كؤك قالدي. كؤكو يوماميش آغزينا قويوب موحكم چئينه‌دي. سونرا اونو آغيز سويو ايله ايسلاتدي، اوشاغي خانيم «فاركار»ين اليندن آلاراق قيچ‌لاري آراسيندا ساخلادي. ديرناقلاري ايله اوشاغين گؤزلريني بركدن سيخدي. اوشاق آغريدان ناله ائتدي و خانيم «فاركار» اعتيراض ائده‌رك سس‌لندي: «جيدون»، «جيدون». لاكين «جيدون» ائشيتميردي. اوشاق درد و آغريدان قيوريليردي. «جيدون» اوشاغين اوز به اوزونده ديزلريني يئره داياق ائده‌رك، گؤزونون شيشميش قاپاغيني او قده‌ر آچدي كي، ايچي گؤروندو. نئچه دفه چوخ شيددتله گؤزلرينه توپوردو. سونرا «تئدي»ني قالديريب ياواشجاسينا آنانين الينه تاپشيردي- گؤزلري يقين كي، ياخشي اولاجاق- دئدي:
آمما خانيم «فاركار» قورخموشدو و آغلاييردي، حتّا اونا ساغ اول دييه بيلمه‌دي. قبول ائده‌بيلميردي «تئدي» گؤزلري‌نين ايشيغي‌ني يئنه ال گتيره بيله‌جك‌دير. بير ايكي ساعات كئچدي، گؤزلرين ورمي آزالدي و قيرميزي و ايلتيهاب‌لي اولمالارينا باخماياراق «تئدي» گوروردو.
«فاركار»لار، خانيم، آغا، مطبخه گئده‌رك «جيدون»دان دؤنه- دؤنه تشككور ائتديلر. اونلار بيلميرديلر نه ساياق اؤز ممنونيت‌لريني بيلديرسينلر. سانكي بيلميرديلر نه ائتسين‌لر. اونلار «جيدون»ون حيات يولداشي و اوشاقلارينا هديه‌لر وئرديلر. موزدونو آرتيرديلار. بونلار هاميسي آمما «تئدي»نين ساليم گؤزلرينه موكافات اولا بيلمزديلر.
– تانري سني وسيله ياراديب، «جيدون» تا اؤز ياخشي‌ليق‌لاريني باغيشلاسين- خانيم «فاركار» دئييردي. «جيدون» اونون جاوابيندا: بلي خانيم چوخ مهريبان‌دير تانري، سويله‌ييردي.
معلوم‌دور، بئله‌بير ماجرا كي، ارباب‌ليق‌دا اوز وئردي آز زامان‌دا هامينين قولاغينا چاتاردي. «فاركار»لار حاديثه‌ني قونشولارا سؤيله‌ديلر و بوتون ويلايت‌ده ماجرا ديل‌لره دوشدو. «مئشه بوسبوتون سير و رمزدير». اگر اينسان تئز باشا دوشمه‌يه كي، آفريقادا، يارپاق، تورپاق و فصيل‌لر واردير كي، اونلارين حيكمتي قديم‌لردن قارلارا ايرث يئتيشيب‌دير، هئچ واخت اورادا يا اقللن گونئي چمن‌لرين‌ده ياشايا بيلمز… (و اولا بيلر اورادا بير يئرلر واردير كي، اينسانين فيكريندن يوخاري و آرتيق رمزلي و سيرلي‌ديرلر).
يوخاري و آشاغي محلله‌لرده جماعت حيكايه‌لريني نقل ائده‌رك، باشلارينا گلن ماجرالاري بير- بيرلري‌نين يادينا ساليرديلار«… لاكين من اؤزوم اونو گؤردوم. افعي ديشي‌نين يئري ايدي كي، ورم ائتميشدي! اوغلومون قولو ديرسه‌يه كيمي شيشميشدي. قارا، پارلاق بير قوووق كيمي. آز سونرا او ديوار بو ديوار داياناراق اؤلوم حالينا دوشدو. آنجاق بير يئرلي قارا الينده بير دسته گؤم – گؤي علف يئتيشدي. او، افعي ديشي‌نين يئرينه بير زاد سورتدو و او گونون صاباحي اوغلان ايش باشيندا ايدي. دريسينده يئر ائتميش ايكي ديش نيشانه‌لري هله ده قالير. هامينـيز گوره بيلرسينيز….».
بئله روايت‌لر هميشه اوره‌ك دؤيونمه‌سي و هول و ولا ايله دئييلردي چون عئيني حالدا كي، هامي بيليردي آفريقا جنگل‌لرينده، آغاجلارين قابيغي، ساده يارپاقلاري و كؤك‌لرينده داوا – درمان گيزلنيب و اونلارين يولونو گؤزله‌يير، لاكين اونلارين باره‌سينده حقيقتي تاپماق حتّا يئرلي‌لردن ده محال نظره گليردي.
