استعاره منی شاعر ائلهسه ده
بو چتین زمانهده
سنی شعیرلشدیرمک اوچون
چیلپاق اولمالیدیر کلمهلر؛
حیاسیز و قاباریق.
زندان کیمی،
شورانلیغین مورگولو سوفراسی کیمی.
ساده بیر سؤزدن اؤترو
گونشی مین دونا گیردیرمک
قوشلارین سسین
ظولمته دوچار ائلهمکدیر
گؤی قورشاغینا وفاسیزلیق.
یادیما گلمیر
اود، یولون مئشهدن سالا
یاشیللیغین بورنو دا قانامایا
صولحه یوبلئی توتا یارپاقلار.
سویونمالییام بو فیکیردن
نه قورد قوزونون یولداشیدیر
نه فیرتینا نرگیسگیله سوخولاندا
اؤیود، مصلحت یولو
یول اولا بیلر.
۱۴۰۴/۰۷/۱۰
