بو داغ‌لارین گؤز یاشینی
گؤره‌ن سیلن اولاجاق‌می؟!
اوره‌یینده دالغالانان-
داغی بؤلن اولاجاق‌می؟!
سینه‌سینده جیغیر آچان
زیروه‌سینه دوغرو اوچان
گؤزلرینده سئودا ساچان-
بیر یوکسلن اولاجاق‌می؟!
یارالاری آجیشمادا
سیزیلتیسی دوشمور یادا
حسرت دنیز، او بیر آدا
دؤنوب قالان اولاجاق‌می؟!
اوفوقونده نور گؤرونور
کؤکسونده بولود، سورونور
اوره‌یی کؤزه بورونور
اودا گلن اولاجاق‌می؟!
باشیندا هارای هایی وار
دوغولمامیش اولایی وار
بلکه، سس‌سیز هارایی وار
بونو بیلن اولاجاق‌می؟!
دی ۱۳۹۸ تهران