هر حالدا، ماجرا شهره چاتدي، اولا بيلر بير گئجه قوناق‌ليقدا، و يا اونا بنزه‌ر بير مجليس‌ده، بير حكيم كي، تصادوفن اورادا ايميش، ماجرانين دوزگون اولماسيندا شك ائده‌رك دئيير: معناسيزدير، بو ماجرالاري نقل ائدنده بؤيودورولر. بيز بو ساياق داستانلار حاققيندا تدقيقات آپاريريق و چوخو يالان اولور.
بئله‌ليك‌له، بير گون سحر ياد بير ماشين «فاركار»لارين مولكونه داخيل اولدو. شهر لابراتوآر ايشچي‌لريندن بيري چمدان‌لارلا اوتوموبيل‌دن ائندي. چمدانلار شيمييايي داوالار و آزماييش لوله‌لري ايله دولو ايدي.
آغا و خانيم «فاركار» ال- آياقلاريني ايتيره‌رك، شادليق‌لاريني گؤستريب عاليم‌دن ريجا ائتديلر ناهارا قوناق اولسون و يوزونجو دفه اولاراق داستاني نقل ائتديلر. بالاجا «تئدي» اونلارين يانيندا اولماقلا اونون گؤي و ساليم گؤزلري ماجراني ايثبات ائتمك اوچون پارلايـيردي.
عاليم ايضاح ائتدي كي، بو يئني درمان ساتـيشا بوراخيلسا، بشرييت اوندان چوخلو فايدالاناجاق. «فاركار»لار خوش قلب، مهريبان و ساده اولدوقدا سئوينيرديلر كي، ياخشي‌ليغا و خئيره سبب اولورلار. آمما عاليم پول‌دان كي، مومكون‌دور اللرينه چاتا، سؤز آچاندا، اونلارين حركت‌لريندن راضي‌لاشماماق اوخوندو. معجوزه‌لر و كرامت‌لر باره‌سينده احساسلاري او قده‌ر درين و مذهبي ايدي كي، پولا فيكيرلشمك اونلارين باخيميندان اوره‌ك بولانديران و آلچاق گؤزه گليردي. عاليم اونلارين قييافه‌لريني گوردوك‌ده سؤزونو قايتاراراق بشريتين ايره‌لي‌لمه‌سي باره‌ده سؤز آچدي.
و اولا بيلر كي، او مسله‌يه جيددي باخيمي يوخ ايدي. چون بيرينجي دفه اولاراق چاليشيردي جنگلين افسانه‌وي سيرّلريندن باش چيخارتسين.
هر حالدا يئمك قورتارماقدا، «فاركار»لار «جيدون»و اوتاغا چاغيرديلار و دئديلر بو حؤرمتلي بي و بؤيوك شهرين آدلي سانلي حكيمي‌دير و بو اوزون يولو گليب تا اونونلا گوروشسون. «جيدون» بو سوزدن ديسكيندي و باشا دوشمه‌دي.
آغايي«فاركار» در حال ايضاح ائتدي كي، بو مؤحترم حكيم خاريقه درمان‌دان اوترو گليب‌دير. همن درمان كي، «تئدي»نين گؤزلريني ساغلام ائتدي. «جيدون» باخيشيني آغايي «فاركار»ـا و سونرا «تئدي»يه كي، بو دوروم‌دا چوخ موهوم گورونوردو، دولانديردي. ايسته‌مز حالدا دئدي: عالي جناب ايسته‌يير بيلسين هانسي درماني ايشلتميشم؟ ائله بيل اينانا بيلميردي كؤهنه دوست‌لار اونون سيرريني آچميش اولار. سؤزلرينده چتين اينام گيزلنميشدي.
«فاركار» اوزون- اوزادي ايضاح وئردي كي، اوت علفين كؤكوندن مومكون‌دور فايدالي درمان قايريليب بازارا بوراخيلا، و اولا بيلر مين‌لر اينسان،آغ، قارا، بوتون آفريقادا بو درماني ايشلتمك‌له گؤزلريني افعي زهريندن قورويوب و يئني‌دن ساغلام اولالار. دئدي.
