اوخوماق زامانی: 5 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

akbar salehi
بیر گون اؤزلویومده اؤزومه گلیب
اکبر صالحی (قاداش)

بیر گون اؤزلویومده اؤزومه گلیب
کئچمیشه بیر جیغیر آچماق ایسته‌دیم
بئش قاریش توز باسمیش یول اوزه‌ریندن
بیر جوت قاناد ایله اوچماق ایسته‌دیم
×
دوروشدو دوردوغوم چاغیما گئتدیم
ایلک آددیم آتماغیم یادیما گلدی
پیشیک جیرماغیله دیدنده منی
آنام، “پیشده”سیله دادیما گلدی
×
آتام ائششک‌ایله چؤله گئدیردی
خورجونون گؤزونه باسیردی منی
او تایا بیر اوشاق یوخسا داش، کوزه
جوتله‌ییب پالاندان آسیردی منی
×
داشلی کوچه‌لرده قاچدیم ییخیلدیم
اللریم، دیزلریم قانادی یئنه
آنام گؤزلریمین یاشینی سیلدی
گؤتوردو تومانی یامادی یئنه
×
گؤلده قورباغانین سسینی کسن
گؤله داش آتدیغیم چاغیما گئتدیم
گؤلون بازی‌سینا هوندور داغ دئیه
دیرماشیب، او، اوجا داغیما گئتدیم
×
یئر موفته، سو موفته، چؤر- چؤپ ده موفته
شاه اولوب گونده بیر قالا هؤرردیم
پیس‌پیسا تانک‌ایدی، قاریشقا عسگر
بئله بیر قوشونا فرمان وئرردیم
×
آنام تومانیمی سویا چکنده
چادرایا چولقانیب گیزلی گزردیم
اوشاق‌لار اویناردی کوچه- باجادا
من ده بیر بوجاغا میسیب، دؤزردیم
×
ائشیک‌ده قار- دومان، ائوده قاویرغا
اولاندا کئفیمین شاه گئدیشییدی
کورسویه سوخولوب ناغیل دینله‌مک
قیشین بال مزه‌لی دادلی ایشییدی
×
قاویرما قازماسین آنامدان گیزلی
کوپون قیراغیندا الیمه گؤتدوم
سوموکسوز بیر قه‌یله سئچندن سونرا
آچدیغیم کوپه‌نین آغزینی اؤرتدوم
×
اوغوردو کؤپسوتدوم آنام یئتیشدی
قیزاریب- بوزاریب پیس کؤکه قالدیم
آغزیمدا زهه‌ره دؤندو قاویرما
اوتانیب باشیمی آشاغی سالدیم
×
چؤللرده بیتگینی درمان‌دیر،- دئیه
آنا اتک – اتک گزیب در‌ردی
قازانا دولدوروب آراغین چکیب
خسته‌یه، سانجی‌یا درمان وئرردی
×
اکینین توم یئری اوجاق‌دیر،- دئیه
آتام بیر قوزونو قوربان کسردی
قاراجا باساندا باشاقلارینی
یئردن اوز دؤندریب گؤیدن کوسردی
×
دنلی خرمن‌ایله یئللی هاوادا
خوش اولوب، دانیشیب، گوله‌جک‌ایدی.
قربیل‌له اؤلچولن اؤزونه چاتان،
دؤردده بیر پایی دوز بؤله‌جک‌ایدی
×
بوغدادان پاییمیز هرنه اولسایدی
کئچن قیشدا ساتیب یئمیشدیک اونو
آجی‌دیر دوغروسو بیر قالاق ایش‌له-
الی بوش گئده‌سن ائوینه سونو
×
آتام آجی‌لاری شیرینله‌دردی
ایشچی مئیدانیندان ایشه گئدنده
بئل باسیب، تر تؤکوب، گون باتان چاغی
هله گون چؤره‌یین الده ائدنده
×
به‌ی‌لرین ائومیزده یئری یوخ‌ایدی
نه اونلار گلردی، نه بیز قویاردیق
اؤزوموز کیمییله کورسو باشیندا
قیشین گئجه‌سیندن قابیق سویاردیق
×
گؤزل قارشی‌لاماق، بویورون دئمک
قوناغا حؤرمتین بینؤوره‌سییدی
ائولره قفیل‌دن قوناق گلنده
بیر آز قورو چؤرک ایش گؤره‌سییدی
×
قوناقلیق بویاسیز، گل- گئت بویاسیز
ائولرده بیر ایدی ائشیک‌لر ده بیر
اوره‌ک یاراسیندا، جیریق گئییم‌ده
دردلر ده بیر ایدی دئشیک‌لرده بیر
×
قیش اوچون دارتدیغی یارمانی آنام
بیر نئچه دفتره، قلمه ساتدی
اون یاشیم اولسا دا درسه یوللاییب
یازییلا، پوزویلا باشیمی قاتدی
×
آنامین دیلینده اوخوماق یاساق،
مکتبه گئدیردیم، درس اوخویوردوم
اینیمه گلمه‌ین اؤلچو‌ بیچی‌سیز-
سویا، “آب” آدلی بیر دون توخویوردوم
×
آنا دئیه‌ردی: گل کیتابین اوخو
گؤروم نه اؤیره‌نیر، نه‌لر یازیرسان؟
اوخوردوم «در سبد توت است»، دئیه‌ردی:
دئیه سن  آی اوغول یولون آزیرسان!
