بلکه ده
آرمود آغاجی
یئتیردییی مئیوه‌یه وورولاجاق،
بنؤوشه‌نین تئلی نظاما دوشه‌جک
بوداقدا سسله‌نن
سئحیرلی بسته‌نین دالغالاریندا.
یانیلما؛
یارپاغین لهجه‌سیندن جوشان
یئنی‌لیک کاراکتئری
تورپاغین زامانلا یولداشلیغین عکس ائتدیریر
بیتگی‌نین تربیه‌سینده.
مئشه‌نی گؤزه‌للشدیرن جسارت
قورخونو قورخودوب
قوجاق آچاجاق
سئوگی‌نین آباد اولماسینا،
قوش قانادینا گره‌کن سایغی‌لارا.
چیچه‌یین کولک‌له قول- بویون اولماسی
پاییزلی بیر حئکایه دئییل؛
یئری گلدیکده
ساده سئوگی‌لر
اوز قویوبِ ماویلییه.
دنیز بوندان دا درین تاماشادیر.
دئمک
دونیانین مهربان فیکیرلری
اتک یازیسی‌دیر
یاغیشین ساچینا.
۱۴۰۴/۳/۱۲
