هر شئیدن اول اوشاق وارایدی
بیر ده یاغیش
بیر ده گؤی قورشاغی.
سونرا کلمه یاراندی.
دئدین بوغدا
عالمی چؤرهک عطری بورودو؛
چؤرهک، شراب ایفاسیندا.
سن
بیر الینده شراب
بیر الینده امکان فرمانی
حیاتی یئنیدن یازماق ایستهدین
چتینسیز و ساغلام،
شعری، سربست؛
ائله بیل آنادان ایندی دوغولوب
نه بیر پادشاهین امضاسیندا
نه گؤیلرین منتینده.
داغلارا چیچک دیلینده دانیشماغی تکلیف ائلهدین
اینجیمهسین تورپاق،
داریخماسین کرمی بستهسینده سسلنن
یانیق نوتلار،
سئوگی میدان ایستهینده
غریبلیک وطنی سارسیتماسین.
اولدوزون بیر ایشی
گئجهنین نیتین آچیقلاماقدیر
پوسقو یئرلرینه ایشیق توتماق؛
یارپاق، اولدوزا قاریشیر سنده
پنجرهلر هیجان کئچیریر.
۱۴۰۵/۰۳/۱۳
