آغاجلار بختي
مفتون اميني
آلديغي، آزليقدان بيلينمه‌ين
وئردييي چوخلوقدان
درين کؤکلوٍ
گئنيش کؤلگه‌سي اوجالان، تازالاشان
يئرلي بير حقيقت؛
«آغاج» آديندا
ايدامه‌لي بير قالخيش
هئي! نه حئيرتلي‌دير، نه ده ماراقلي
آغاجين دوردوغو يئرينده پايـيزلاردان، قـيشلاردان کئچمه‌سي
و يـئني باشدان خوش گوٍنلرينده ياشاماسي
نئجه کي،
من اؤزوٍم نه چوخ زامان-
باغلارين، مئشه‌لرين ايلک باريني دوياندا
نيسگيل آخي چکميشم کي:
نولاردي،
بيز اينسان‌لار دا
آغاجلار کيمي ايلدن- ايله نئچه آيليق گنجلشه‌يديک…؟
•
آي منيم اوٍره‌ييمي يوخلايان،
سؤزوٍموٍ دينله‌ين، مينّت‌سيز بير آليشيق!
من آغاجلارين بوي – بوداقلارينا لايـيق اثرلي، ديرلي بير «پوئما»م يوخدور؛
قوي آنجاق
او باغين اته‌ييندن کئچه- کئچه
سونکو ايسته‌ييمي داها اوجا سسله سؤيله‌ييم کي:
نه شاعيرلر طبعي،
نه پهلوان‌لار گوٍجوٍ
نه پاديشاه‌لار تختي
بلکه من اوٍچوٍن اولا- اولمايا تکجه بير آغاجلار بختي
آي، آغاجلار بختي…