آچین قاپینی، گلن وار
اوزوملوکدن اسن یئل
«حوا»نی روایت ائدیر
«آدام» بابانین قادین یؤنون
آلما باغینین یئتیردییی نار بوداغین.
گؤزهللییی چولغامایین یارپاغا
چیلپاق اولمالیدیر بالیق
دوشونمهدن چپرلی قافالاری.
شیطانین آدی پیسه چیخیب
یادائللیلرین الی وار بو ایشده.
آی قاپیمیزدان کئچنده
کور کیشینین قولاغی
گؤزونون وظیفهسین داشیییر
شاققالانیر دنیز
شازدا بویورسون دئیه.
ایندی سیز، ها دئیین معجوز
اسکی گؤزلویون دامازلیغیدیر؛
بو حادثهنی
یالنیز گؤزهللیک ایفاسیندا باشا دوشمک اولار،
آیاق یالین سئوگینین لیریکاسیندا.
یول وئرین گونه باخانلارا
حسین جاوانین قویوب گئتدییی امانته
شعیر مسلکیندن دانشیان خومار سولارا؛
ببزیم یئرده
شراب دادان قاداغا یوخولارین
بیر باشی گؤزهللییه باغلیدیر
بیر باشی گؤزهللییه.
۱۴۰۵/۰۴/۱۴
