-« سیز کیمسینیز کی؟!»- سؤیلهدیکده
باخیشینا چؤکموش
اؤگئیلیک تورونون بوز کؤلگهسینی گؤردوم،
دوداغینین سول بوجاغیندان بویلانان
اوغرو بیر گولوشون گیزلنمهسینی دویدوم.
ایللردیر اوغراشیریق بوز کؤلگهلرله،
اوغرو گولوشلرله….
بیز کیمیک کی؟!…
اوجو- بوجاغی گؤرونمز،
تورپاغی قیزیل بیر اؤلکهنین وطنداشلاری؛
یارادان اللرین یولداشلاری.
چؤرهک عطرینین دالغالارینا آلین ترینین اینجیلرینی سپنلر؛
گؤزلرینین گیلهسینده یووا سالمیش قارانقوشلاری بسلهینلر؛
بیز،
کیملیگینی یاشایان اینسانلار!
بیز کیمیک کی؟!…
گئجیکمیش آرزولارین داشییجیلاری،
تانیش حسرتلرین یولچولاری؛
باخیشلارینی سحرین سود گؤلونده اریدنلر؛
اورهکلرینی آغ للکلرین دؤیونتوسونه دویونلهینلر؛
بیز،
ماوی ایشیقلیغی آختاران اینسانلار!
بیز کیمیک کی؟!…
چؤرهک عطرینین،
قوش یوواسینین،
اوچوش سسینین وورولموشلاری؛
سئومهسن ده بیزی
تانی سئوگیمیزی!
شهریور ۱۴۰۵ – تهران