(۱)
داغلار منیم دایاغیمدی،
من بیر ائلین نفسی‌یم.
جانیم وطن تورپاغی‌دی،
وطن آدی‌نین سسی‌یم.
هامی‌لار باجیم، قارداشیم،
ایتیب باتماز وطنداشیم؛
یوزه دولا گینه یاشیم
ائلیمین کؤرپه کسی‌یم.
نغمه‌م گوجلو سئله بنزر،
سرحدلری ووروب ازر؛
دادی دوداقلاردا گزر،
اوره‌ک آلان هوسی‌یم.
(۲)
بو آرادا نه واردی کی
حسرت تؤکور گؤزوموزه؟!
بو نه قیش‌دی، نه قاردی کی
اؤزون سالیر سؤزوموزه؟!
دونیا واری نارین – نارین
آلاجاق وئردییی بارین؛
بو دونیادا اولانلارین
قالیر اوزو – اوزوموزه.
عؤمره بئل باغلایان هانی؟
ییخیلدی شؤهرتین خانی؛
اؤلن‌لرین آدی، سانی-
بیر آینادی یوزوموزه.
دومان یولدان گلیر اینان!
یوخ کیمسه‌میز بیزه یانان؛
اؤزوموزو هر گون دانان
یانیر «مهران» کؤزوموزه.