×
بیر سؤزلر یاز- اوخو، من ده آنلاییم
اوخویا بیلمه‌سن، دئنه، من بیلیم!
دئییردیم: بو سنین دیلینده دئییل
دئییردی: نه یازیق اولوبدور دیلیم.
×
معللیم دئیه‌ردی: تورکجه دانیشما!
دانیشسان، داخیلا پول سالماسی‌سان.
بویون اه‌ی حؤکومت امرینه اوغول
اؤز دیلین بوراخیب فارس اولمالی‌سان!
×
اؤزگه‌سین تاپمامیش، ایتیرمه‌لییدیم-
اؤزومو، ائلیمی، آنامین دیلین
بیر بالتا گؤتوروب چاپایدیم گرک
کؤکوندن آتایدیم، آتامین جیلین
×
آنجاق کی، مرد آتام، سئویملی آنام-
اؤنومده قویدولار ائلین کئچمیشین
«رنگین کمان»- دئدیم. دئدیلر: اوغول!
بیر باخ قاری ننه اوزادیب ایشین!
×
ائلیمه دایاندیم آتالار کیمی
اؤزومو ائلیمدن آیری سالمادیم
ائلیمین قاباقجیل بالالارییلا
من‌ ده آیاقلاشدیم دالا قالمادیم
×
کؤکوندن قیریلان اؤلودور دئیه
کؤکومله یاشادیم، حیاتا چاتدیم
آتامین الینده میخچایا دؤنموش
کؤهنه تیکانلاری اویوب چیخارتدیم
×
آنامین توتدوغو چؤرک بلله‌سین
کابابا وئرمه‌دیم، بالا وئرمه‌دیم
بیر قورتوم سو ایله چئینه‌ییب، اوددوم
دؤشومو هئچ وده دالا وئرمه‌دیم
×
وارلی‌نین بالاسی خورما یئینده
اولاندا، من ده اؤز اییده‌می یئدیم
اونلار آتاسی‌نین پولون اؤینده
آتامین اوراغی، بئلیندن دئدیم
×
دئیه‌ردیم آتامین بئلینین تایی-
تاپیلماز آی بالا سیزین ائویزده
اوسته‌لیک بیر بیچگین اوراغیمیز وار
باش قویماز دوه‌ده، فیل‌ده، اؤکوزده
×
اونلار بال- قایماغی یئسه‌یدیلر ده
من ده شیرین چایا چؤره‌یه حسرت
منده بیر داغ کیمی اوره‌ک واریدی
اونلار دا سئرچه‌جن اوره‌یه حسرت
×
قورخونو ایچیمده گیزلتدیییم‌چون،
کیمسه‌دن بیر سیلله‌، تپیک یئمزدیم
هئچ وده بیرینی عاجیز سایاراق
زور دئییب، حق کسیب، کؤتکله‌مزدیم
×
آجی‌لار چوخ‌ایدی، شیرین‌لرده چوخ
آجی‌دان دئینده قلبیم دایانیر
بوغولموش سسلری، سینان بئللری
سایاندا اوره‌ییم اود توتوب یانیر
×
قبریستان یانیندان کئچنده، سانکی-
اؤلولر دالیدان توتاردی منی
گاهدان دا قاباقدا بؤیوک اژدها
چکیب قارانلیغا، اوداردی منی
×
سسیمی باشیما آتیب اوخوردوم
بلکه بو قورخولار یادیمدان چیخا
بلکه اژدهانین آغزین باغلاییب
اؤلونو بیر داها قبیره ییخا
×
