بير گون اؤزلويومده اؤزومه گليب
اکبر صالحی (قاداش)
بير گون اؤزلويومده اؤزومه گليب
کئچميشه بير جيغير آچماق ايسته‌ديم
بئش قاريش توز باسميش يول اوزه‌ريندن
بير جوت قاناد ايله اوچماق ايسته‌ديم
×
دوروشدو دوردوغوم چاغيما گئتديم
ايلک آدديم آتماغيم ياديما گلدي
پيشيک جيرماغيله ديدنده مني
آنام، “پيشده”سيله داديما گلدي
×
آتام ائششک‌ايله چؤله گئديردي
خورجونون گؤزونه باسيردي مني
او تايا بير اوشاق يوخسا داش، کوزه
جوتله‌ييب پالاندان آسيردي مني
×
داشلي کوچه‌لرده قاچديم ييخيلديم
اللريم، ديزلريم قانادي يئنه
آنام گؤزلريمين ياشيني سيلدي
گؤتوردو توماني يامادي يئنه
×
گؤلده قورباغانين سسيني کسن
گؤله داش آتديغيم چاغيما گئتديم
گؤلون بازي‌سينا هوندور داغ دئيه
ديرماشيب، او، اوجا داغيما گئتديم
×
يئر موفته، سو موفته، چؤر- چؤپ ده موفته
شاه اولوب گونده بير قالا هؤررديم
پيس‌پيسا تانک‌ايدي، قاريشقا عسگر
بئله بير قوشونا فرمان وئررديم
×
آنام تومانيمي سويا چکنده
چادرايا چولقانيب گيزلي گزرديم
اوشاقلار اويناردي کوچه- باجادا
من ده بير بوجاغا ميسيب، دؤزرديم
×
ائشيکده قار- دومان، ائوده قاويرغا
اولاندا کئفيمين شاه گئديشييدي
کورسويه سوخولوب ناغيل دينله‌مک
قيشين بال مزه‌لي دادلي ايشييدي
×
قاويرما قازماسين آنامدان گيزلي
کوپون قيراغيندا اليمه گؤتدوم
سوموکسوز بير قه‌يله سئچندن سونرا
آچديغيم کوپه‌نين آغزيني اؤرتدوم
×
اوغوردو کؤپسوتدوم آنام يئتيشدي
قيزاريب- بوزاريب پيس کؤکه قالديم
آغزيمدا زهه‌ره دؤندو قاويرما
اوتانيب باشيمي آشاغي سالديم
×
چؤللرده بيتگيني درمان‌دير،- دئيه
آنا اتک – اتک گزيب در‌ردي
قازانا دولدوروب آراغين چکيب
خسته‌يه، سانجي‌يا درمان وئرردي
×
اکينين توم يئري اوجاق‌دير،- دئيه
آتام بير قوزونو قوربان کسردي
قاراجا باساندا باشاقلاريني
يئردن اوز دؤندريب گؤيدن کوسردي
×
دنلي خرمن‌ايله يئللي هاوادا
خوش اولوب، دانيشيب، گوله‌جک‌ايدي.
قربيل‌له اؤلچولن اؤزونه چاتان،
دؤردده بير پايي دوز بؤله‌جک‌ايدي
×
بوغدادان پاييميز هرنه اولسايدي
کئچن قيشدا ساتيب يئميشديک اونو
آجي‌دير دوغروسو بير قالاق ايش‌له-
الي بوش گئده‌سن ائوينه سونو
×
آتام آجي‌لاري شيرينله‌دردي
ايشچي مئيدانيندان ايشه گئدنده
بئل باسيب، تر تؤکوب، گون باتان چاغي
هله گون چؤره‌يين الده ائدنده
×
به‌ي‌لرين ائوميزده يئري يوخ‌ايدي
نه اونلار گلردي، نه بيز قويارديق
اؤزوموز کيمييله کورسو باشيندا
قيشين گئجه‌سيندن قابيق سويارديق
×
گؤزل قارشي‌لاماق، بويورون دئمک
قوناغا حؤرمتين بينؤوره‌سييدي
ائولره قفيل‌دن قوناق گلنده
بير آز قورو چؤرک ايش گؤره‌سييدي
×
قوناقليق بوياسيز، گل- گئت بوياسيز
ائولرده بير ايدي ائشيک‌لر ده بير
اوره‌ک ياراسيندا، جيريق گئييم‌ده
دردلر ده بير ايدي دئشيک‌لرده بير
×
قيش اوچون دارتديغي يارماني آنام
بير نئچه دفتره، قلمه ساتدي
اون ياشيم اولسا دا درسه يوللاييب
يازييلا، پوزويلا باشيمي قاتدي
×
آنامين ديلينده اوخوماق ياساق،
مکتبه گئديرديم، درس اوخويوردوم
اينيمه گلمه‌ين اؤلچو بيچي‌سيز-
سويا، “آب” آدلي بير دون توخويوردوم
×
آنا دئيه‌ردي: گل کيتابين اوخو
گؤروم نه اؤيره‌نير، نه‌لر يازيرسان؟
اوخوردوم «در سبد توت است»، دئيه‌ردي:
دئيه سن آي اوغول يولون آزيرسان!
