یالقیزلیغین دنیزینده اوزوردوم
دئدین کی، اؤزومو یئتیره‌جه‌یم.
او آخشام یولونا اولدوز دوزوردوم
سؤیله‌دین: گؤزومو گتیره‌جه‌یم.
سن اؤزون قاتیلدین او گئجه منه،
سئوگی‌دن دانیشیدین مین دؤنه دؤنه؛
عشقینه آند ایچدین ایناندیم سنه،
سئویندیم دردیمی بیتیره‌جه‌یم.
دئدین: چکدی منی اینجه بو سسین،
اورتاق ساندیم اوره‌یی‌نین هوسین،
بو کوبلتین آچدی کؤنلوم قفسین،
عؤمورلوک پای بیلیب گؤتوره‌جه‌یم.
قاغایی‌لار دنیز اوسته اوچورلار،
دورنالار دا گؤللریندن کؤچورلر؛
دویغولارین اوره‌ییمی آچیرلار،
بئجردیب، جوجردیب بیتیره‌جه‌یم.
ایتدی، داها سئودالیقدان اثر یوخ،
قوجالیقدا شئیدالیقدان کسر یوخ؛
او ایلقاردان، قایدالیقدان خبر یوخ،
بیلمزدیم بئله تئز ایتیره‌جه‌یم.
