– «داها شعیر یازمیرام …»- دئییب، سوسدو دریندن،
گؤزلریندن اوخودوم ارکؤیونلوک قههرین.
بیر داملا لپهلهنیر دالغین گیلهلریندن
من ایسه اؤز ایچیمه دالارکن درین- درین.
او اوزاقلارا توموب، من سؤزوندن شاشقینام:
– شعیرسیز نئجه سالیم شاعر عؤمرونو سایا !؟
بئیینیمده دوغولوب نه واختاندیر بو اینام:
– شعیرسیز بیر یاشاییش یاد اولماقدیر دونیایا!
جواب سوراغیندایام دولغون باخیشلاریندان:
– بیر دوگونه چئوریلن بو آجیق، کوسو نهدن؟!
حزین تبسسوم دوغور دوداقلاریندان او آن:
– داها شعیر یازمیرام، یاشاییرام شعری من!
آذر ۱۴۰۴- موغان
