(۱)
کاشکی
الیمه بیر بارداق سو وئرن اولایدی!
سوسوزام … سوسوز!
اوستومده آغیرلیق ائله‌ییر-
کابوس کیمی غم یوکو،
و نفسیم
زامانین سون پیلله‌سینده دوراراق
سون خبری گؤزله‌ییر!
کاشکی
اوره‌یین قده‌ر تورپاغیم اولایدی
و سئوگی قده‌ر باغبانیم؛
و دوداقلاری‌نین اوجوندا اولدوز کیمی بیر تبسسوم
و بولاغ کیمی سونسوزا آخان-
دوم- دورو گؤزلر.
کاشکی
مقصده چاتمیردی حیات قاطاری،
و داغین آرخاسیندا باتمیردی گونش
و گونشین باتماسی‌لا چیخمیردی آی.
کاشکی
یوخلوغو ناغیل‌لارا تاپشیرایدیق.
کاشکی … کاشکی …
(۲)
یاز مؤوسومونده
“باهار ناریج” چیچک‌لریله-
بیر یووا قوراجاغام.
گلیشینله-
عطیرله‌نه‌جک یووام.
و من
قدحینده شراب اولاجاغام
قورتوم- قورتوم ایچه‌جکسن منی-
صبیرسیزجه‌سینه.
(۳)
دیل آچ
دانیش!
هانسی سؤزجوکله-
اکیرسن دوداقلارینا سئوگینی،
من
گؤرمه‌دن سئویرم سنی؟
یک پاسخ
چوخ ساغولوز گولناز خانیم