چئویرن: محمدحسین طهماسب‌پور شهرک (میرزه)
ترجمه: محمدحسین طهماسب‌پور شهرک (میرزه)
محمدحسین طهماسب‌پور شهرک (میرزه)

دئییرم اگر اؤلسم، بؤیوک شاعر اولارام،

احتراملی، حؤرمتلی تاریخلرده قالارام.

یاد ائیله‌یرلر ائللر مندن بیر نابغه تک،

ختم مجلسلریمه گول گلر اتک- اتک.

متعهد بیر آتا، گؤزل مهربان قارداش،

باشی اوجا بیرکیشی، خانیمینا بیر سیرداش.

بؤیوک- کیچیک آنلایان، عظمتلی، وقارلی،

گؤرکملی شخصیتی، انضباط، اقتدارلی.

گؤزومو یوممامیشدان تلفونلار دوشر ایشه،

باخ سسلرده رعشه‌یه، اورکلرده تشویشه.

تشیعیمه گلمه‌یه مسابقه قویولار،

افسوسلا، آه – وایلا دولار قولاقلار، دولار.

چوخلار گؤزیاشی تؤکوب، عزیزیم، دوستوم دئیر،

دیریلیکده اؤلئیدیم مندن توتمازدی خبر.

عکس، تصویر چکیلیر گؤزلرین سیلنلردن،

یادیم، خاطرم‌ایله آغلاییب، گولنلردن.

ائله تحلیل ائدرلر اؤزومده حیران قاللام،

هنریمی، علمیمی سئیر ائدیب، واله اوللام.

بیلرم، دوشونرم کیمیدیم، نه‌ایمیشم،

اؤزوم باشا دوشمه‌دن نه یازیب، نه دئمیشم.

تلویزیون، رادیودان سسله‌نر آدیم، شانیم،

یاییلار دونیالارا شانلی شهرتیم، شانیم.

افتخارلا عکسیمی سالاجاق مجله‌لر،

فیلمیمی گؤتورمه‌یه خبرنگارلار گلر.

بیر میداندا قویارلار شایدده هیکلیمی،

شاه اثر یازا- یازا قلملی اللریمی.

ناطقلر دئیجکلر مثلی گؤرونمه‌میشدی،

حاییف- حاییف کی وقتیسز دونیاسینی دییشدی.

سؤز آچیلار یازارلار عالی استعدادیمدان،

حقسیزلییین قارشیندا دادیمدان، فریادیمدان.

دئیرلر نه مداللار حقیم‌ایدی، آلمادیم،

میزی، پستی، مقامی ایستمه‌دیم، اولمادیم.

اثرلریم چاپ اولار کتابلاریم یاییلار،

تعریفیمی ائشیدن اولاری جوت- جوت آلار.

تأسف‌لر اولونار شاعرین فقدانیندان،

مقاله‌لر یازیلار یولوندان، ایمانیندان.

صحبتلرین عنوانی صفا و صداقتیم،

بؤیوک حسن ساییلار دئمک ان پیس عادتیم.

تانییام تانیمایام یوزلر دوستوم تاپیلار،

جانلانار خاطریمده اولمایان خاطره‌لر.

گیزلین، آشکار دئیرلر بنده‌یه اجحاف اولوب،

منه لایق عنوانلار رقیبه اتحاف اولوب.

چیخاجاق بیر- بیر اوزه مینلر گؤزل خصلتیم،

محفل‌لرین نوغولو شیرین سؤزوم، صحبتیم.

کدرلی آهلار چکر شاعری گؤرمه‌ینلر،

یا گؤروب تانیماییب، اونلا ال وئرمه‌ینلر

تئز- تئز اوتوروب، دوروب یئریمی بوش گؤررلر،

 عیبلریم اؤرتولر، ناخوشو خوش گؤررلر.

دئیرلر حق جارچیسی ائللرین عاشقی‌دی،

مجلسلرین گؤرکمی، شانی- یاراشیغی‌دی.

رقیبلر سبقت آلار دوستلوقلا بیر- بیریندن،

خیاللاری راحاتدی میداندان چیخمیشام من.

بیرینین بوندان سورا یئرینی دار ائتمه‌رم،

سوسوب، آجی دیلیمله کیمسنی اینجیتمه‌رم.

نقشه چکمک ایسته‌مز منی بایکوت ائتمه‌یه،

هله بیر علم یوخدور اؤلونو دیریلتمه‌یه.

اؤلولرین دالینجا نه آساندی دانیشماق،

اؤلویله وداعلاشیب، عؤمور بویو باریشماق.

پس منیم اؤلوم گونوم دئمک یاخشی گونومدور،

دونیادان گئدن گوندن گؤزل دونیا منیمدیر.

مجتیم اورکده، آدیم دیللر ازبری

گؤرون هارا چاتمیشام آنجاق اؤلندن بری.

اؤلسم گؤررم یقین کیم‌ایدیم، نئیله‌میشم،

یئرسیزدیر بو اؤلومو دیریلییه دییشم.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اگر اؤلسم

محمدحسین طهماسب‌پور شهرک (میرزه)
www.ishiq.net

آذربایجان ادبیات و اینجه‌صنعت سایتی

اگر اؤلسم

محمدحسین طهماسب‌پور شهرک (میرزه)
www.ishiq.net

آذربایجان ادبیات و اینجه‌صنعت سایتی

اگر اؤلسم

محمدحسین طهماسب‌پور شهرک (میرزه)
www.ishiq.net

آذربایجان ادبیات و اینجه‌صنعت سایتی