×
بير سؤزلر ياز- اوخو، من ده آنلاييم
اوخويا بيلمه‌سن، دئنه، من بيليم!
دئييرديم: بو سنين ديلينده دئييل
دئييردي: نه يازيق اولوبدور ديليم.
×
معلليم دئيه‌ردي: تورکجه دانيشما!
دانيشسان، داخيلا پول سالماسي‌سان.
بويون اه‌ي حؤکومت امرينه اوغول
اؤز ديلين بوراخيب فارس اولمالي‌سان!
×
اؤزگه‌سين تاپماميش، ايتيرمه‌لييديم-
اؤزومو، ائليمي، آنامين ديلين
بير بالتا گؤتوروب چاپايديم گرک
کؤکوندن آتايديم، آتامين جيلين
×
آنجاق کي، مرد آتام، سئويملي آنام-
اؤنومده قويدولار ائلين کئچميشين
«رنگين کمان»- دئديم. دئديلر: اوغول!
بير باخ قاري ننه اوزاديب ايشين!
×
ائليمه دايانديم آتالار کيمي
اؤزومو ائليمدن آيري سالماديم
ائليمين قاباقجيل بالالارييلا
من ده آياقلاشديم دالا قالماديم
×
کؤکوندن قيريلان اؤلودور دئيه
کؤکومله ياشاديم، حياتا چاتديم
آتامين الينده ميخچايا دؤنموش
کؤهنه تيکانلاري اويوب چيخارتديم
×
آنامين توتدوغو چؤرک بلله‌سين
کابابا وئرمه‌ديم، بالا وئرمه‌ديم
بير قورتوم سو ايله چئينه‌ييب، اوددوم
دؤشومو هئچ وده دالا وئرمه‌ديم
×
وارلي‌نين بالاسي خورما يئينده
اولاندا، من ده اؤز اييده‌مي يئديم
اونلار آتاسي‌نين پولون اؤينده
آتامين اوراغي، بئليندن دئديم
×
دئيه‌رديم آتامين بئلينين تايي-
تاپيلماز آي بالا سيزين ائويزده
اوسته‌ليک بير بيچگين اوراغيميز وار
باش قويماز دوه‌ده، فيل‌ده، اؤکوزده
×
اونلار بال- قايماغي يئسه‌يديلر ده
من ده شيرين چايا چؤره‌يه حسرت
منده بير داغ کيمي اوره‌ک واريدي
اونلار دا سئرچه‌جن اوره‌يه حسرت
×
قورخونو ايچيمده گيزلتديييم‌چون،
کيمسه‌دن بير سيلله، تپيک يئمزديم
هئچ وده بيريني عاجيز ساياراق
زور دئييب، حق کسيب، کؤتکله‌مزديم
×
آجي‌لار چوخ‌ايدي، شيرين‌لرده چوخ
آجي‌دان دئينده قلبيم دايانير
بوغولموش سسلري، سينان بئللري
ساياندا اوره‌ييم اود توتوب يانير
×
قبريستان يانيندان کئچنده، سانکي-
اؤلولر داليدان توتاردي مني
گاهدان دا قاباقدا بؤيوک اژدها
چکيب قارانليغا، اوداردي مني
×
سسيمي باشيما آتيب اوخوردوم
بلکه بو قورخولار ياديمدان چيخا
بلکه اژدهانين آغزين باغلاييب
اؤلونو بير داها قبيره ييخا
