گئت‌گینن تورپاغین آلتیندا داداش، راحت یات!
سنه دای هورمییه‌جک کتده آلاش، راحت یات!
دیری‌کن خاطیریوه یئرکؤکو سویمازدی بو ائل
سنه هرشئی سویاجاق کاتدا خوداش، راحت یات!
داها مات قالمییاجاقسان تویوغون قیمتینه
سنی سینسیتمییه‌جک بیرده لاواش، راحت یات!
نه گؤزل گونده گولوم مقصدیوه چاتدین، آخئی
قار یاغیر اوستووه چوخ چوخدا یاواش، راحت یات!
یادگار قالسا اگر بیر بالا دفتر سندن
ائده‌جکلر سنی حافظ‌له توتاش، راحت یات!
آیلار ایللر سنه تک بیر«قورو احسن» دئدیلر
قورولار ایندی اگر اولسادا یاش، راحت یات!
جیبلرون حسرتینی چکدیگی پوللار ایندی
اولاجاق قبریوین اوستونده شاباش، راحت یات!
شکلیوی رمکده نصب ائیلییه‌جکلر دووارا
گرانئتدن قوناجاق اوستوه داش، راحت یات!
یوخسول ایدین سنی سایمازدی قوهوم قارداشلار
تانقاهین چیخسا دوشر کتده ساواش، راحت یات!
تؤک داغیت ائیلییه‌جکلر مالووی مجلیسده
گئده‌جک موفته قازانجون باشاباش، راحت یات!
بیرده گر قالماسا سنده آزاماز یئرده بی شئی
دوشه‌جک بورجا اوشاقلار آی آتاشٍ، راحت یات!
آروادوندا سنی چوخ یول سایا سایمازدی قاغا
ار تاپینجاق گییه‌جک قاره قوماش‌، راحت یات!
او کئچل کلّه‌وه توک یاپدیراجاق شکلونده
اولاجاقسان اوجا بوی بیر قاراقاش، راحت یات!
قالمادی قئیدیوه عؤمرونده سنین بیر یئکه باش
گله‌جک مجلیسیوه یوز یئکه باش، راحت یات!
بیزیم ائللرده اؤلندن سورا اینسان دوغولار
بیز ندن اولدوق ازلدن بئله چاش؟ راحت یات!
من اؤلوم هر نه قدَر قورتداسالارخورتداما سن
لااقل نوش ائله‌روک بیر کاسا آش‌، راحت یات!
بیزیم ائلده نه چوخ ایمیش اؤلونون منزلتی
دئییرم من ده اؤلئیدیم بئله کاش، راحت یات!
آی «نیراوغلو» دییه‌سن کی گئنه سارساقلاییسان
گئت‌گینن یورقانین آلتیندا داداش، راحت یات!