داغ‌لار یاسا باتار، غم حالین قاتار
باری سن آغلاما هله! بنؤوشه!
باشیندان کولک‌لر آل شالین قاپار
گل اسمه، تیتره‌مه بئله! بنؤوشه!
بئله‌دیر فله‌یین ایشی، اویونو،
کفنه چئویرر بزه‌ک‌لی دونو؛
هر اسن کولک‌له بوکمه بوینونو
عطرینی داغ‌لارا اله! بنؤوشه!
گلیشین یاز اولار، گئدیشین خزان
بیر گؤز قیرپیمیندا اؤترگی زامان-
ترتر لچک‌لری سولدورار هر آن،
وئرر وارلیغینی یئله، بنؤوشه!
سولموش دوداغیندا دردینی گیزله،
آزادلیق مئهی‌نین شئح‌لرین ایزله،
سحر، آل گونشین سئحرینی گؤزله
گولومسر اوزونه گوله، بنؤوشه!
باخیشین نه دئییر، نه جاواب آلیر،
مین معنا داشی‌ییر، مین فیکره دالیر،
بو «قوجا» شاعری احساسا سالیر،
اوره‌یینه قادان گله، بنؤوشه!