آنام دئیه‌ری کی: سود امر اوشاق
تک‌لیکده آداما بؤیوک اوره‌ک‌دیر
من‌ده اینانماییب، دئیه‌ردیم: آخی-
خطرده بیر اوشاق نه ائده‌جکدیر؟
×
تکلییه دوشنده گؤرردیم کی، هن-
آنامین سؤزلری دوغرودور، دوغرو
آدام آرخالانار بیر سود امه‌ره
تکلیکده قورخودان چاتلاماز باغری
×
پیشیک تیلته پایین یئیه‌ندن سونرا-
سیچانلار اویناردی دامدا، دیرکده
آنجاق ایت بیر پارچا قورو چؤرک‌له
شاخلاری قولاغین قاردا، کولک‌ده
×
ایل به ایل قاتلانیب بیر- بیری اوسته
گؤز- گؤز آتیشقادا سیریشلی کاغیذ
یایدا دیه‌رینی وئرسه ‌ده الدن
سویوق‌دا اولاردی ارزیشلی کاغیذ
×
ائشیکده کوف ها کوف یئل، سازاق، سویوق
اله سو تؤکمه‌یه قورخاردیق گئدک
آنجاق گئتمه‌لییدیک، چاره‌سیزیدیک
سوزسه‌یدیک تومانا یئیه‌ردیک کؤتک
×
قیشدا ایلیق گونون گونه‌ورینده
چؤلده قار ایچینده دووشان گزردیک
دووشان‌دا توتماساق آلوو قالدیریب-
قار ایله بیر هوندور آدام بزردیک
×
یئر آلما اولسایدی آتسایدیق اودا
لاپ، کئفی- کئفلره قاتمیشدیق او گون
پؤشلرکن یئر آلما دیل- داماقلاردی
آنجاق دیل داماغا چاتمیشدیق او گون
×
باهاردا آغاجلار بارا دولاندا
باغیمیز یوخ‌ایدی یاندان اؤتردیک
بوغدانین سونبولو دنه دولاندا
سونبولو اود اوسته سوتول اوتردیک
×
داوارین سودونو ساغاندا چوبان
قوزونون پایینی ساخلاردی آنجاق
قوزونو قویونا قاتان زاماندا
مله‌شمه ‌سسیندن توتاردیق قولاق
×
بیر سورو قویونلا بیر سورو قوزو
بیر به بیر مله‌شیب تاپیشاردیلار
قویروقلار شوشله‌نیب، یئلین‌لر ائییب
دوداقلار امجک‌دن یاپیشاردیلار
×
چوبانین وئردییی بیر چاناق سودو
یولچو خیمیر-‌ خیمیر باشا چکردی
محبّت شیتیلین، سئوگی توخومون
چوبان اورک‌لره هر گون اکردی
×
اوزوم‌دن، آلمادان اتک دولوسو
باغچی‌لار چوبانا پای وئرردیلر
چوبان‌لار کؤنوللـه قاتیق، پئندیردن
باغچی‌نین پایینا تای وئرردیلر
×
اوره‌ک‌لر دوم- دورو بولاقلار کیمی
تاماهسیز، محبت قانی جوشاردی
جوتجو اؤکوزلرین آلنیندان اؤپوب
سونرا شوخوم اوچون جوته قوشاردی
×
طبیعت سئوگی‌سین، حئیوان سئوگی‌سین
ساخلاماق ائللره بیر عادت‌ایدی
بؤیوک‌لر حؤرمتی کیچیک یانیندا
اؤلچوسوز، بیچی‌سیز، نهایت‌ایدی.