«جيدون» گؤزلريني يئره تيكه‌رك قاش- قاباغيني تورشاتميشدي. او، سؤزلره قولاق آسيب «فاركار»ين دئديك‌لري قوتاران زامان جاواب وئرمه‌دي. عاليم بو مودت‌ده صندل موخدده‌سينه دايانميش قهوه‌سيني ايچره‌ك، ترديدله دولو گولر اوزله تاماشا ائديردي. سونرا او دانيشيقلارا قوشولدو و يئني‌دن باشقا بيان ايله داوا – درمان و علمين ايره‌لي گئتمه‌سي باره‌ده سؤز آچدي. «جيدون»ـا دا بير هدييه تقديم ائتدي. بو ايضاح‌لاردان سونرا هامي ساكيت اولدو و سونرا «جيدون» اؤز دورموندا هئچ بير دييشيك‌ليك وئرمه‌دن دئدي: او اوت علف كؤكو يادينا گلمير. «فاركار»لارا باخاندا كئچميش‌لرين عكسينه باخيشي عبوس و دوشمن‌چيليك‌له دولو ايدي. اونلار بئله نتيجه‌يه چاتيرديلار كي، «جيدون» عاغيل‌سيز بير آدام‌دير. عيني حالدا فيكيرلشيرديلر كي، او تسليم اولماياجاق و خاريقه درمان آنجاق نئچه نفر يئرلي‌يه معلوم اولدوقدا قالان عوموم اينسانلارا باشي باغلي و تانينماميش قالاجاقدير.
اونلار كدرلي حالدا دانيشيب بحث ائتمگه‌يه گيريشميش‌ديلر، «جيدون» دا هاي دئييردي ياديندا دئييل يا بير بئله كؤك و علف يوخدور يا ايندي فصلي و واختي كئچيب. بعضن ده دئييردي: كيم دئيير كؤك ايدي؟ من آغزيمين سويو ايله «تئدي»نين گؤزلريني علاج ائتديم. بو سؤزلر دال با دال تكرار اولوردو. ائله بيل ضيدد و نقيض دانيشماسينا خيلي اهميت وئرميردي. اوزدن گئتمه‌ين و سيرتيق آدام اولموشدو. «فاركار» اؤز قوجامان نجيب و سئويملي نوكرلريني بو قانماز، هرزه و كوسه‌ين يئرلي‌دن چتين‌ليك‌له تشخيص وئره بيلميرديلر. بو كوسه‌ين قوجا اونلارين قارشيسيندا آياق اوسته داياناراق گؤزلريني يئره تيكيب اونلويونو الي ايله دارتيردي و هر جوره آغزينا گلن مسخره رد جاوابي كي، ذئهنينه گليردي تكرار ائديردي. لاپ‌دان بئله گؤرسندي كي، ايسته‌يير تسليم اولسون. باشيني يوخاري قووزاياراق، قارانليق و كدرلي باخيشين بو آغالار جماعتينه دولانديردي: ياخشي گئدك علف كؤكونو گوستريم! دئدي.
اونون گؤزونده بو جماعت ايت‌لره اوخشاييرديلار كي، اونو دؤوره‌له‌ميشديلر. ائشيكده يولدا چييين به چييين اونو ايزله‌ديلر. دئكابرين ناهاردان سونرا پارلاق بير گونو ايدي. گؤي ده پارا- پارا ياغيشلي بولود دا وار ايدي. يئر – گؤي ايستي ايدي: گونش برونز مجمه‌يي كيمي يانديريردي. توز- تورپاقلي يئل اسيردي. ايستي درين نفس كيمي اوزلرينه ووروردو.
يامان بير گون ايدي، آنجاق ائيوان‌دا ييغيشيب سرين ايچكي ايچيمه‌يه موناسيب ايدي. بو ساعات‌لار اونلار هميشه بو ايشي گوررديلر. يادا سالماقلا كي، ايلان ماجراسي گونو آنجاق اون دقيقه‌ده علف كؤكو تاپيلميشدي بيريسي: «جيدون» هله چوخ قاليريق مقصده چاتاق؟ دئيه سوردو.
و «جيدون» كؤورلميش، احتيراملا سوآل وئره‌نه باخمادان: ارباب! علف كؤكو دالينجا گزيرم جاواب وئردي و دوغرودان دا، يولون اطرافيندا اييله‌رك، باشدان سووما و يالانچي بير حالتده ال‌لريني اوت علف ايچريسينه اوزاديب سونرا ال‌لريني چكيردي. او يانديران و اينجيدن ايستي‌ده «جيدون» اونلاري ايكي ساعات فرعي و تانينماميش يول‌لاردان مئشه‌نين ايچريسينه چكيب آپاردي. سويوق تر بدن‌لريندن آخيردي، باش آغريسي توتموشدولار.
