قاراداغ
رقیه علیقلیان «لاله»
«قاراداغ» مئشه‌لیکلرینه دوشن یانغین موناسیبتیله
یئنه‌ده اود دوشوب جانینا سنین
آلوولار قووزانیر گؤیه قاراداغ!
فره‌لر اودلانیر، اوولارین یانیر
ظولوملار اَله‌نیر یئره قاراداغ!
جئیرانین بالاسی آلوودا یانیر
آناسی مله‌ییر، قلبی دایانیر
ائل‌لریم آه چکیب غم‌لرین آنیر
هر قادان گلئیدی منه قاراداغ!
سینه‌ن اود ایچینده کول اولور بوگون
یانغین‌لار تالاییر اَرن‌لر یوردون
سن تاریخ بویونجا دوشمانی یوردون
بو گون ده حرییت دیله قاراداغ!
یاردیما قووزانار تبریزدن ال‌لر
گور سئله چئوریلر بیرله‌شن ائل‌لر
مشروطه تاریخی یئنه دیریلر
نامردی یاندیرار بئله قاراداغ!
«لاله»لر بزه‌سین چؤلو، چمنی
نغمه‌لر بوروسون گولو، گولشنی
هر زامان شن گؤرمک ایستیرم سنی
یاشیللیق یاراشیر سنه قاراداغ!
یک پاسخ
بسیار عالی بود متنی زیبا و ساده و در عین حال تاثیر گذار