اؤیرنیب اؤیرتمه‌یی،
لاله‌ سیاق بیتمه‌یی؛
پیس یاخشی عادت نه‌دیر،
ان یاخشی سوقات نه‌دیر،
دیکته، انشا یازماغی،
جهلین کؤکون قازماغی؛
کیم بیزه یالان دئییر،
کیم قازانیر کیم یئییر؛
اوشاق‌لا قونوشماغی،
ناحقه دولاشماغی؛
دوستا مهربانلیغی،
یارماغا قارانلیغی؛
درد نه، درمان نه‌دی،
کفر نه، ایمان نه‌دی؛
جرئتی، شهامتی،
پوزماق کؤهنه عادتی؛
ریاکارین اووجون آچ!
گله‌جگه یول‌لار آچ!
نیفرتدن عشق دوغار،
ایشیق ظلماتی بوغار.

دریالارا گئتمه‌یی
صمد بیزه اؤیرتدی.
غیرت، شرافت‌ نه‌دیر؟
صمد بیزه اؤیرتدی.
غلط‌لری پوزماغی
صمد بیزه اؤیرتدی.
کیم توخویور، کیم گئییر؟
صمد بیزه اؤیرتدی.
حق قاپی‌سین آشماغی
صمد بیزه اؤیرتدی.
دوشمانا یامانلیغی
صمد بیزه اؤیرتدی.
رحمان‌کیم، ‌شیطان ‌نه‌دی؟
صمد بیزه اؤیرتدی.
دوغرونو، صداقتی
صمد بیزه اؤیرتدی.
خرافاتدان قورتول‌ قاچ!
صمد بیزه اؤیرتدی.
کین‌دن محبت یاغار
صمد بیزه اؤیرتدی.

ائشیب ریشه‌نی تاپماق،
اویاق آیاغا قالخماق؛
چنلی بئلین آوازین،
کوراوغلوسون، ایوازین؛
رفاقتی، صفانی،
عهدلره وفانی؛
علمی دنیا گؤروشون،
دؤیوشلرین آخیشین؛
تعریفی، انتقادی،
مستبده فریادی؛
ظالیم کیم، مظلوم کیمدیر؟
حؤرمت نه، محروم کیمدیر؟
قلم نه، کتاب نه‌دیر؟
شور و انقلاب نه‌دیر؟
صمد کندلی‌یه سیرداش،
شعور، حرکت، تلاش؛
صمد چیرپینان اوره‌ک،
صمد یعنی اؤیره‌نک؛
سلام وطنه ائله!
اوشاقلار صمدگیله!

معلول‌لاری بوراخماق
صمد بیزه اؤیرتدی.
عاشقین سؤزون، سازین
صمد بیزه اؤیرتدی.
وظیفه‌یه ایفانی
صمد بیزه اؤیرتدی.
یولون انیش یوخوشون
صمد بیزه اؤیرتدی.
طبقاتی اضدادی
صمد بیزه اؤیرتدی.
حاکم و محکوم کیمدیر
صمد بیزه اؤیرتدی.
چشمه و سراب نه‌دیر
صمد بیزه اؤیرتدی.
کارگرلره یولداش
صمد بیزه اؤیرتدی.
صمد آرمان دیلک،
صمد بیزه اؤیرتدی.
«بهروز»ا «نابدل»ه،
صمد بیزه اؤیرتدی
1380