چئویرن: کیان خیاو
ترجمه: کیان خیاو
کیان خیاو


یاساق بیتیک‌لردن یاساق یوخویا
کیان خیاو

گل دئییرسن

یالنیزجا گل

ساچ‌لارینی بویامیش یالنیزیم قادین!

اوچونجو قات باساماق‌لاری اوستونده

نه گؤزل زیللنیشین وار

قاپینین قولایجا آچیق بیر تاغین‌دان!…

*

یئرلی‌سین‌دن بومبوش ائینا‌لی داغیندا

اییده آغاج‌لارینین قوروموش‌لاری اینله‌ییر.

یاریم ساعت بوندان سونرا

گؤره‌جه‌ییم او سنی دوشونورم….

*

ائینا‌لی گوز قوخویور

تؤکوم- تؤکوم تؤکولور بولوارلار.

بیر داها سنی اؤپرسم

دادلاناجاقمی باغمئشه‌میز گؤرن؟…

*

باغمئشه بولوارلاری دالغا‌لانیر

یا کریم قوش‌لاری سوسموش چاغیندا.

آرکاییک بیر سینیق کوزه‌دیر کؤنلوم

پای گؤتورموش سنین اوچون گتیریرم.

آنیلیرسان آنیرام

دوشونولورسن دوشونورم

نئجه ده پوزقون‌دور

کئچمیشده کئچیردیک‌لریم سنینله!…

*

یارپاق‌لار خیشیلدامیرلار

تاپاناق پیچیلداییرلار قولاقلاریما:

بو شهرین میدان‌لاری آتلازدان‌دیر

قالدیریم‌لاری بیلگین‌لر تاپداغی

دؤرد یول

قیرخ یول

قیرخ یول کسن‌لرین قالابالیغیندا.

هله سوروجویه باخ

توت نومره‌نی وئر من دانیشیم دئییر!…

*

بو آن سنینله آیریلدیغیم آندیر

ائینالینین باشیندا بیر آزمان قبیر اوستونده‌یم.

قالخمیش چیگین‌لرینی

یوروموش دوشوندن دؤشونه کیمی

و ایندی اؤلموشون آرتیق

اییده بولواری بویونجا اوزانلتمیش جمدیینی….

*

اوچونجو قات باساماق‌لاری اوستونده

قولایجا قاپینین آچیق بیر تاغین‌دان منه زیللنمیش

خیسین- خیسین آدیمی چاغیرماداسان.

ساعت‌لاردیر منیم گؤزله‌ییشیمده‌سن

یانیندا قالمیشلیغیمی بیلمزجه.

اؤلوب اؤیله یانیندا قالمیشام سنین کئچن ایل

ائینا‌لی سیرا تپه‌لری‌نین آراسیندا….

*

ائینا‌لی سیرا تپه‌لری‌نین آراسیندا

گؤی اوزو ده، گونش ده وار

یئر، یئل، تورپاق، سو و آلوو

مین بیر بویایا چالیر وورولموشلوغوم.

قولتوغومدا بیر چانتا یاساق بیتیک

اؤپوشورم اؤپوشه‌رک سنینله….

*

اؤیرنجی اولدوغوم ایللر

قول- بویون گزیردیم اؤزومله بیرگه.

اییده چیچک‌لرینی چوخ سئویردیم

اوچونجو قات‌دان باخماق ایسته‌ییردیم باغمئشه‌یه

ساریلسین بیربیرلرینه دئییردیم بولوارلار

تپه‌سین‌دن دیرناغینا گوز قوخوسون تبریز

مین بیر بویایا چالسین وورولموشلوغوم.

ایتیب باتیردیم تبریزین بوغازیندا

اؤیرنجی اولدوغوم ایللر.

سئوگییه یئتینمیردیم

قول- بویون گزیردیم اؤزومله بیرگه.

دیپ دیری‌نین بیریسیدیم

اؤیرنجی اولدوغوم ایللر….

*

بیر گون ائرکن

یوخسا بیر گون آخشام چاغی

بیر یاکریم اوچوب گئدرسن بورا‌دان

بیر قانادیندا یاشامین بنؤوشه چالارلیغی

بیر قانادیندا اؤلومون آغلیغی.

بیر گون قوشوقچو آدینی داشییان بیر گنج

سنی آرایار

آرایار، آغلایار، سنی چاغیرار

من اونو باغریما باسار، اؤپه‌رم

او منی اؤنجه تانیماز، سونرا تانییار

اونا بیر توپ کار- کاغیزدان ساوایی

نسه وئرجه‌ییم اولماز

کاغیزلاردا یاکریم قوش‌لارینین

دینلنمه‌ین ماهنی‌لاری.

بیر اوتاقدا ایله‌شریک

بیر اوتاقدا یاتاریق بیرگه او گنجله

گنج‌لیکله.

بیربیرین‌دن آیریلماز یاسدیق‌لاریمیز

یئتر آرتیق دئیه‌ریک

بونجا یاتاق‌لاریمیز آیریجا‌لیقدا قوجالدی‌لار.

