عصا
هاشم ترلان
منه عصا(چلیک) هدیه ائده‌ن شاعر دوستوم “ائلدار موغانلی”یا

 طالعیم ذیروه‌ده, کؤلگم دیواردا

سکسنین, دوخسانین الینی سیخدیم.

ای عؤمور کاروانی هارداسان, هاردا!

کئچدیگیم یوللارین ایزینه باخدیم.

…

هله ده کؤکسومده چیرپینیر اوره‌ک

اجل قدرتینه گووه‌نه بیلمیر.

الینده توتدوغو قیلینجی تیتره‌ک

آتیر آددیملارین دؤورمده بیر- بیر.

…

کؤچوب همیاشلاریم تک قالدیم- دئمه!

اؤتن خاطره‌لر باش آلیب گئدیر

جوان دوستلاریم دا قالیب قئیدیمه

هر بیری چیینینه داش آلیب گئدیر.

…

قلمه باغلاندیم سؤکولنده دان

جان آتدیم شعریمین اوجالیغیندا.

قوپاندا سئل‌لرین قوینوندا توفان

دوستلار کؤرپو اولدو قوجالیغیمدا.

…

دونن بیر دوستوملا, من دؤندوم یازا

آخشامدی؛ قلبیمده اویاندی گوندوز.

الینده گوموشو رنگلی بیر عصا

باخدی گؤزلریمه دایاندی دوم- دوز.

…

دئدیم کی قارداشیم بو تدبیر نه دیر؟!

سنه بو شوخ عصا یاراشمیر هله!

بئله بیر حالتین منی گؤینه‌دیر

باخ! قالان عؤمروم‌ده سنه حواله.

…

-یانیلما سیرداشیم بونو یقین بیل!

قئیدینه قالماماق گوناهیمیزدیر.

بو تدبیر, بو عصا منیمچون دئییل

سنین گله‌جه‌یین صاباحیمیزدیر.

…

هله قوش کیمیسن بیلیرم- دئیه

سیخ داغلار, قایالار دیره‌یین اولدو.

قوی اولسون بو عصا مندن هدیه

بلکه یوز یاشیندا گره‌یین اولدو.

…

سندن بو معنوی احترام آیدین؛

کؤورلتدی قلبیمی داها نه دردیم.

سن منه دونیانی باغیشلاسایدین

دوغروسو “ائلدار”یم سندن کوسردیم.

…

سنین اومید ساچان عملینله من-

یئنی‌دن یوغرولوب گوجه گلمیشم.

ائله سانیرام کی شعریمله حتمن

ائلیمه یوردوما وئجه گلمیشم.

…

چوخ چتین بیر یولدا توتموشوق قرار

اولسادا دؤوره‌میز چنلی، دومانلی

صاباح بو یوللاری ایشیقلاندیرار

“هاشم ترلان”ایله “ائلدار موغانلی”

تهران ۲/۱۰/۱۳۹۰