دونیا قادین‌لار گونو موبارک اولسون
قیسا شعرلر(۲)
فریبا مرتضایی
(۱)
کئچدی او زامان لار:
-گیزلن پالانج اوینادیغیمیز آن‌لار-
ائله ایتمه‌میشیک
تاپیلاق بیر داها.
(۲)
قیشین اورتاسیندا باهار گَلمیش
اینتیظار چَکن باخیشلاریمی
چیمن گؤزلرینده گزدیره‌جه‌یم.
(۳)
سورمه‌لی گؤزلرین
یوخلوغوما یاس توتوب
ائله سانیرام…
دئدیلر بو قره او قره‌دن دئییل!
یازیق سنی یاهالمیسان
گؤزل‌له‌شیب یار گلیر.
(۴)
بیر عؤمور
قوناق- باجی اوینادیم
هئچ بیلمه‌دیم
کیمین گؤزونده باجی‌ایدیم
کیمین دیلینده آجی.
(۵)
سن یوخسان
یاناقلاریمین قیریشیندان
آجی بیر چای آخیر
بیر قندیله
آغزیمین دادین آلدادیرام
بو آجینی
شیرین-شیرین باشا چکیرم
بو منیم اوره‌ک یازیمدیر
منی شیرین چاغیر.
(۶)
کیچیلیرم… کیچیلیرم
آنامین بلله‌لری بویدا
ایلک مکتب دویغولاریما
قاییدان زامان.
(۷)
دویغولاریمی تومارلا
خیالیمین بویوندان کئچ
عرضیم بو قده‌ر.
7 پاسخ
کئچدی او زامان لار
نه یاخشی کی کئچدی
چوخ گوزل
سلاملار. دئمه لییز کی بو دویغولو و آنلام لی سؤزلر سیزین قیسا شعرلرینیزینده، اوخویوجولارین ذیهینلرینده قالیجی بیر ایز بوراخیب و بوراخاجاقدیر. هر زامان یازیلارینیزین داوامینی آرزو ائتمکده ییز.اوغولار سیزه.
اوخودوغوم ان گؤزل قیسا شعر لردندیر اللرینیزه سالیق یئنی ایل بایرامیز موبارک اولسون مهربان خانیم مرتضایی
حؤرمتلی خانیم مرتضایی قیسا شعر یازماق چوخ چتین دیر سیز بو چتینی نه قده ر گؤزل درین دویغو دولو شکیلده راحات یازمیسیز چوخ سئودیم تشککور ائدیرم . ایشیق سایتین امکداشلارین اللرینه ساغلیق پایلاشدیغلاری ایچین و ایل بایرامیز مو بارک اولسون .سایغیلار
عزیز و مؤحترم خانیم مرتضایی اللریز آغریماسین لذت اپاردیم بو آز اؤز و مؤحتشم شعر لریزدن سونسوز تشککورلر ایشق امکداشلارینا بو گؤزل قیسا شعر لری بیزلرینن پایلاشدیغلاری اوچون وار اولون .
محمد گوزل اوغلودان شعر اوموروق
ایشیق امکداشلارینا سونسوز تشککورلر .وار اولون .