عصا
هاشم ترلان
منه عصا(چلیک) هدیه ائده‌ن شاعر دوستوم “ائلدار موغانلی”یا
طالعیم ذیروه‌ده, کؤلگم دیواردا
سکسنین, دوخسانین الینی سیخدیم.
ای عؤمور کاروانی هارداسان, هاردا!
کئچدیگیم یوللارین ایزینه باخدیم.
…
هله ده کؤکسومده چیرپینیر اوره‌ک
اجل قدرتینه گووه‌نه بیلمیر.
الینده توتدوغو قیلینجی تیتره‌ک
آتیر آددیملارین دؤورمده بیر- بیر.
…
کؤچوب همیاشلاریم تک قالدیم- دئمه!
اؤتن خاطره‌لر باش آلیب گئدیر
جوان دوستلاریم دا قالیب قئیدیمه
هر بیری چیینینه داش آلیب گئدیر.
…
قلمه باغلاندیم سؤکولنده دان
جان آتدیم شعریمین اوجالیغیندا.
قوپاندا سئل‌لرین قوینوندا توفان
دوستلار کؤرپو اولدو قوجالیغیمدا.
…
دونن بیر دوستوملا, من دؤندوم یازا
آخشامدی؛ قلبیمده اویاندی گوندوز.
الینده گوموشو رنگلی بیر عصا
باخدی گؤزلریمه دایاندی دوم- دوز.
…
دئدیم کی قارداشیم بو تدبیر نه دیر؟!
سنه بو شوخ عصا یاراشمیر هله!
بئله بیر حالتین منی گؤینه‌دیر
باخ! قالان عؤمروم‌ده سنه حواله.
…
-یانیلما سیرداشیم بونو یقین بیل!
قئیدینه قالماماق گوناهیمیزدیر.
بو تدبیر, بو عصا منیمچون دئییل
سنین گله‌جه‌یین صاباحیمیزدیر.
…
هله قوش کیمیسن بیلیرم- دئیه
سیخ داغلار, قایالار دیره‌یین اولدو.
قوی اولسون بو عصا مندن هدیه
بلکه یوز یاشیندا گره‌یین اولدو.
…
سندن بو معنوی احترام آیدین؛
کؤورلتدی قلبیمی داها نه دردیم.
سن منه دونیانی باغیشلاسایدین
دوغروسو “ائلدار”یم سندن کوسردیم.
…
سنین اومید ساچان عملینله من-
یئنی‌دن یوغرولوب گوجه گلمیشم.
ائله سانیرام کی شعریمله حتمن
ائلیمه یوردوما وئجه گلمیشم.
…
چوخ چتین بیر یولدا توتموشوق قرار
اولسادا دؤوره‌میز چنلی، دومانلی
صاباح بو یوللاری ایشیقلاندیرار
“هاشم ترلان”ایله “ائلدار موغانلی”
تهران ۲/۱۰/۱۳۹۰
یک پاسخ
سنی چوخ سئویرم حرمتلی شاعر .هر سوزون کلامین عزیزدیر بیزه .بیله بیر شاعر-یازیچیا نه ارزو ائتمه ک اولار ؟ یالنیز جان ساغلیغی معنالی عمروندن بار وئرسین بیزه . سیزین یازدیغینیز گوموشو پنجک بیزیم خالقیمیزا وئریلن ان گوزل هدیه دیر .سیز بو شاه اثری یارادارکن خالقیمیزین تاریخینی صاف-صمیمی دیل ایله اوره کلره هوپدورورسونوز. ئوزونوز جانلی تاریخ اولاراق (یاد اللری بیر گولون بوداغینی اگمه یه بیر معصوم کورپه نین خطرینه قلبینه دیمه یه) قویماییرسینیز عشق اولسون سیزه . شعریزده یازیبسیز : صاباح بو یوللاری ایشیقلاندیرار هاشم ترلان ایله …. سیزبو گونده بیزیم یوللاری ایشیقلاندیریرسینیز. سیزین گونشلی گوندوزونوز همیشه لیک اولاجاق اردبیل – اذری