آلوولار قیزی
رقیه علیقلییان(لاله)
آلولار قیزییام حاقدیر نفسیم،
شهریار بابامین نواسی منده.
آرخامدا دایانیب قوچاق ایگیدلر،
ستارخان، باقرخان جیداسی منده.(1)
×××
مشروطه دؤوروندن قالان بیر سسم،
ائللری آییلدان اودلو نفسم،
دؤیوش میدانیندا گوجلو بیر کسم،
نیگارین، هجرین ذکاسی منده.
×××
کئچه‌رم جانیمدان وطن یولوندا،
قوچاق تک دورارام ساغ و سولوندا،
بیر گوجه دؤنه‌رم قارداش قولوندا
زینب پاشالارین نیداسی منده.
×××
اربابا، حاکیمه بویون ایمه‌رم،
اغیاری مدح ائدیب، یادی اؤیمه‌رم
عشقیمین خطرینه بیر آن دیمه‌رم
سئللر ساراسینین صداسی منده.
×××
“لاله” تک داغلارین بزه‌رم دوزون،
سئوه‌رم یوردومون چشمه‌لی گؤزون،
پایلارام ائللره کؤنلومون سؤزون،
“پروین”ین، “سحر”ین صداسی منده.( 2 و 3)
ایضاح:
1- “سلیمان ثالث”ین شعریندن استقبال
2- پروین اعتصامی”یه اشاره‌دیر
3- “حمیده رئیس‌زاده” سحر خانیما اشاره‌دیر