یئتر آرتیق

بولوارسیز ندن قوجالسین یاکریم قوش‌لاریمیز؟

قوجالدیق دا قوجالتدی‌لار بیزی آنجاق

یئتسین آرتیق!…

*

آرتیق یوخسان

تبریزین ارکی اؤنونده

گونش قاش- قاش آغاردیر آغاران‌لاری.

دؤنوب اوزااااق

بیر اوزاق یولا باخیرام

بیر آی باتیر ائینالینین اوستونده….

*

سن منی گؤزله‌ییرسن

گئجه یاری‌سی اولسا دا

سن منی گؤزله‌یه‌جکسن.

سن تبریزین گؤی‌لرین‌دن سوووشان بیر توغرولون

قاناد، قاناد، قاناد، قاناد چالیشینی ائشیده‌جکسن

ائشیتمه‌یه‌جکسن آنجاق اؤز قاپینین زیلینی.

اوچونجو قات باساماق‌لاری اوستونده

قولایجا قاپینین بیر تاغینی آچیب

گؤزومه زیل‌لنه‌جکسن….

*

ائینا‌لیدا باتان آیا باخیرام

ایلک دؤنه سنی گؤردوگوم گونو آنیرام

تبریزین یونیوئرسیته بولوارین‌دان

ارکین اؤنونه کیمی

گونش قاش- قاش آغاردیردی آغاران‌لاری.

یئرلی‌سین‌دن بومبوش ایدی قورد میدانی

سس‌سیز، سمیرسیز باخیشدیق

بیر قورد سسلندیم: آوووووه

سن ده بیر یاکریم قوشو سسلندین: اووووه!

بو سس نه سس دئیه سوردون

بو ساو نه ساو؟

بو اولاییش نئجه بیر اولاییش‌دیر کیان خیاو؟!…

*

ایندی بیر شال، بیر اتک‌لیک آلمیشام سنه، سئوگیلیم

گؤی اوزونو باشینا اؤرته‌جکسن

گونه باخان زمی‌سینی یایا‌جاقسان

بئلین‌دن بالدیرینا.

یاری آل، یاری ساری

اللرینه بیر آلما دا وئره بیلسئیدیم باری!

سونرا دوروب باخسایدیم فیقورونا

مین بیر بویایا چالسایدی یئنی‌دن وورولموشلوغوم!…

*

سن مین بیر بویا ایچینده یاتیرسان کسین

اییده آغاج‌لاری چیچکله‌ین اؤدده

بولوارلاری تؤکوم- تؤکوم تؤکولن یئرده تبریزین.

مین بیر بویانین ایچینده

بوغازیم‌دان دامجی- دامجی دامجیلایان یاغیش‌دان سونرا

وورولموشلوغومون گؤی قورشاغیندا….

*

ایندی

ایکیندی

تبریزین قوم ساعتی

بئشین‌دن بئش یاریمینا ترسه ایشله‌ییر.

سس توخوم سرپیلیر سنین قوم‌لوغونا، گؤیرمیر

باغیرتی سالدیریر منیم گؤزلریمه، گؤرونمور.

تبریزین قوم ساعتینا دؤنوروک

باش- آیاق ایشله‌ییریک.

اؤرنه‌یین باش- آیاق گزیر سئوگی دامارلاریمیزدا

و ایکیندی بئشه قالمیش بئش مئتیر

بوسبوتون تبریز گؤزوموزدن ایتیر

گؤز آچینجا ایکیندی گئجه اولموش!…

*

بو گئجه یوخودا سنی آرایاجاغام

بو گئجه یوخودا منی آرایا‌جاقسان.

گؤزلریمیز بیربیرینه دیمه‌دن گؤروشجه‌ییک

اللریمیز بیربیرینه توخونما‌دان

سئویب سئویلجه‌ییک.

اؤپوشمه‌دن

قولتوغوموزا بیر چانتا یاساق بیتیک یوکله‌یه‌رک

آیریلمازجاسینا آیریلاجاغیق.

بیزه قالان

اویاق‌لیقدا گؤردوگوموز یاساق یوخولار اولا‌جاق!…

۱۳۹۱/ ۷/ ۱۹- ۲۰

چاپ

2 پاسخ

  1. سلام!.
    من باور دارم که دو انسان از قلبشان بهم متصلند و شما بااین شعر بسیار زیبایتان آن را به تصویر کشیده و به مخاطبانتان این حس عمیق و دوس داشتنی را بخوبی انتقال داده اید دستتان درد نکند انشالله همیشه سلامت و موفق باشید.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یاساق بیتیک‌لردن یاساق یوخویا/ کیان خیاو

کیان خیاو
www.ishiq.net

آذربایجان ادبیات و اینجه‌صنعت سایتی

یاساق بیتیک‌لردن یاساق یوخویا/ کیان خیاو

کیان خیاو
www.ishiq.net

آذربایجان ادبیات و اینجه‌صنعت سایتی

یاساق بیتیک‌لردن یاساق یوخویا/ کیان خیاو

کیان خیاو
www.ishiq.net

آذربایجان ادبیات و اینجه‌صنعت سایتی