هامي ساكيت ايديلر، «فاركار»لارين سوكوتو آجيق‌دان و عصبي‌لشمه‌دن ايدي. عاليم ده ساكيت ايدي چون فيكيرلشيردي اونون نظري قبول اولوناجاق كي، بئله بير علف و كؤك يوخ ايميش. البت، عاليمين سوكوتو معنالي و اولچولموش ايدي. آخيردا، آلتي مايل ائودن فاصيله آچاندان سونرا «جيدون» بيردن بيره فيكير ائتدي كي، كفايت قده‌ر يول گليب‌لر، يا دا اولا بيلر كي، آجيق‌لانماسي سؤنمه‌يه دوغرو ايدي. آختارمادان و زحمت چكمه‌دن، بير اوووج ماوي رنگ گول – چيچك دردي. اونلاردان يول قيراغيندا بوللوجا وار ايدي.
عاليمه باخمادان گول‌لري اونا وئردي و اؤزو تكجه سارايا طرف يولا دوشدو. اونلار دا ايسته‌سه‌يديلر اونون دالينجا گئده بيلرديلر.
ائوه قاييتماقدا، عاليم ممنونيتي‌ني بيلديرمك اوچون مطبخه باش ووردو. اونون باخيشيندان زارافات و شوخلوق ياغيردي لاكين ايسته‌ييردي ادب‌له اوز به اوز اولسون. «جيدون» يوخ ايدي و عالي مقام قوناق گول‌لري باشدان سووما كيمي ماشينين داليندا يئر ائديب، لابراتووارينا گئتدي.
واختلي واختيندا شام حاضيرلاماق اوچون «جيدون» قاش قاباقلا مطبخه قاييتدي. او، اربابيندان آجيقلي بير نوكر كيمي خانيم «فاركار»لا دانيشيردي. اوزون زامان لازيم ايدي تا اونلار دوباره بير- بيرينه مهريبان اولالار. «فاركار»لار علف كؤكو باره‌ده ايشچي‌لرينه سورغو وئرديلر. اونلار بعضن بير جاوابلار وئريرديلر، آمما باخيشلاري اعتمادسيزليق‌لا دولو ايدي. بعضي واخت‌لار دا دئييرديلر: بيلميريك، بو باره‌ده هئچ بير سؤز ائشيتمه‌ميشيك. اونلاردان بيريسي، بير جاوان چوبان، كي چوخدان بري اونلارين يانـيندا اولاراق بير آز اعتماد و حيسّ ائديردي دئدي: آشپازينيزدان سوروشون. سيزين سارايدا بير حكيم واردير. او، آدلي سانلي بير جادوگرين اوغلودور، او بير زامان بورادا شؤهرت قازانميشدي. بير درد يوخدور كي، او، درمان ائده بيلمه‌سين. سونرا شئيطينت‌له سؤزونه آرتيردي: شايد او، آغ حكيم كيمي اولمايا، بيز بيليريك، لاكين بيزه كفايت ائدير.
بير موددت سونرا كي، «فاركار» و «جيدون» آراسيندا سويوق‌لوق آرادان گئتدي، زارفات‌لار باشلاندي: «جيدون»، هاچان ايسته‌ييرسن گئده‌ك، ايلان زهريني سؤندورن علف كوكونو بيزه گوستره‌سن؟
او گولومسونه‌رك، باشيني توولاييب و آزجا ناراحات‌ليق‌لا: آمما خانيم من گؤسترديم، يادينيزدان چيخاريب‌سينيز؟ دئييردي.
سونرالار، «تئدي» طلبه اولان زامان، هر واخت مطبخه باش ووراردي: «جيدون» آي ناكس قوجا، يادينداير، بيزي آلداداراق بوش يئره كيلومئترلر چمن‌لرده دولانديراردين. يول اوزون- اوزادي ايدي، آتام دا مجبور اولاراق مني اوزونه يوك ائله‌ميشدي سؤيله‌ييردي.
«جيدون» احترام ائتمك‌له برابر قاه‌قاه چكيب گولردي و سونرا يورغون و قوچاليق‌دان پوزغون گؤزلريني سيله‌رك، بوكولموش قدديني صافالديب، تأسوف‌له و قمله «تئدي»يه باخاراق: آه ساري تل‌بالا- نه گؤزل بوي آتميسان! چوخ كئچير آرتيق بؤيويه‌جكسن، شخصي املاك و مزرعه ايله… دئييردي. «تئدي» گوله‌ره‌ك اونا شئيطنت‌له گؤز تيكيردي.
سون
ایضاح:
اینگلیس یازیچیسی دوریس لسینگ (جین سامرز) ۲۲ اکتبر ۱۹۱۹ ایل ایرانین کرمانشاه شهرینده اینگیلیسلی بیر عائله‌ده آنادان اولوبدور. 2007-نجي ايلين نوبل موکافاتيني قازانيبدیر. فارسجا‌يا ترجمه اولونموش ايلک اثري اوستاد مجید امين مؤيد قلمي ايله 1342- نجي ايلده «کتاب هفته» مجله‌سي‌نين 100ینجی نومره‌سينده چاپ اولونموشدور.