گون کئچر، ایل اؤتر، دؤنر روزگار
باغچالار گول آچار، یئتیشر باهار
انسان‌لار ظولمتی کؤکوندن قازار
داریخما سئوگیلیم، داریخما داها!
گؤزومو تیکمیشم یئنه صاباحا.
بولبول‌لرگؤیلره قاناد آچاجاق
آل گونش اوفوقدن ایشیق ساچاجاق
قارتال‌لار اؤنونده سارلار قاچاجاق
داریخما سئوگیلیم، داریخما داها!
گؤزومو تیکمیشم یئنه صاباحا.
چن دومان آلسا دا باغی، بره‌نی
ائل سئویر مقدس آنا وطنی
زمانه اینجیدیر بیلیرم سنی
داریخما سئوگیلیم، داریخما داها!
گؤزومو تیکمیشم یئنه صاباحا.
آتماریق هئچ زامان یاری، یولداشی
اغیارین باشینا داغلارین داشی
کور اولسون گؤزلری، آخسین گؤزیاشی
داریخما سئوگیلیم، داریخما داها!
گؤزومو تیکمیشم یئنه صاباحا.
نئیله‌مک زمانه سیخیبدی بیزی
سورویور هریانا بیل دیزی- دیزی
بوروموش چیس- دومان آنا تبریزی
داریخما سئوگیلیم، داریخما داها!
گؤزومو تیکمیشم یئنه صاباحا.
جوشور اوره‌ییمده خالقیمین قانی
وطنین جانی‌دیر ایگیدین جانی
دارگونده دوستونو، دوشمانی تانی
داریخما سئوگیلیم، داریخما داها!
گؤزومو تیکمیشم یئنه صاباحا.
بیزه قان اوددورور قانون قویانلار
قانلی خنجری‌له دری سویانلار
ائلین وارلیغینی تالاسا اونلار
داریخما سئوگیلیم، داریخما داها!
گؤزومو تیکمیشم یئنه صاباحا.
