بو یئرلر
صمد چایلی
یادلارا باخارکن قاشلی- قاباقلی
دوستلاری گؤررکن، گولدو بو یئرلر.
گونشدن ایشیقلی، اودلو، اوجاقلی
دونیانین باغیندا گولدو بو یئرلر.
×××
دفینه ساخلایان عمانی واردیر
توکنمز معدنی، اورمانی واردیر
آغیر خسته‌لیگه درمانی واردیر
بو گؤزل دونیایه قول‌دو بو یئرلر.
×××
هنرلی انسانین قولو بورادیر
ثروتلی تورپاغین بولو بورادیر
ایشیقلی دونیانین یولو بورادیر
سعادت شهرینه یول‌دو بو یئرلر.
×××
بو اودلار یوردوندا گولور طبیعت
گونش تک نور ساچیر هنرله، صنعت
ائلینین قلبینده قاینیر محبت
صفالی جنت‌له بول‌دو بو یئرلر.
