اوستومه اوچان-
اوزون بوی، دلی بیر بینادان یوخ،
قارا بولودلارین الیندن یاپیشیب-
ائومیزه سوخان بننادان قورخار
اوزاقلارا نیشانلانان گؤزلریم.
درین بیر یارادان دئییل،
اومودسوز بیر گونون-
قارانلیق رویاسیندان سیزلایار جانیم.
اوره‌ییم دؤیونورسه
قول – قانادیمین سینماغی نئیلر،
نئیلر منه؟!
گؤی اوزونون-
قانادسیزلیغی سیندیرار
اوره‌ییمین قول- قانادلارینی.
اوره‌یی داش‌لار-
داش – قالاق ائدرلر
زنا‌کار ساندیقلاری گؤز یاشلاریم؛
کئچیب گئده‌ر بو دا.
نئینک، گیزلین آغلارام.
گؤزلری داش اولانلار-
سؤکر باغریمی، دئشر اوره‌ییمی،
ایچر گؤز یاشلاریمی؛
بیتیرر من!
