اوچون شعیرلریم
هاشیم ترلان
دوزولون، صف چکین چین دیواری تک،
لاله‌دن، ریحاندان تر شعیرلریم!
دیلیمه خور باخان دیز چؤکسون گره‌ک-
سیزین قارشینیزدا، تر شعیرلریم!
سیزی پولاد کیمی من سوواراندا
دئدیم: دوشمانی‌یام مؤحنتین، یاسین.
دؤیوش مئیدانیندا صفلر یاراندا،
یاغی پنجه‌نیزدن اوزاقلاشماسین.
هایدی شعیرلریم پرواز چاغی‌دیر،
یئنه نعره چکیر قیلینجلار، باخین!
“عراق” عربلرین اؤز تورپاغی‌دیر،
اوچون، قاناد چالین، شیمشک تک چاخین!
سارایلار اوچولور، داخمالار یانیر
دیری بیر میللتین بوغولور سسی.
عربلر، قینیندا باخیر، بویلانیر،
یاغیر دوشمانلارین توپو، گولـله‌سی.
حربین موقدسدیر سنین ای عرب!
توفنگین ناموسون، اؤز شرفیندیر.
سنی زیرولره قالدیران غضب
بیرده حاق دؤیوشون، دوز هدفیندیر.
دوشمانین، منیمده دوشمانیمدی بیل!
دیلیمیز آیری‌سا، یئر کوره‌میز بیر.
جاناوار جیلدینه گیرن “اسرائیل”،
بیلسین، دونیا بئله گئتمه‌یه‌جکدیر!
ائوین داغیلیبسا اى “افغانلى” گل
اؤز کؤنول ائویمده یئر وئریم سنه!
قانادین،آغریدان ائتمسه عمل،
گل، اؤز قانادیمدان پر وئریم سنه!
فیرعونلار تیترهدن بیر قلمیم وار،
بیرده توپ داغیتماز شعیر کاروانیم.
دورنا قاتارى تک سؤز عالمیم وار،
سنین تک سنگرده اؤتوب هر آنیم.
حیاتین سیررینى اوخویان اینسان،
نور آلار ظولمتین گؤزوندن یقین.
عزمینى عشقینه توخویان اینسان،
چیراغین سؤندورر مطلقیتین.
آلقیش اى “فلسطین” سنده‌کى عزمه
بیر خالقین دردى وار یارالاریندا.
هر شعریم ضربهدیر امپریالیزمه
منى کؤنوللو یاز سیرالاریندا.
باخ! بودور سوقاتیم فلسطین سنه
مرد اولان، وارینى وئرن اوتانماز.
سن حسرت قالانى دوغما وطنه،
منیم گؤزلریمه یوخو دولانماز.
