عاغلیم آغلاییر
رقیه کبیری
گؤوده‌می بیر جمهوری‌یه باغیشلاماغیم گلیر
جانیمی،
جانیم بویوندا، بوخونوندا بیر جانا
اللریمی،
اللریم بویدا اللره
آیاقلاریمی اؤز آیاقلاریمین ایزینه قویماغیم گلیر
اوره‌ییم…
جمهوری اوره‌ییمه توخونا بیلمز
اوتوز بئش ایل اؤنجه بؤیوک بیر پارچاسینی باغیشلامیشام
تاریخین پلتک‌له‌ین چاغینا
یئرده قالان نه وارسا،
باغریمدا گیزله‌دیرم، چاتلاماسین
اوره‌ییم‌ده قالسین، اوره‌ییم…
چییین‌لریم
دوشه‌جک جمهوری‌نین دامیندان
ساچلاریم بایراقلاناجاق مئیدانیندان
آمما
اللریم یئنه بوش قالاجاق؛ بیلیرم
اووجومدا، داغ
دیلیمده، سوس
دؤشومده، آغری
باغریمدا، داشا دؤنمه‌ین اوره‌ییم…
چرچووه‌سیندن چیخارا بیلمه‌دیییم بو جانی،
بو گؤوده‌نی جمهوری‌یه باغیشلاماغیم گلیر
آخ…
چاشمیشام.
اینانمایین!
بو سؤزلری قارانلیق گئجه‌لرده
هوشوم باشیمدان اوچاندا،
هاوانین آغزیندان قاپمیشام
باخین!
آیاقلاریما بیر باخین
زنجیرله‌نیب آنامین ایناملارینا
آتامین آدینا…
اؤز یئریشینی بئله ایتیریب آیاقلاریم.
عاغلیم آغلاییر
اوره‌ییم آیاقلاریما کؤوره‌لیر
کهلیک‌لرین ناغیلینا اوزانیب
قارقا یئریشلی آیاقلاریم….
1393.۳.۱۶
