ایش‌لر چوخ اَییب، اَیری آخیر آخماغیمیزدان!
یاد تک ساییلیب، گئنده دوروب باخماغیمیزدان!
بَی خرمنینی باششاق ائدیب دولدورورق بیز
دَن- دَن دؤیوروک، باش ازیلیر توخماغیمیزدان!
ال‌لر اؤزومون، داش اؤزومون، باش ‌دا منیمدیر
ساتغین اود آچیر گیزلیجه اؤز چاخماغیمیزدان!
یوردومدا کؤهول ایچره اوخور اووسونو دئولر
قان‌چی قاریسی، قان‌دی سورور قونداغیمیزدان!
ظولمون ساراییندا قیسیلار های ائشیدنده
قارغا سایاغی خوف ائله‌یر چارداغیمیزدان!
آغزیندا دیلی، دادماق اوچون بال سؤزوموزدن
یاد یاغلی دیلی پای یالاییر بارداغیمیزدان!
کاردی قولاغی، دار بوغازی، سوسماغا محکوم
جانسیز جانینا جان دیله‌نیر تورپاغیمیزدان!
قارتال قی‌یینی دویماسا او شاه داغیمیزدان
حاشا قوتارا بیلمز او، جان قییناغیمیزدان!
آخمالی فیکیر آخدی «قوجا» بئینینه لام- لام
آستا گومولور، آستا قاچیر آخماغیمیزدان!
۹۸/۴/۳۰