چئویرن: ائلتاش صالیحی
ترجمه: ائلتاش صالیحی
ائلتاش صالیحی

اومود_حایات_گله‌جک
ائلتاش صالیحی

بیر سؤزجوگون باش اوجو هارالارا دایاناجاغی دوشوندورور منی
مثلا «اومود»
او
دیرناق آراسی آچان بیر سؤزدور
(یئتمیشینده بئله زیتون اکه‌جک‌سن*)
هر سحر بونونلا باشلاییرام گونومو؛
دئمیشدیم: «سرچه‌لرین سسیندن دوغولور گونش»
بیلیرم
سنین بونو خاطیرلایا بیله‌جه‌گینین ایحتیمالی
منیم بونو اونودا بیله‌جه‌گیم قدردیر

بیر سؤزجوگون باش اوجو هارالارا دایاناجاغی دوشوندورور منی
مثلا «حایات»
(او‌ سئرچه‌لرین قانادیندا آتیلان اینجه نبیض‌دیر)
آه…
کؤلگه‌م آیاقلاریمی یئره دوگونله‌مه‌سه‌یدی
سنه آچیق گؤیدن دانیشاجاقدیم
آه_ی بیلیرسن می؟
او
قارانلیغین ایچینده ایتیردیگیم کؤلگه‌مین سس فورماسی دیر.
ایشیغین اولمادیغی یئرده کؤلگه‌نین آنلامی اولورمو هئچ؟؟
بوتون تنقیدلری جانیما آلاراق سنه ایشیغی آنلادیرام
(ایشیق:
قاپ_قارا چاغلارین بیتیشینه اینانماقدیر
ایشیق:
بوتون قارانلیقلارا دیرنمک دیر)
آرتیق آیدینلیغا چیخماغی دوشونمه‌لی‌ییک
بیرده آدام کیمی یاشاماغی
بوتون قورخولاریمیزلا
بوتون آجی‌لاریمیزلا
بوتون…

بعضا بیر سؤزجوگون باش اوجو هارالارا دایاناجاغی دوشوندورور منی
مثلا «گله‌جک»
«گل» گله‌جه‌یین کؤکودور
«گل» یالواریش‌دیر
بویروق‌دور
اومود‌دور

گل،
گئتمه،
گؤزگیله‌م
اینان بونلارین «گ» ایله باشلانماسی تصادوف دگیل
آز اؤنجه دئدیم
آرتیق آیدینلیغا چیخماغی دوشونمه‌لی‌ییک
آرتیق گله‌جک زامانلی جومله‌لر قورمالی‌ییق

*ناظیم حیکمتدن بیر میصرع

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اومود_حایات_گله‌جک / ائلتاش صالیحی

ائلتاش صالیحی
www.ishiq.net

آذربایجان ادبیات و اینجه‌صنعت سایتی

اومود_حایات_گله‌جک / ائلتاش صالیحی

ائلتاش صالیحی
www.ishiq.net

آذربایجان ادبیات و اینجه‌صنعت سایتی

اومود_حایات_گله‌جک / ائلتاش صالیحی

ائلتاش صالیحی
www.ishiq.net

آذربایجان ادبیات و اینجه‌صنعت سایتی