تزه یاپیشمیشام سنین یاخاندان
هارا بوراخیرام قاچیب گئدهسن؟!
سن گره‌ک قورخاسان من تک خوخاندان،
هارا بوراخیرام قاچیب گئدهسن؟!
سنی گتیرمیشم اَزه‌م، اؤلدورم
سئرچه تک بوینونو اوزه‌م، اؤلدورم
قانینی آخیدام، سوزه‌م اؤلدورم
هارا بوراخیرام قاچیب گئدهسن؟!
من قارا گونلرین کئشییینده‌یم
آداملیق آدینین ائشییینده‌یم
ظولمم، جینایتم، اؤز ایشیمده‌یم،
هارا بوراخیرام قاچیب گئدهسن؟!
یا سنی آسارام قناره‌لردن،
یا یئره آتارام میناره‌لردن
حؤکمومو آلمیشام ایداره‌لردن
هارا بوراخیرام قاچیب گئدهسن؟!
سنی باسماللارام، سنی بوغارام
قولاغین اوغارام، بورنون اوغارام،
شردن دوغولموشام، شر ده دوغارام
هارا بوراخیرام قاچیب گئدهسن؟!
بوراخیم گئدهسن ساچین گؤرونه؟!
توپوغون گؤرونه، قیچین گؤرونه؟!
فیکیرین گؤرونه، ایچین گؤرونه؟!
هارا بوراخیرام قاچیب گئدهسن؟!
من سنی اَزمه‌یه حقوق آلیرام
اوره‌یین اوزمه‌یه حقوق آلیرام
قانینی سوزمه‌یه حقوق آلیرام
هارا بوراخیرام قاچیب گئدهسن؟!
1401/۶/۲۹
