بو سحر یوخودان آییلمایاجاق؟
روحو آییق سحر یاتمایاجاقدیر.
کیم دئییر سحرلر گؤرمز ائلیمیز-
بو ائلده یوکونو چاتمایاجاقدیر.
سحر آییلاجاق، باخاجاق روحو
دنیزدن دنیزه آخاجاق روحو
قریبلیکدن بلکه بیخاجاق روحو
وطنسیزلیینه باتمایاجاقدیر.
باریشماز شعریمیز باریشماز داها
سحری ایتیرمک دؤندو بیر آها
بو نئجه باهاردی باتیر گوناها
سحری اینی ایسه آتمایاجاقدیر.
بیر دسته تزه گون گلیر قارشیدان
آیلی باخیشیندا گولور قارشی دان
ماویلرله یاغار «ش»دان قار«ش»دان
یاشیل ماهنی تاری قاتمایاجاقدیر.
آغیردیر وطنده وطنسیز اؤلمک
آغیردیر وطنی ایکییه بؤلمک
اس «سازاق» آغیردیر سحرسیز گولمک
آغیردیر اسمهیین، یاتمایاجاقدیر.