×
آنام دئيه‌ري کي: سود امر اوشاق
تکليکده آداما بؤيوک اوره‌ک‌دير
منده اينانماييب، دئيه‌رديم: آخي-
خطرده بير اوشاق نه ائده‌جکدير؟
×
تکلييه دوشنده گؤررديم کي، هن-
آنامين سؤزلري دوغرودور، دوغرو
آدام آرخالانار بير سود امه‌ره
تکليکده قورخودان چاتلاماز باغري
×
پيشيک تيلته پايين يئيه‌ندن سونرا-
سيچانلار اويناردي دامدا، ديرکده
آنجاق ايت بير پارچا قورو چؤرک‌له
شاخلاري قولاغين قاردا، کولک‌ده
×
ايل به ايل قاتلانيب بير- بيري اوسته
گؤز- گؤز آتيشقادا سيريشلي کاغيذ
يايدا ديه‌ريني وئرسه ده الدن
سويوق‌دا اولاردي ارزيشلي کاغيذ
×
ائشيکده کوف ها کوف يئل، سازاق، سويوق
اله سو تؤکمه‌يه قورخارديق گئدک
آنجاق گئتمه‌لييديک، چاره‌سيزيديک
سوزسه‌يديک تومانا يئيه‌رديک کؤتک
×
قيشدا ايليق گونون گونه‌ورينده
چؤلده قار ايچينده دووشان گزرديک
دووشان‌دا توتماساق آلوو قالديريب-
قار ايله بير هوندور آدام بزرديک
×
يئر آلما اولسايدي آتسايديق اودا
لاپ، کئفي- کئفلره قاتميشديق او گون
پؤشلرکن يئر آلما ديل- داماقلاردي
آنجاق ديل داماغا چاتميشديق او گون
×
باهاردا آغاجلار بارا دولاندا
باغيميز يوخ‌ايدي ياندان اؤترديک
بوغدانين سونبولو دنه دولاندا
سونبولو اود اوسته سوتول اوترديک
×
داوارين سودونو ساغاندا چوبان
قوزونون پاييني ساخلاردي آنجاق
قوزونو قويونا قاتان زاماندا
مله‌شمه سسيندن توتارديق قولاق
×
بير سورو قويونلا بير سورو قوزو
بير به بير مله‌شيب تاپيشارديلار
قويروقلار شوشله‌نيب، يئلين‌لر ائييب
دوداقلار امجک‌دن ياپيشارديلار
×
چوبانين وئردييي بير چاناق سودو
يولچو خيمير- خيمير باشا چکردي
محبّت شيتيلين، سئوگي توخومون
چوبان اورک‌لره هر گون اکردي
×
اوزوم‌دن، آلمادان اتک دولوسو
باغچي‌لار چوبانا پاي وئررديلر
چوبان‌لار کؤنوللـه قاتيق، پئنديردن
باغچي‌نين پايينا تاي وئررديلر
×
اوره‌ک‌لر دوم- دورو بولاقلار کيمي
تاماهسيز، محبت قاني جوشاردي
جوتجو اؤکوزلرين آلنيندان اؤپوب
سونرا شوخوم اوچون جوته قوشاردي
×
طبيعت سئوگي‌سين، حئيوان سئوگي‌سين
ساخلاماق ائللره بير عادت‌ايدي
بؤيوک‌لر حؤرمتي کيچيک يانيندا
اؤلچوسوز، بيچي‌سيز، نهايت‌ايدي.
