گول ای وطن! گلیر باهار،
بیزیم ائل‌لره، ائل‌لره.
اوچ، ای قانادلی آرزی‌لار
بیزیم ائل‌لره، ائل‌لره!
آل بویانیر یال یاماج‌لار،
گوروشمه‌گه تله‌سن وار.
چیچکله‌نیر شن آرزی‌لار
بیزیم ائل‌لره، ائل‌لره.
شادلیق گزیر ائلدن ائله،
کؤنول‌لرین پاسین سیله؛
حیات گوله، عؤمور گوله
بیزیم ائل‌لره، ائل‌لره.
گوله‌جک‌دیر امل‌لرده،
قورتاراجاق نیسگیل‌لر ده،
اوخویاجاق بولبول‌لر ده
بیزیم ائل‌لره، ائل‌لره.
«آغیارلی»یام قلبیمده یاز،
ایسته‌ییرسن کؤکسومو یاز!
سن ای کؤنول، نغمه‌لر یاز
بیزیم ائل‌لره، ائل‌لره.
