چایدا بالیق اولماسا
مئشه ده بئچه گئت – گلی،
گؤزلریمیز نه یامان یورولاجاق
یول‌لارین یاوانلیغیندا!
ال‌لریمیز
یاراماز‌می دویون آچماغا؟
بیر قاناد گؤیرچین
بیر نغمه زیتون
بیر گئجه‌لیک میشیلتی
چوخ‌مو یئر اورونه؟
قویون شعریمی دانیشیم
بو گلین دونیانین آغری‌لاریندان یازیم
دنیزین دنیزسیزلیییندن،
سنین قیزیل تورپاغیندا
مرحمت اومماغیندان،
اوشاق ایشچی‌لرین
چیلپاق سؤیوش‌لریندن یازیم.
اینانما گونشین قیزیل قانادینا،
قیرجانا قیرجانا
موسیقینی، شاعری آلدادان
ملیجک‌لییینه؛
سوکوتون آغیرلیغینا توتولان
کؤرپه چیچک‌لر
خیال بویالی گؤزلر
حرام اولور گؤزوموز باخا باخا
گؤزوموز چیخا چیخا.
بیز اؤگئی نغمه‌لریک بو کار جاهاندا
بیر قوجاق سئوگی‌نین
بیر گیله ماوی‌نین تامارزیسی.
بونو باجارمالی‌دیر ال‌لریمیز
آلمالی.
۱۴۰۴/۰۴/۱۶
