حرکت
اسماعیل خرمی‌

قاطارلار
دوز یولو  گئتمه‌یی
بیزدن اؤیره‌نیردیلر.
دلی کولک‌لر
دینجلمه‌یه یئر آختاراندا
بیزه سیغینیردیلار.
و بیز قارتال کیمی
قیها چکیب
کئچیردیک گئجه‌لرین ایچیندن .
باغیران توفنگ‌لرین
های هارایی
ساخلامیردی بیزی .
ائویمیز قورخموردو ییخیلماغیندان
اییللر اؤنجه دادمیشدی
اونون دادینی.
الی بوش
اوره‌یی دولو
آیاقلاری سرت-
یوواسی اوسته اوتوران داغ کیمی
دورموشدوق فیرتینالار اؤنونده .
اینانیردیق
آنلاییردیق
یوللاریمیزین   ــ
سئوگی قوخوسونا.
و ــ
بعضا
بیر مغرور قار‌گیله‌سی کیمی
دوشوردوک پنجره‌لر اؤنونه؛
کولک‌لری دوشونمه‌دن ،
دایانمادان ،
دورمادان
گئدیردیک یازی آختارماغا.