مجلیسه کاندید اولوب میرزه تاغی
باش کسیر شمشیرینین دال قاباغی
چوخ آغیردیر دییه‌سن طمطراغی
بئلــــه کی حددن آشیبدیر قوناغی
ساتیب الدن چیخادار مولکی باغی
دوشه‌جکـــــدیر هچَله میرزه تاغی
اینـــدیـدن چوخــــلارین آلمیش پولونان
اَل تـــــــوتور هر کسه بیر جور یولونان
چوخونون بوینـــــونا مینمیش چولونان
صیغه‌سین کسـدیریب اون بئش دولونان
بیلسه آرواد آلاجاقدیر طلاغی
دوشه‌جکدیر هچَـله میرزه تاغی
پَه آتونــــان بو بشــــــر شرم ائله‌مز
دوشمنـــــه بوینــــون اَیَر شرم ائله‌مز
اوزونـــــه ائل تــوپورر شرم ائله‌مز
گونـــــده یوز یول اَل اؤپر شرم ائله‌مز
هارا گئتسن گلر اوردان سوراغی
دوشه‌جکــــدیر هچَله میرزه تاغی
یوخــــــــدو بیر بنــد- بره برکیتمه‌یه بو
چالیشیــر بیـــــــر کسی اینجیتمه‌یه بو
آنـــــــد ایچیب چیخسا اگر ایتمه‌یه بو
قالمـــــاییب کتده حوضور گئتمه‌یه بو
ایندی دای ساده دَییل کند اوشاغی
دوشه‌جکدیر هچَـــــله میرزه تاغی
آقانیـــــــــن یئــدی قلم حیله‌سی وار
گونده آروادلار اوچـون روضه‌سی وار
سوتی قنــــــــــادیسی یا میوه‌سی وار
جوجــــه‌سی اولماسادا، قیمه‌سی وار
نئچه آیلاردی کی سؤنمور اوجاغی
دوشه‌جکدیر هچَـــــــــله میرزه تاغی
چوخونا وعده وئریب ایش وئره‌جک
چوخلو دیشسیز قوجایا دیش وئره‌جک
سیزه آهــــن، بیزه کرپیش وئره‌جک
شاها شاه ماتدا وزیر کیش وئره‌جک
ایندیدن طوفان ائدیر قاش قــاباغی
دوشه جکدیر هچَـــــــله میرزه تاغی
هله‌لیک هر یئته‌نین قـــــارداشیدیر
سیرتیلیب، اوزلولرین لاپ باشیدیر
بو توخوم شیطانین اؤز یولداشیدیر
هــــر کس آللانسا بونا چوخ ناشیدیر
یئل ویـریب دوشسه باشیندان پاپاغی
دوشه‌جکدیر هچـــــَله میرزه تاغی
بئــــــله کاندیدلــرینن وای وطنه
چالیرام هر گئجه لای لای وطنه
وئرمسک بیزلر اگر های وطنه
قــورخورام گلمییه یاز یای وطنه
حق اگر اولسا بو خلقین دایاغی
دوشه‌جکدیر هچَــله میرزه تاغی
آییلیب میلّتیمز یاتمیـیــاجاق
حقی ناحقـــه گورا آتمیـیـاجاق
پولا هئچ کس نظرین ساتمییاجاق
پیسی دای یاخشییا ائل قاتمییاجاق
ائلیمیز یاخشی گؤرور دای اوزاغی
دوشه‌جکـــدیر هچَله میرزه تاغی
۱۳۹۰
