اوره‌ییندن اوره‌ییمه
کؤرپو سالیر بارماق‌لارین
نغمه بویالی
چیجک قوخولو
سئوگی سوراغلی.
نوت‌لار
قاطار ـ قاطار
چیجک‌له‌نیر گؤزلرینین باخچاسیندا.
بیرینه پای دوشور بیر قوجاق
بیرینه پای دوشور پای‌سیزلیق.
اوی …
داغ باشیندا پوسقو قوروب
آی‌دان باشقا
اوو اوولاماق ایسته‌مه‌ین
قافلان چیخیشلیم!
دانیشاجاق‌می بیر داها
چای‌لارین قیزیل بوغازیندا
پیانو دالغاسی؟
تومارلایاجاق‌می بیر داها
مئشه‌نین یاشیل‌لیغین
«یاشیل ماهنی‌لار»؟
هانسی بارماق سؤیله‌یه‌جک
بوندان بئله
قویدوغون میراثین ده‌نیزلییین؟