×
اکینین، بوستانین سئل باسیب، پوزان-
کیمسه‌نین دادینا ائللر چاتاردی
بئله بیر یاردیمی گؤرن دردلی‌نین-
اورک هؤووشنه‌سی- قمی یاتاردی
×
ائللری خبرده قویان جارچی‌لار
کوچه‌ده، باجادا جار چکردیلر
یاسا، یاس خبرین، تویا چاغیریش
های چکیب، یول گئدیب تر تؤکردیلر
×
تومنه پول وئرن نوزولچولارا-
نیفرتلی گؤز ایله ائللر باخاردی
او دا بیر علاجسیز تورا سالاندا
ییخیلمیش ائولری بیر ده ییخاردی
×
یاغاندا یاغیشلار، آخاندا سولار
ائللرین تویویدو، چؤللرین تویو
کهلییه اوخشاردی خالقین یئریشی
بولاغین جیزیقدان آشاندا سویو
×
گؤی یئردن کوسنده، آدام- آداما-
قاش- قاباق تؤکردی، سانکی کوسردی
اوشاقلار اوخویوب، چؤمچه خاتینی-
یاغیشلار یاغدیریب کوسو کسه‌ردی
×
قوخوسو، توستوسو کندلرین آنجاق
اوزاقدان، حیاتدان خبر وئرردی
چؤلمه‌یی اوجاقدا یاغلی قاینایان
قوناغین بوینونا قولون هؤرردی
×
اویون عالمینه گیرمکدن یانا
چردک آختاراردیق، آشیق ییغاردیق
جویز تاپیلسایدی، نؤوبته دوروب-
اونلاری تپه‌دن بیر-‌ بیر دیغاردیق
×
قیشدا تورپ، داش کلم توپوموز ایدی
ووراردیق اینجیردی بارماق‌لاریمیز
یوموشاق رئزین‌دن باشماق گئیه‌ردیک
سایمازدیق سیناجاق دیرناق‌لاریمیز
×
بیر داشقا گئدنده، دالی‌دان قاچیب-
گیزلیجه آسلانیب، توو- توولارناردیق
سوروجو چیرپاندا آرخایا قامچی
هارادان توتسایدی، آلوولاناردیق
×
مدرسه‌یولوندا کیتاب – میتابی
چیرپاردیق بیر- بیره، تپه‌یه، باشا
ایشی هردن ائله یوغونلاداردیق
چکردی ایشیمیز چوماغا- داشا
×
مؤهره دیوارلارین چاتلاقلاریندا
بادامی، فیندیغی، قوزو گزردیک
بیر بادام ایچینی بئش یئره بؤلوب-
آغیزدا دونیانین دادین ازردیک
×
بیر قارغا آدامی اوزاق گؤره‌نده
گیزلی دسترخانی چکردی اوزه
پئندیری، چؤره‌یی یئیه‌ردی قارغا
آرتیغی قالسایدی چاتاردی بیزه

صؤحبت آچیلاندا قورددان، ایلان‌دان
قاباغا کئچردیک بیر- بیریمیزدن
یاریسی یالانسا، یاریسی دوغرو
کئف ایچره قورخاردیق ایچریمیزدن
×
اؤکوزجن بوینوزو اولان ایلانی
ووروب اؤلدوروبدور آتام،- دئیه‌ردیک
بیر سورو قورد گؤروب آمما قورخماییب
چوماقلا قاویبدیر بابام، دئیه‌ردیک
*
بوتون ناغیل‌لاردا اولان ایشلرین
دوغرو اولدوغونو گومان ائدردیک
جین‌لردن سؤز آچیب اولمویان کیمی
حتتا تویلارینا قوناق گئدردیک
×
اکین‌دن، بیچین‌دن ال چکسه‌یدی ده
آنام، یون اییریب جوراب توخوردو
آنادان اؤیره‌نمیش بایاتی‌لاری-
آغلاراق نیسگیللی سسله اوخوردو
×
بیلمزدیم آنامین گؤزونون یاشی
نه اوچون تؤکولور، نه اوچون آخیر
دئیردیم:- گؤره‌سن آنامین کؤنلون
کیمیسی اودلاییر، کیمیسی یاخیر؟
×

آنامین گؤزوندن یاش تؤکولنده
ائله‌بیل جانیما اود تؤکولوردو
ائله‌بیل نیسگیل‌لر بیر چیبان کیمی-
یئتیشیب، وئریردی گؤز، سؤکولوردو
×
دئییردیم آی آنا، نه اولوب سنه
جالانیر گؤزوندن شیدیرغی یاغیش؟
دئییردی هئچ بالا، بیر زاد اولماییب،
چارخی دولاندیران فله‌یه قارغیش
×
آچاردی سینه‌سین تؤکردی منه،
آجی‌لی، آغی‌لی کئچمیش‌لریندن
من آنلار- آنلارماز قولاق آساردیم
دئییب، دینجه‌لردی آنام، دریندن
×
دئیردی آی بالا مندن سوووشوب
ایندی بو دونیادا سیزه یانیرام
بئله کی باشلاییب فله‌یین ایشی
سیزین احوالیزا آلوولانیرام

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *