من
آغلار بولودلارین گولوشمه‌سینه،
آخار سولارین شیریلتی سسینه،
گئنیش چؤللرین عطیرلی نفه‌سینه
اینانیرام.
من
کؤچن قوشلارین قانادلانماسینا،
تیتره‌ک اوره‌ک‌لرین دؤیونمه‌سینه،
سؤنوک اوجاقلارین یانماسینا
اینانیرام.

من اینانیرام
قارانلیغین سونو
شفقین آرخاسیندان آخیب قاچاجاق،
من اینانیرام
بو ائوین دونموش بینؤوره‌سینده
«نوروز گولو» چیچکلری آچاجاق.
من اینانیرام
ال‌‌لر بیر بیرینه ساریلیب
یئنی‌دن یاراداجاق،
یئنی‌دن یاشاداجاق.