قیسا شعرلر(۳)
فریبا مرتضایی
(۱)
چیچکلر
خزانا دوغرو آچارلار
او یاز دا کی سن یوخسان؛
یوروملا اینانمادیغیم یوخونو!
(۲)
نه شیرین یوخو
بیزی آپارمادی!
بو آییقلیغین
اَن آجی دادی‌دیر.
(۳)
عؤمورلوک بیر یوخودور دوغوم گونو،
بئشیگیمی ییرغالاما آنا!
(۴)
آچ قاشلاری‌نین دویونونو!،
باخیشین توتولور؛
آییمی ایتیریرم.
(۵)
کیرپیکلریندن وورولموشام
اوخ دئمه‌دن !
(۶)
گؤزلریندن سوزوب،
یاناقلاریندا آخیب،
شور دنیز کیمی-
دوداقلاری‌نین گوشه‌سینده آغلایاجاغام.
(۷)
درین باخیشلاردا بیتمیشم؛
گلین
بو حوزنو چیچک سانیپ درین،
اوره‌ییمین دایاز یئرینده اکین !
(۸)
یاناقلاریم
سنسیزلیک بهانه‌سی‌ایله یاشالمیش
بیر باخ منه
بو یاغیش کسیلسین- دئیه !
(۹)
کئچدی او زامانلار
گیزلن پالانج اوینادیغیمیز آن‌لار
ائله ایتمه‌میشیک تاپیلاق بیر داها !
(۱۰)
آجی بیر حکایه‌دیر یاشام؛
یازمادان
اوره‌ک‌لرده اوخونور.
8 پاسخ
چوخ چوخ،گوزل گرچک دن دویغولاندیم سیزین ازنیزینن تلگرام کانالیندا ایستفاده ادرم
@yapraq
çox gözəl
bətərdən ürəyimə yatır şerləriz
qələmiz yazar olsun
یازدیغین ایلک تورکجه شعرینی اوخویاندان بری ،آنا دیلمیزده ذیروه لرده اولاجاغینا اینانمیشام
ائلیمین دویغولو شاعیری فریبا خانیم مرتضایی
یولون هامار ،قلمین آخار ،دویغون آشار-داشار اولسون گؤزلیم …
چوخ چوخ گؤزل هز زامان کی تکین لذت اپاردیم نه قده ر بو قیسا سطیرلر ده بویؤک معنالار وار خصوصا بو شعر
چوخ یاشایین ائلمین مهربان شاعره سی عزیز خانیم مرتضایی ایشق امکداشلارینا چوخ تشککورلر
گؤزلریندن سوزوب،
یاناقلاریندا آخیب،
شور دنیز کیمی-
دوداقلاری‌نین گوشه‌سینده آغلایاجاغام.
سونسوز تشککورلر ایشیق امکداشلارینا بو گؤزل درین دویغو دولو شعر لری پایلاشدیغلاری اوچون حؤرمتلی خانیم مرتضایی نین اللری وار اولسون منده هر زامان کیمی الی دولو گئدیرم .
چوخ گؤزل لذت اپاردیم حؤرمتلی نامی بئی نن هم فیکیرم ایهاملار اخار داشار . ساغ اولون عزیز خانیم مرتضایی
منده بئله دییم ( ایهام ماکینه سیدیر خانیم مرتضایی )
حؤرمتلی خانیمم مرتضایی، دویغولار هر زامان کی کیمین، بو دیرلی سطیرلرده یاشاییرلار.اوغولار اولسون سیزه.و ایشیق سایتین امکداشلارینین اللرینه ساغلیق پایلاشدیغلاری اوچون.
تبریکلر حورمتلی خانم مرتضایی…..تصویر لر گؤزل…ایهاملار آخار داشار….مین یاشایین.