دنیز، داغ و باغ هوسلی اوچ یولداشیدیق. اوتوروب، هارا گئدیب، دولانماغیمیزدان دانیشدیق. چوخ سؤزدن سونرا، هارا گئتدی‌ییمیزه قالدیق. آنجاق بیر یئره گئتمه‌لی‌ایدیک. آخیردا هارا گلسین، – دئیه یولا دوشدوک. بیر تاکسی توتوب، معلوم اولمایان هدفی ایزله‌دیک. سوروجو سوروشدو :
– هارا گئدیرسینیز؟ دئدیک هارا سورورسن، سور! بیزیمکی بللی دئییل. سوروجو گولومسه‌ییب ماشینی قازلادی.
گؤیدن پلمه قار یاغیردی. قار دنه‌لری پامبیق کیمی، دوزو قوش یئله‌یی کیمی، اوینایا- اوینایا یئره قونوردو. یورغان- دؤشکچی اولسایدی، اونا دئیه‌ردیم، پامبیق نئجه اولار! آدامی آخماق بلله‌ییر، دؤشه‌یین ایچینه سامان تپیر، دئییر : – قوش یئله‌یی‌دیر. هامی قوشلارین الیندن اینجیر.
ماشین قالابالیغینین اوزه‌ریندن اوتوبوس یئل کیمی اوچوردو. یئل نه یئل، داغین دیبینده یاندیردیغیمیز اودو کوروکله‌ییب آلوولاندیریردی. بئش دقیقه‌یه قومقومامیز قاینادی. یاشیل چیمن‌لیکلره دؤشه‌نیب، کهلیک اوتو چایینی ایچدیک. بولبول‌لرین چهچهینه قولاق آسا- آسا، قوربت ایشچیلری کیمی داغ سویا دوز سپیب، چؤره‌ک دوغراییب قارینیمیزی باسدیق. قار هاواسینا باخمایاراق یوخاری چیخمالیایدیق. بولودلاری یارا- یارا کئچیردیک.
طیاره‌نین قانادلاری بولودلارا توققوشدوقدا تاققیلتیسیندان بنگیره‌ییمیز چاتلاییردی. بیر فیرتینا قوپموش‌ایدی گل- گؤره‌سن! نفسلر قیفیللانمیشدی. پیچا- پیچ باشلاندی، هره بیر سؤز دئییردی. بیری دئییردی: گمی داشا ایلیشیب. او بیری دئییردی: دلینیب، باتیر.
تئز قاچدیق گمینین سککیسینه. آمما دنیز لپه‌لنمیردی. دالغالانماق ایسته‌مه‌دیک، سحردن آخشاما دک ایشله‌ییب موزدسوز یولا سالینمیش یورغون ایشچی کیمی ترپشمه‌یه قادیر دئییلدی.
یولداشیمیز آغیر کوره‌ک یوکونو باش یوخاری چکمه‌لی‌ایدی. اوّلده شئرلنیب دانیشدیغینا گؤره اوزه قالمیشدی. ایش لاپ زور آپاریردی. ائله بیل ماشین یاغ یاندیریردی. آز سونرا قیرپاچ ائله‌دی. چوخ زحمتله ایته‌له‌ییب، بیر کاراژا سوخدوق. یاتاغان یاندیرمیشدی. تاکسی سوروجوسونه اوره‌ییم یاندی.
او آغیر جریمه‌لردن دانیشیردی :
– جریمه‌لر قانونسوزلوق قاباغینی آلماقدان اؤترو اولسا سؤزوم یوخدور. آمما اؤز جیبلرینی دولدورماقدان اؤترو خالقی سویورلار. آللاه برکت وئرسین جیپه، منیم بیر جیپیم واریدی، بیر دفه ده منی یولدا قویمادی. بو میراث قالمیش آغزینی اژداها کیمی آچیب، منیم ساباهکی قازاناجاغیمی بوگون اودور.
یالان- دوغرو اوتوبانی جیزیق‌لاماغا گؤره باغلامیشدیلار. یولداشیمیز یوکونو کوره‌ییندن یئره قویموردو. ائله بیل موللانصیرالدّین ائششه‌یه مینیب، خورجونو، چییینینه آلیب، دئدیم : – آی قارداش سنین کوره‌یینده‌کی یوک گمینین باتیب- باتماماسینا نه تأثیر ائده‌جک؟ دئنه ساییردی! گؤردوم اولان دئییل، اؤزوم باشلادیم سایماغا:
– بیر، ایکی بیزیمکی، اوچ، دؤرد، قاپینی اؤرت. یوز، بئش یوز! بو قدر آغاج اولارمیش!؟ هامیسی بارلی، مئیوه‌لی. باغ نه باغ! گوللو- چیچکلی. قالین، کوره‌ک‌لیک آغاجلار!
او آغاجلاردان گمی سورمه‌لی کوره‌کلر چیخاردی. آمما فایداسی یوخ‌ایدی. گمینین یاریدان چوخو، داها دوغروسو هامیسی باتمیش‌ایدی؛ لاپ ایگید اوغلو دارا آسیلمیش آنانین ماتمه باتدیغی کیمی. هن! گون باتان کیمی باتمیشدی. قاش قارالمیشدی. قانینیزی قاراتدیمسا باشینیزی گیجللتدیم‌سه، واختینیزی توتدومسا، منی باغیشلایین! اوزوم چؤلمک دیبی کیمی قارا، اوزونوز قاتیق کیمی آغ اولسون.