وطن عسگری‌یم سنگر قورموشام
دوشمانین اؤنونده سینه گرمیشم
قولومدان قوپانی ضربه وورموشام
یاشاسین دوشمانی قووان ائللریم
صهیونیزمین سسین بوغان ائللریم!
ایگید قارداشلاریم! بوگوندن بئله –
سنگرلرده وئرین من‌له ال – اله
دوشمانین جانینا سالاق ولوله
یاشاسین اوجا باش قالان ائللریم،
فاشیزمین سنگرین آلان ائللریم!
خالقیمیز دوشمانا اوخونو آتیب
آزادلیق یولوندا سنگرده یاتیب
وطنین تورپاغی آل قانا باتیب
یاشاسین ظولمتی یاران ائللریم،
صهیونیزمه ضربه ووران ائللریم!
آلارام یاغی‌نین ظولمکار جانین
تؤکه‌رم تورپاغا شرفسیز قانین
قالدیررام گؤیلره خالقیمین شانین
صهیونیزمه قبیر قازان ائللریم،
یالتاغین پرگارین پوزان ائللریم!
هر زامان توفنگی الده ساخلارام
آلیجی قوش کیمی سنگر حاقلارام
دار گونده وطنی، ائلی یوخلارام
های وئریب دئییرم وورون ائللریم،
عدالت قورقوسون قورون ائللریم!
«آغیارلی» عسگرم وطن سیرداشی
هاراییم تیتره‌دیر بوتون داغ، داشی
اؤلسم ده آنامین آخماز گؤز یاشی
یاشاسین سنگرده یاتان ائللریم،
قورتولوش بایراغین توتان ائللریم!
تیر – ۱۳۶۶