×
اکينين، بوستانين سئل باسيب، پوزان-
کيمسه‌نين دادينا ائللر چاتاردي
بئله بير يارديمي گؤرن دردلي‌نين-
اورک هؤووشنه‌سي- قمي ياتاردي
×
ائللري خبرده قويان جارچي‌لار
کوچه‌ده، باجادا جار چکرديلر
ياسا، ياس خبرين، تويا چاغيريش
هاي چکيب، يول گئديب تر تؤکرديلر
×
تومنه پول وئرن نوزولچولارا-
نيفرتلي گؤز ايله ائللر باخاردي
او دا بير علاجسيز تورا سالاندا
ييخيلميش ائولري بير ده ييخاردي
×
ياغاندا ياغيشلار، آخاندا سولار
ائللرين تويويدو، چؤللرين تويو
کهلييه اوخشاردي خالقين يئريشي
بولاغين جيزيقدان آشاندا سويو
×
گؤي يئردن کوسنده، آدام- آداما-
قاش- قاباق تؤکردي، سانکي کوسردي
اوشاقلار اوخويوب، چؤمچه خاتيني-
ياغيشلار ياغديريب کوسو کسه‌ردي
×
قوخوسو، توستوسو کندلرين آنجاق
اوزاقدان، حياتدان خبر وئرردي
چؤلمه‌يي اوجاقدا ياغلي قاينايان
قوناغين بوينونا قولون هؤرردي
×
اويون عالمينه گيرمکدن يانا
چردک آختارارديق، آشيق ييغارديق
جويز تاپيلسايدي، نؤوبته دوروب-
اونلاري تپه‌دن بير- بير ديغارديق
×
قيشدا تورپ، داش کلم توپوموز ايدي
وورارديق اينجيردي بارماق‌لاريميز
يوموشاق رئزين‌دن باشماق گئيه‌رديک
سايمازديق سيناجاق ديرناق‌لاريميز
×
بير داشقا گئدنده، داليدان قاچيب-
گيزليجه آسلانيب، توو- توولارنارديق
سوروجو چيرپاندا آرخايا قامچي
هارادان توتسايدي، آلوولانارديق
×
مدرسه‌يولوندا کيتاب – ميتابي
چيرپارديق بير- بيره، تپه‌يه، باشا
ايشي هردن ائله يوغونلادارديق
چکردي ايشيميز چوماغا- داشا
×
مؤهره ديوارلارين چاتلاقلاريندا
بادامي، فينديغي، قوزو گزرديک
بير بادام ايچيني بئش يئره بؤلوب-
آغيزدا دونيانين دادين ازرديک
×
بير قارغا آدامي اوزاق گؤره‌نده
گيزلي دسترخاني چکردي اوزه
پئنديري، چؤره‌يي يئيه‌ردي قارغا
آرتيغي قالسايدي چاتاردي بيزه
صؤحبت آچيلاندا قورددان، ايلان‌دان
قاباغا کئچرديک بير- بيريميزدن
ياريسي يالانسا، ياريسي دوغرو
کئف ايچره قورخارديق ايچريميزدن
×
اؤکوزجن بوينوزو اولان ايلاني
ووروب اؤلدوروبدور آتام،- دئيه‌رديک
بير سورو قورد گؤروب آمما قورخماييب
چوماقلا قاويبدير بابام، دئيه‌رديک
*
بوتون ناغيل‌لاردا اولان ايشلرين
دوغرو اولدوغونو گومان ائدرديک
جين‌لردن سؤز آچيب اولمويان کيمي
حتتا تويلارينا قوناق گئدرديک
×
اکين‌دن، بيچين‌دن ال چکسه‌يدي ده
آنام، يون اييريب جوراب توخوردو
آنادان اؤيره‌نميش باياتي‌لاري-
آغلاراق نيسگيللي سسله اوخوردو
×
بيلمزديم آنامين گؤزونون ياشي
نه اوچون تؤکولور، نه اوچون آخير
دئيرديم:- گؤره‌سن آنامين کؤنلون
کيميسي اودلايير، کيميسي ياخير؟
×
آنامين گؤزوندن ياش تؤکولنده
ائله‌بيل جانيما اود تؤکولوردو
ائله‌بيل نيسگيل‌لر بير چيبان کيمي-
يئتيشيب، وئريردي گؤز، سؤکولوردو
×
دئييرديم آي آنا، نه اولوب سنه
جالانير گؤزوندن شيديرغي ياغيش؟
دئييردي هئچ بالا، بير زاد اولماييب،
چارخي دولانديران فله‌يه قارغيش
×
آچاردي سينه‌سين تؤکردي منه،
آجي‌لي، آغي‌لي کئچميش‌لريندن
من آنلار- آنلارماز قولاق آسارديم
دئييب، دينجه‌لردي آنام، دريندن
×
دئيردي آي بالا مندن سوووشوب
ايندي بو دونيادا سيزه يانيرام
بئله کي باشلاييب فله‌يين ايشي
سيزين احواليزا آلوولانيرام