قارانلیغیمدان باش قالدیرمیش هوپاتیا/ رقیه کبیری
۸ مارس، دونیالیق قادین گونو مناسیبتی‌ایله
آتا بی‌لرین آتاسی
دینله!
آلمانین شاه داماریندا محبوس اولموش آدیمی
سورگون سالیرام
سنین جنتیندن!
ساقین!
موو آغاجینین داماریندا دا
گیله- گیله گزمه منی
من توتقون خاطیره‌لرین
کونج لرینه ساریلان بیر سارماشیق
هؤرولن دووارلارین آرخاسیندا
هؤرومجه‌یه چئوریلن بیر قادین
ایکی اللی- آیاقلی دئییل،
باجاردیقجا
آیاق بورج آلمیشام قیرخ آیاق لاردان
آشمیشام دووارلاری
اللریم پوسقو قورورب
آغ کاغیذلارین آرخاسنیداکی خیاللاریما
سیرغاسیز قولاقلاریم
قولاقلانمیر تانری‌لارین سسینه…
ساچیمین تئلی آغارمیش
سازینین تئلینده قیریق- قیریق باغیریرام
دلی دومرولون قادینی اولاسی دئییلم
جانیمی باغیشلایامام…
ارلر آرخامجا گلمه‌سین
اینجه بئللی
اوجا بویلو بورلاخاتین چاغیرمایین آدیمی…
آت لارین بئلینده یاتاقلانمیرام
کؤکسوم دار گلیر اوخ‌لارین یایینا
دؤشومو گئری آلمیشام آمازون* قادین‌لاریندان….
و ایندیسه اییرمی بیرینجی عصیر
مجازی پرده‌لرین آرخاسیندا گزیشین گؤزلر، اللر،
اوزانان آیاقلار….
آتا بی‌لرین آتاسی
الینی جانیمدا گزدیرمه!
بانی چیچه‌یین آرخالیغی
چیچک تؤکوب جانیما
مرهم آختاریرام
تانری‌لاردان قاچیرام
هر تانریچادان بیر پارچا
پازل قورورام وارلیغیما
کیپریک لریم قیفیللانیر
دولورام قارانلیق‌لارین جیلوه‌سینه
اؤزلویوم ایتیر سس‌سیزلییمده
عاغلیمدان، هوشومدان اوزاقلاشیرام…
دویون- دویون آچیلیرام
عصیانیمدان، قیسقانجیم دان
اوره‌ییمی باغلایان باغدان…
و اؤزلویوم
“شعله سیز بیر چیراق
آتش سیز بیر شعله
ایستی سیز بیر آتش”
خلسه‌دن آییلیرام
و منده باش قالدیرمیش بیر “هوپاتیا”*
آتا بی‌لرین آتاسی!
ایندیسه کیپریک‌لریمی آچ
گؤزلریمه باخ!
ایلان یووا سالماییب قاراسیندا
قوخلا!
شاه داماریمدا آخان،
آلما عطیری دئییل، قادین قانی دیر!
ایضاح:
آمازون قادینلار: اسطوره‌لر ده ساواشچی قادینلار کیمی آدلاری گلیب. رهبرلری هیپولیته آدلی بیر قادین. اؤزلرینه عائید شهرلری وارییمیش. راحاتجا ساواشماق اوچون، اوخ آتماق اوچون بیر دؤش‌لرین کسرمیشلر.
هوپاتیا: اسکندریه دانشگاهینین استادی. موهومات دان اوزاق، تعصب سوز دونجه نی تبلیغ ائدن، عالیم- ریاضی دان- فیلسوف بیر قادین. ۴۱۵- میلادی ایلینده مارس آیینین گونلرینین بیرینده، اسکندریه شهرینده کلیسانین متعصب طرفدارلاری اونو فجیع وضعیت ده اؤلدوروب، یاندیردیلار. سونرالار همان کلیسالارین طرفیندن قدیسه تانیندی!
۹۱.۱۲.۹
یک پاسخ
çox gozel