۱. شعیرلر
کلمه‌لرین دهلیزلرینده گیزله‌نن لکه‌لی ال‌لر
شعیرلری گولله‌له‌ییرلر:
سؤزلر قان ایچینده پارچالانیب
گؤیلره اوچور،
سونرا ایسه
داملا- داملا یاغاراق
یئره کؤچور،
یئنی‌دن
یئنی سؤزلره دوزولور،
یئنی‌دن
شعیرلرده دوغولور.
۲. فیرتینا
اؤلوم آغاجی‌نین فیرتیناسی
ایشیق ساچان آیا قده‌ر اوزانیر،
آغاجلاری
کؤلگه‌لرینده آغلادیر؛
کوله دؤنموش اوره‌ک‌لری ایسه
آلوولاندیریر.
۳. تانرینین ائلچی‌لری
تانرینین ائلچی‌لری
قادینلیغیما توخونارکن
گؤزللیگین معناسینی
کوره‌ییمین اورتاسیندان
چیخارتدیلار.
۴. ساچلاریم
ساچلاریمین رنگی
دامارینداکی قانا بولانمیش شهوتینی
گؤزلریندن آخدیریر؛
جانینی یاندیریر.
